അൽക്കയിലൂടെ പുറത്തുവന്നത് ഡൽഹി കോൺഗ്രസ്സിന്റെ വികാരം; ഇടപെട്ട് എഐസിസി: കെജ്രിവാളിനെ കെസിആറാക്കുമോ തർക്കങ്ങൾ?

അൽക്കയെ തള്ളിപ്പറഞ്ഞ് ഉടൻതന്നെ കോൺഗ്രസ് ദേശീയനേതൃത്വം രംഗത്തെത്തി. അങ്ങനെയൊരു പ്രസ്താവന നടത്താൻ അൽക്കയെ ആരും ചുമതലപ്പെടുത്തിയിരുന്നില്ലെന്ന് എഐസിസി ഇൻചാർജ് ദീപക് ബബാരിയ പറഞ്ഞു. വളരെ അപക്വമായ പ്രസ്താവനയായിപ്പോയി അൽക്കയുടേത്. ഡൽഹിയിൽ എന്തെങ്കിലും നടക്കണമെങ്കിൽ എഎപിയുമായി ഒരു സഖ്യം ആവശ്യമായി വരുമെന്ന സൂചന കോൺഗ്രസ് നൽകിക്കഴിഞ്ഞതായാണ് ഇതുവരെയുള്ള സംഭവവികാസങ്ങളിൽ നിന്ന് മനസ്സിലാക്കാനാകുന്നത്. ഡൽഹിയിൽ മാത്രമല്ല ഇന്ന് എഎപിക്ക് ശക്തിയുള്ളതെന്ന വസ്തുതകൂടി ഉൾക്കൊണ്ടുള്ള പ്രതികരണമാണ് കേന്ദ്ര നേതൃത്വത്തിൽ നിന്നെത്തിയത്. ഡൽഹിയിൽനിന്ന് ലോക്സഭയിലേക്ക് എഎപി മാത്രമല്ല, കോൺഗ്രസ്സും എത്തിയിട്ടില്ല. എല്ലാ സീറ്റുകളിലും ബിജെപിയാണ് ജയിച്ചുകേറിയത്. എല്ലാ കക്ഷികളും ഒരുമിച്ചിരുന്ന് കാര്യങ്ങൾ തീരുമാനിക്കുമെന്നാണ് ഇപ്പോൾ കോൺഗ്രസ് ഡൽഹി സീറ്റുകളുടെ കാര്യത്തിൽ പറയുന്നത്. അൽക്ക ലംബ പറയുന്ന യോഗത്തിൽ സീറ്റുകളുടെ കാര്യം ചർച്ചയിൽ വന്നിരുന്നേയില്ലെന്നും കേന്ദ്ര നേതൃത്വം പറയുന്നു.

അൽക്കയിലൂടെ പുറത്തുവന്നിരിക്കുന്നത് ഡൽഹിയിൽ കോൺഗ്രസ് നേതാക്കളുടെ വികാരംകൂടിയാണ് എന്നതാണ് യാഥാർത്ഥ്യം. സംസ്ഥാനത്ത് തങ്ങൾ എന്ത് നിലപാടെടുക്കുമെന്ന തരത്തിൽ ഒരു ആശയക്കുഴപ്പം നേതൃത്വത്തിനുണ്ട്. അരവിന്ദ് കെജ്രിവാളിനെ വിശ്വസിക്കാൻ പറ്റില്ലെന്ന നിലപാടാണ് സംസ്ഥാന നേതൃത്വത്തിന്റേത്. ഏത് സന്ദർഭത്തിലും ബിജെപി അജണ്ടകൾക്ക് അനുകൂലമായ പ്രത്യയശാസ്ത്ര സമീപനം കെജ്രിവാളിൽ നിന്നുണ്ടായേക്കാം. കൂടാതെ 2019 ലോക്സഭാ തിരഞ്ഞെടുപ്പിൽ എല്ലാ സീറ്റുകളിലും രണ്ടാംസ്ഥാനത്ത് നിന്നിരുന്നത് കോൺഗ്രസ്സാണെന്നതും ഡൽഹിയിൽ നിന്നുള്ള നേതാക്കൾ ചൂണ്ടിക്കാട്ടുന്നു. ബിജെപി വിരുദ്ധ വോട്ടുകൾ കോൺഗ്രസ്സിലേക്കെത്തിക്കാൻ ഇത്തവണ സാധിക്കുമെന്നാണ് നേതാക്കളുടെ പ്രതീക്ഷ.

നിലവിൽ ഈ പ്രശ്നത്തെ ഇരുപാർട്ടികളും ചേർന്ന് ഒതുക്കിയിട്ടുണ്ട്. എഎപി മന്ത്രിയും വക്താവുമായ സൗരഭ് ഭരദ്വാജ് ഇക്കാര്യം ഇങ്ങനെ വിശദീകരിക്കുന്നു: “പ്രതികരണം നടത്തിയവർ അതിന് ഉത്തരവാദപ്പെട്ടവരല്ലെന്ന് അവരുടെ കേന്ദ്ര നേതൃത്വം പറഞ്ഞിട്ടുണ്ട്. പ്രശ്നം അവിടെ അവസാനിക്കുന്നു.” 2024 ലോക്സഭാ തിരഞ്ഞെടുപ്പിൽ എല്ലാ പ്രതിപക്ഷ കക്ഷികളുടെ ഒരുമിക്കുമെന്ന പ്രതീക്ഷ കൈവിടുന്നില്ലെന്നും അദ്ദേഹം പറഞ്ഞു. അതെസമയം വരാനിരിക്കുന്ന ഛത്തീസ്ഗഢ്, മധ്യപ്രദേശ് തിരഞ്ഞെടുപ്പുകളിൽ ഇരു പാര്‍ട്ടികളും തമ്മിലുള്ള പോരാട്ടം രാജ്യം കാണാനിരിക്കുകയാണ്. ഡൽഹി മുഖ്യമന്ത്രി അരവിന്ദ് കെജ്രിവാൾ അതിന്റെ തിരക്കുകളിലേക്ക് തിരിഞ്ഞുകഴിഞ്ഞു. ഓഗസ്റ്റ് 19നും 20നുമായി ഈ സംസ്ഥാനങ്ങളിൽ എഎപിയുടെ പ്രചാരണം തുടങ്ങും. കോൺഗ്രസ്സുമായി നേരിട്ട് ഏറ്റുമുട്ടുകയാണ് ഇവിടെ എഎപി.

അരവിന്ദ് കെജ്രിലാൾ കെസിആറിന്റെ വഴിയിലേക്ക് നീങ്ങുമോ?

തെലങ്കാനയിൽ കെസിആറിന്റെ ഭാരത് രാഷ്ട്രസമിതി കോൺഗ്രസ്സുമായി നേരിട്ടേൽക്കുകയാണ്. ഇക്കാരണത്താൽ മാത്രമാണ് അദ്ദേഹം ഇന്ത്യാ സഖ്യത്തിൽ നിന്നകന്നു നിൽക്കുന്നതെന്ന് കരുതാനാകില്ല. കോൺഗ്രസ്സുമായി സംസ്ഥാനങ്ങളിൽ നേരിട്ട് പോരാട്ടം നടത്തുന്ന സിപിഎമ്മും എഎപിയുമെല്ലാം സഖ്യത്തിലുണ്ട്. എന്നാൽ തെലങ്കാനയിലെ രാഷ്ട്രീയ സാഹചര്യം തികച്ചും വേറിട്ടതാണ്. ദക്ഷിണേന്ത്യ പിടിക്കുക എന്ന ലക്ഷ്യത്തിൽ ബിജെപി അടുത്തതായി നോട്ടമിട്ടിട്ടുള്ളത് തെലങ്കാനയെയാണ്. സംസ്ഥാനത്ത് അതിശക്തമായ പാർട്ടി സംവിധാനങ്ങളൊരുക്കാൻ ഇതിനകം ബിജെപിക്ക് കഴിഞ്ഞിട്ടുണ്ട്. കോൺഗ്രസ്സിനൊപ്പം ദേശീയതലത്തിൽ കൈ കോർക്കുകയും സംസ്ഥാനത്ത് എതിര്‍ക്കുകയും ചെയ്യുന്നതിലെ ഇരട്ടത്താപ്പ് സ്വാഭാവികമായും ചോദ്യം ചെയ്യപ്പെടും. കോൺഗ്രസ്സിനെ മുഖ്യ എതിരാളിയായിത്തന്നെ നിർത്തുന്നതാണ് കെസിആറിന് സേഫ്.

നേരത്തേ തന്നെ കെസിആർ കോൺഗ്രസ്സിതര പ്രതിപക്ഷ ഐക്യം കെട്ടിപ്പടുക്കാൻ പ്രവര്‍ത്തിച്ചുവന്നിരുന്നതാണ്. നിലവിൽ ഭാരത് രാഷ്ട്രസമിതി മഹാരാഷ്ട്ര അടക്കമുള്ള സംസ്ഥാനങ്ങളിൽ ഇടമുറപ്പിക്കാൻ ശ്രമം തുടങ്ങിയിട്ടുണ്ട്. കെസിആറിനെ മഹാരാഷ്ട്രാ പ്രവേശനത്തെ എന്‍സിപി അധ്യക്ഷൻ ശരദ് പവാർ നിശിതമായി വിമർശിച്ചിരുന്നു. ബിജെപിയുടെ ബി ടീമായി ബിആർഎസ് മാറിയെന്നാണ് അദ്ദേഹം പ്രസ്താവിച്ചത്. എന്താണ് ബിആർഎസ് ആലോചിക്കുന്നതെന്നതിൽ പല നിരീക്ഷണങ്ങളും വരുന്നുണ്ട്. സംസ്ഥാനത്ത് പ്രതിപക്ഷ വോട്ടുകൾ കോൺഗ്രസ്സിലുമായി വിഭജിച്ചുപോകണമെന്നേ ഇപ്പോൾ കെസിആർ ആലോചിക്കുന്നുള്ളൂ എന്നാണ് ചിലർ പറയുന്നത്. എന്തായാലും കെസിആർ നേരിടുന്നത് തികച്ചും വ്യത്യസ്തമായ ഒരു രാഷ്ട്രീയപ്രശ്നമാണ്. എഎപി ആ പ്രശ്നം അതേ അളവിൽ നേരിടുന്നില്ലെന്നു പറയാം.