“ബൊമ്മസാന്ദ്ര ഹൊസൂർ അന്തർസംസ്ഥാന മെട്രോ കർണാടകയുടെ നിക്ഷേപ സാധ്യതകൾക്ക് എതിരായി ഭവിക്കും. ബെംഗളൂരുവിന്റെ ഏറ്റവും വലിയ ശക്തിയായ മനുഷ്യവിഭവശേഷിയും നിക്ഷേപ അവസരങ്ങളും നഷ്ടപ്പെടുത്താൻ ഞങ്ങൾക്ക് കഴിയില്ല. ഞങ്ങൾ ഒരു അടിസ്ഥാനസൗകര്യ പദ്ധതിക്കും എതിരല്ല, എന്നാൽ കർണാടകത്തിന്റെ താൽപ്പര്യങ്ങൾ സംരക്ഷിക്കേണ്ടത്,” ഖാർഗെ പറഞ്ഞു.
അതെസമയം ഓഗസ്റ്റ് രണ്ടിനു തന്നെ ഹൊസൂർ-ബൊമ്മസാന്ദ്ര മെട്രോയുടെ ഫീസിബിലിറ്റി സ്റ്റഡി നടത്താൻ ചെന്നൈ മെട്രോ (Chennai Metro Rail Limited (CMRL) തുടങ്ങിയിട്ടുണ്ട്. നമ്മ മെട്രോയുടെ (Metro Rail Corporation Limited’s (BMRCL) ഒരു ലേൻ ബൊമ്മസാന്ദ്രയിലേക്കും വരുന്നുണ്ട്. ഈ മെട്രോ സ്റ്റേഷനുമായി കണക്ട് ചെയ്താൽ ഹൊസൂർ മെട്രോയ്ക്ക് ബെംഗളൂരുവിലെ എല്ലാ നഗരപ്രദേശങ്ങളുമായും മികച്ച കണക്ടിവിറ്റി ലഭിക്കും. ഈ വർഷം അവസാനത്തോടെ ബൊമ്മസാന്ദ്രയിലേക്കുള്ള നമ്മ മെട്രോ യാഥാർത്ഥ്യമാകും.
2022ൽ കർണാടകത്തിൽ ബിജെപി സർക്കാർ ഭരിച്ചിരുന്ന കാലത്താണ് കേന്ദ്രം സിഎംആർഎലിന് ഹൊസൂർ-ബൊമ്മസാന്ദ്ര പദ്ധതിയുടെ ഫീസിബിലിറ്റി സ്റ്റഡിക്ക് അനുമതി നല്‍കിയത്. കർണാടക അതിനെ പിന്തുണയ്ക്കുകയും ചെയ്തു.
അതെസമയം കര്‍ണാടക ചേംബേഴ്സ് ഓഫ് കൊമേഴ്സ് ആൻഡ് ഇൻഡസ്ട്രി ഈ വിഷയത്തിൽ സംസ്ഥാന സർക്കാരിന്റെ ആശങ്കയോട് യോജിക്കുന്നില്ല. സർക്കാരിന്റെ നയങ്ങളാണ് നിക്ഷേപങ്ങളെ ആകർഷിക്കുന്നതെന്ന് ഫെഡ‍റേഷൻ പ്രസിഡണ്ട് വിബി ഗോപാൽ ചൂണ്ടിക്കാട്ടി. കൂടാതെ ബെംഗളൂരു നിക്ഷേപങ്ങളുടെ കാര്യത്തിൽ ഐതാണ്ടൊരു പൂർണ്ണപരിണാമത്തിൽ എത്തിയ സ്ഥിതിയാണുള്ളത്. പ്രത്യേകിച്ചും ഇലക്ട്രോണിക് സിറ്റി- ഹൊസൂർ മേഖലയിൽ. മെട്രോ കണക്ടിവിറ്റി കൊണ്ടുമാത്രം ബെംഗളൂരുവിൽ നിക്ഷേപം കുറയില്ലെന്നും അദ്ദേഹം വ്യക്തമാക്കി. മറിച്ച് ഇരു സംസ്ഥാനങ്ങളുടെയും തൊഴിൽശക്തിയുടെ ഒരു കൈമാറ്റത്തിന് ഇത് വഴിയൊരുക്കും.
ബെംഗളൂരുവിന്റെ ഐടി ഹബ്ബായ ഇലക്ട്രോണിക് സിറ്റിയെ ലക്ഷ്യം വെച്ചാണ് തമിഴ്നാട് സർക്കാരിന്റെ നീക്കമെന്ന് കർണാടക സർക്കാർ മനസ്സിലാക്കുന്നു. ജീവിതച്ചെലവും പ്രവർത്തനച്ചെലവുമെല്ലാം ഏറെ കൂടുതലുള്ള ഇലക്ട്രോണിക് സിറ്റിയിൽ നിന്ന് ചെറുകിട-ഇടത്തരം വ്യവസായങ്ങളും, സ്റ്റാർട്ടപ്പുകളും ഹൊസൂരിലേക്ക് നീങ്ങാനിടയുണ്ട്. ബെംഗളൂരുവിന്റെ സമീപപ്രദേശമായതിനാൽ അതുവഴിയുള്ള ഭൂമിശാസ്ത്രപരമായ ഗുണങ്ങൾ കുറയുകയുമില്ല.
ബെംഗളൂരുവുമായി താരതമ്യം ചെയ്താൽ ഭൂമിക്ക് വളരെ വിലക്കുറവാണ് ഹൊസൂരിൽ. ഇക്കാരണത്താൽ ചെറുകിട സ്ഥാപനങ്ങൾക്ക് മികച്ച സ്ഥലസൗകര്യത്തോടെ പ്രവർത്തിക്കാൻ കഴിയും. ജീവിതച്ചെലവ് ബെംഗളൂരുവിൽ വളരെ കൂടുതലാണ്. ഏറ്റവുമടുത്ത് നടന്ന പഠനങ്ങൾ പ്രകാരം ഇന്ത്യയിലെ തന്നെ ഏറ്റവുമുയർന്ന ജീവിതച്ചെലവ് കൂടുതലുള്ള നഗരങ്ങളിൽ നാലാമതാണ് ബെംഗളൂരു.
