പരമ്പരാഗതശൈലിയിലെ ഇഞ്ചിക്കറി
ഇഞ്ചിക്കറി തന്നെ പലരും പലവിധത്തിലാണ് തയ്യാറാക്കുക. അതുപോലെ പല പ്രദേശത്തും പറയുന്ന പേരിലും വ്യത്യാസം ഉണ്ട്. ചിലര്‍ ഇഞ്ചംപുളി എന്നാണ് പറയുക. ചിലര്‍ ഇഞ്ചിക്കറി, ചിലര്‍ പുളിയിഞ്ചിക്കറി എന്നും പറയും. പേരുകള്‍ പലവിധമെന്നപോലെ തന്നെ തയ്യാറാക്കുന്ന രീതിയിലും ചില വ്യത്യാസങ്ങള്‍ നമ്മള്‍ക്ക് കാണാന്‍ സാധിക്കും.
ചിലര്‍ ഇഞ്ചി നല്ലപോലെ കൊത്തിയരിഞ്ഞാണ് ഇഞ്ചിക്കറി തയ്യാറാക്കി എടുക്കുന്നത്. എന്നാല്‍, ചില സ്ഥലത്ത് ഇഞ്ചി അരച്ച് ചേര്‍ക്കുന്നതും കാണാം. ഇത്തരത്തില്‍ രണ്ട് വിധത്തില്‍ തയ്യാറാക്കുമ്പോള്‍ രുചിയിലും നമ്മള്‍ക്ക് വ്യത്യാസം അനുഭവിക്കാന്‍ സാധിക്കുന്നതാണ്. ചില പ്രദേശത്ത് ഇഞ്ചി തീയല്‍ വരെ വെക്കാറുണ്ട്. പക്ഷേ, അതിന്റെ രീതി കുറച്ചും കൂടെ വ്യത്യസ്ഥമാണ്. അതില്‍ നാളികേരം ചേര്‍ക്കും.
മാങ്ങാ അച്ചാര്‍
വിനാഗിരി ചേർക്കാതെ എളുപ്പത്തിൽ മാങ്ങാ അച്ചാർ തയ്യാറാക്കാം
ഈന്തപ്പഴം ഇഞ്ചിക്കറി
പൊതുവില്‍ ഇഞ്ചിക്കറിയില്‍ ശര്‍ക്കരയാണ് ചേര്‍ക്കാറുള്ളത്. എനനാല്‍, ശര്‍ക്കര ചേര്‍ക്കാതെ നമ്മള്‍ക്ക് നല്ല ഇഞ്ചിക്കറി തയ്യാറാക്കി എടുക്കാന്‍ സാധിക്കുന്നതാണ്. ഇതിന് നല്ല സ്വാദും അതുപോലെ തന്നെ സദ്യയ്കക് മാത്രമല്ല, നെയ്‌ച്ചോറിന്റെ കൂടെ പോലും കഴിക്കാന്‍ സാധിക്കുന്ന നല്ല ഒന്നാന്തരം ഈന്തപ്പഴം ഇഞ്ചിക്കറിയാണ് ഇത്. ഇത് തയ്യാറാക്കി എടുക്കാന്‍ നിങ്ങള്‍ക്ക് എത്രത്തോളം മധുരം ആവശ്യമുണ്ടോ എത്രത്തോളം ഈന്തപ്പഴം എടുക്കാവുന്നതാണ്. ഈന്തപ്പഴം എടുക്കുമ്പോള്‍ നല്ല മധുരം ഉള്ളതും സോഫ്റ്റായിട്ടുള്ളതുമായ ഈന്തപ്പഴം തന്നെ എടുക്കാന്‍ ശ്രദ്ധിക്കണം. എന്നാല്‍, മാത്രമാണ് കറിയ്ക്ക് സ്വാദ് ലഭിക്കുക.
തയ്യാറാക്കാം
അരകപ്പ് ഇഞ്ചിയ്ക്ക് രണ്ട് കപ്പ് ഈന്തപ്പഴം എന്ന കണക്കില്‍ എടുക്കാവുന്നതാണ്. ഈന്തപ്പഴത്തിന്റെ മധുരത്തിനനുസരിച്ച് അളവിലും വ്യത്യാസം വരുന്നതാണ്. ഇത് തയ്യാറാക്കുന്നതിന് മുന്‍പായി നല്ലപോലെ പുളി കുറച്ച് വെള്ളത്തില്‍ കുതിര്‍ത്ത് വെക്കാന്‍ മറക്കരുത്. ആദ്യം തന്നെ ഇഞ്ചി നന്നായി കൊത്തിയരിഞ്ഞ് എടുക്കുക. ഇതിന്റെ കൂടെ പച്ചമുളക് എരിവിന് ആവശ്യത്തിന് അരിഞ്ഞ് മാറ്റി വെക്കണം.
ഒരു പാത്രം ചൂടാക്കി, അതിലേയ്ക്ക് എണ്ണ ഒഴിച്ച് കുറച്ച കപ്പലണ്ടിയും കളുവണ്ടിയും വറുത്ത് കോരി മാറ്റിവെക്കണം. കപ്പലണ്ടിയുടെ തൊലി കളഞ്ഞ് വേണം വറുക്കാന്‍. ബാക്കിയുള്ള എണ്ണയിലേയ്ക്ക് കുറച്ച് കടുക് ഇട്ട് പൊട്ടിക്കുക. ഒപ്പം വറ്റല്‍ മുളകും കറിവേപ്പിലയും ചേര്‍ക്കണം. ഇവ ഒന്ന് മൂത്ത് വരുമ്പോള്‍ ഇതിലേയ്ക്ക് ഇഞ്ചി ചേര്‍ത്ത് വഴറ്റുക. ഒപ്പം പച്ചമുളകും ചേര്‍ക്കാന്‍ മറക്കരുത്. ഈ സമയത്ത് ഈന്തപ്പഴം കഴുകി ചൂടുവെള്ളത്തില്‍ കുതിരാന്‍ വെക്കണം.
ഇഞ്ചി ഒന്ന് വഴറ്റി കഴിയുമ്പോള്‍ ഇതിലേയ്ക്ക് മഞ്ഞള്‍പ്പൊടി അതുപോലെ മുളക് പൊടി എന്നിവ ചേര്‍ക്കണം. ഇവ മൂത്ത് വരുമ്പോള്‍ ഈന്തപ്പഴം കുരുകളഞ്ഞ് കുറച്ച് വെള്ളം ചേര്‍ത്ത് അരച്ച് വെച്ചത് ചേര്‍ക്കുക. നല്ലപോലെ വെള്ളം പോലെ ആകരുത്. ഇത് നന്നായി മിക്‌സ് ചെയ്ത് ഒന്നു കുറുക്കി എടുക്കണം. അതിന് ശേഷം പുളി നന്നായി പിഴിഞ്ഞ് ചെറിയ വെള്ളത്തോടെ ഇതിലേയ്ക്ക് ചേര്‍ക്കുക. പുളി ഒഴിക്കുമ്പോഴും വെള്ളം കൂടാന്‍ പാടുള്ളതല്ല. ഇവ നന്നായി കുറുകി വരുമ്പോള്‍ മധുരവും ഉപ്പും പുളിയും എല്ലാം പാകത്തിനാണോ എന്ന് പരിശോധിക്കുക. കുറവുള്ളതിനനുസരിച്ച് പാകത്തിന് എല്ലാം ചേര്‍ക്കാം. നന്നായി കുറുകി വരുമ്പോള്‍ ഇതിലേയ്ക്ക് വറുത്ത് മാറ്റി വെച്ചിരിക്കുന്ന കശുവണ്ടിയും കപ്പലണ്ടിയും ചേര്‍ക്കാവുന്നതാണ്.
സൂക്ഷിക്കേണ്ട വിധം
അധികം നാള്‍ പുറത്ത് വെക്കാന്‍ സാധിക്കാത്ത ഒരു ഇഞ്ചിക്കറിയാണ് ഇത്. അതുപോലെ, ഇത് ഓണത്തിന് രണ്ട് ദിവസം മുന്‍പ് തയ്യാറാക്കിയാല്‍ ഓണത്തിന്റെ അന്ന് സ്വാദ് കൂടുതലായിരിക്കും. ഇത് എല്ലായ്‌പ്പോഴും ഒട്ടും നനവില്ലാത്ത സ്ഥലത്ത് തന്നെ സൂക്ഷിക്കാന്‍ ശ്രദ്ധിക്കുക. അതുപോലെ, നനവില്ലാത്ത പാത്രത്തില്‍ നല്ലപോലെ ചൂടാറിയതിന് ശേഷം വേണം ഇട്ട് വെക്കാന്‍. അതുപോലെ ഒട്ടും ഈര്‍പ്പം തട്ടാത്ത വിധത്തില്‍ സൂക്ഷിക്കണം. പരമാവധി ഫ്രിഡ്ജില്‍ തന്നെ സൂക്ഷിക്കുന്നതാണ് നല്ലത്.
ഈന്തപ്പഴത്തിന് നിരവധി പോഷകങ്ങള്‍ അടങ്ങിയിട്ടുള്ളതിനാല്‍, ഈ ഇഞ്ചിക്കറി കഴിക്കുന്നത് ആരോഗ്യത്തിനും നല്ലതാണ്. അതുപോലെ തന്നെ, ഇഞ്ചി ദഹനത്തിനും നല്ലതാണ്. ഇത് തയ്യാറാക്കുമ്പോള്‍ മധുരം ഇത്തിരി മുന്നിട്ട് നില്‍ക്കാന്‍ പാകത്തിന് ശ്രദ്ധിക്കണം. പഞ്ചസ്സാരയും ശര്‍ക്കരയും ഇതില്‍ ചേര്‍ക്കണ്ട ആവശ്യം സത്യത്തില്‍ ഇല്ല. നല്ല ഈന്തപ്പഴത്തിന് നല്ല മധുരം ഉണ്ടായിരിക്കുന്നതാണ്.
അഞ്ജലി എം സി നെ കുറിച്ച്
അഞ്ജലി എം സി ഡിജിറ്റൽ കണ്ടൻ്റ് പ്രൊഡ്യൂസർ
പത്ര പ്രവര്‍ത്തന മേഖലയുടെ ചുവട് പിടിച്ച് മാധ്യമ രംഗത്തേയ്ക്ക് കയറി വന്ന വ്യക്തിയാണ് അഞ്ജലി. സ്‌കൂള്‍ കാലഘട്ടം മുതല്‍ സാഹിത്യത്തിലും എഴുത്തിലും സജീവമായിരുന്ന അഞ്ജലി, തന്റെ എഴുത്തിനോടും അറിവിനോടുമുള്ള പ്രിയമാണ് മാധ്യമ രംഗത്തേയ്ക്ക് തിരിയാന്‍ പ്രേരിപ്പിച്ചത്. മാധ്യമ മേഖലയില്‍ മൂന്ന് വര്‍ഷത്തെ പ്രവര്‍ത്തി പരിചയമുള്ള അഞ്ജലി ലൈഫ്‌സ്‌റ്റൈൽ ആണ് കൈകാര്യം ചെയ്യുന്നത്. ഇത് കൂടാതെ, പുസ്തകങ്ങളും വായനയും ഏറെ ഇഷ്ടപ്പെടുന്നു.Read More
