ഏത് തണുപ്പത്തും കുതിച്ച് പായും; ജമ്മു-ശ്രീന​ഗർ പാതയിലെ വന്ദേ ഭാരതിനുമുണ്ട് ചില പ്രത്യേകതകൾ

നിർമ്മാണം പുരോഗമിക്കുന്ന 272 കിലോമീറ്റർ ദൈർഖ്യമുള്ള ഉധംപൂർ-ശ്രീനഗർ-ബാരാമുള്ള റെയിൽ ലിങ്കിൽ (USBRL) അതിവേഗ ട്രെയിൻ ഓടും. ചെനാബ് നദിക്ക് കുറുകെയുള്ള ലോകത്തിലെ ഏറ്റവും ഉയരം കൂടിയ റെയിൽപ്പാലവും ഏറ്റവും ദൈർഘ്യമേറിയ തുരങ്കവും ഉൾപ്പെടെ താണ്ടിയാകും ഈ ട്രെയിൻ കുതിക്കുക.

ജമ്മു-ശ്രീനഗർ വന്ദേ ഭാരത് എക്‌സ്പ്രസ് യാഥാർത്ഥ്യമാകാനിരിക്കെ അതിരൂക്ഷമായ കാലാവസ്ഥ തന്നെയാണ് ഇന്ത്യൻ റെയിൽവേയ്ക്ക് ഏറ്റവും വെല്ലുവിളിയാകുന്നത്. അതിശൈത്യത്തെ നേരിടാൻ പാകത്തിന് ചെന്നൈയിലെ കോച്ച് ഫാക്ടറിയിൽ പ്രത്യേകം തയ്യാറാക്കിയ വന്ദേ ഭാരത് എക്സ്പ്രസാണ് റെയിലിലൂടെ കുതിക്കുക. ട്രെയിൻ സഞ്ചരിക്കുന്ന മേഖലയിൽ പൂജ്യം ഡിഗ്രിക്കും താഴെയാണ് കാലാവസ്ഥ റിപ്പോർട്ട് ചെയ്യുന്നത്.

ഓരോ കംപാർട്ടുമെന്റിന്റെ ഉള്ളിലും ചൂട് നിലനിർത്താനുള്ള സൗകര്യം അടക്കമാണ് ഈ കോച്ചുകൾ നിർമിക്കുന്നത്. ശൈത്യത്തിൽ ഉറഞ്ഞപോകാതിരിക്കാനും പൊട്ടാതിരിക്കാനും ശേഷിയുള്ള തരത്തിലാണ് ട്രെയിനിലെ പൈപ്പുകൾ രൂപകൽപന ചെയ്തിരിക്കുന്നത്. വന്ദേ ഭാരത് ട്രെയിനിന്റെ പുതിയ പതിപ്പുകൾ ഇറക്കുന്നതിന്റെ ഭാഗമായാണ് ഐസിഎഫ് പുതിയ നീക്കം.

അതിന് പുറമെ, ബദ്ഗാമിൽ വന്ദേ ഭാരത് ട്രെയിൻ അറ്റകുറ്റപ്പണിക്കായുള്ള സൗകര്യം നിർമിക്കുന്നുണ്ട്.
പുതിയ റെയിൽവേ ലൈൻ പ്രവർത്തനക്ഷമമായാൽ വന്ദേ ഭാരത് ട്രെയിനുകൾ ശ്രീനഗറിലേക്കും എത്തുമെന്ന് നേരത്തെ കേന്ദ്ര റെയിൽവേ മന്ത്രി അശ്വിനി വൈഷ്ണവ് സായ് വ്യക്തമാക്കിയിരുന്നു. വന്ദേ ഭാരത് ട്രെയിനുകൾ പുതിയ യുഎസ്ബിആർഎൽ വഴി ഓടുമെന്ന് അദ്ദേഹം പറഞ്ഞു.

11 മാസങ്ങൾകൊണ്ട് കേബിൾ കൊണ്ടുണ്ടാക്കിയ റെയിൽപ്പാലം പ്രവർത്തനസജ്ജമാക്കിയത് വാർത്തയായിരുന്നു. 96 കേബിളുകൾ ഉപയോഗിച്ച് ഒറ്റത്തൂണിലാണ് അഞ്ചിഖഡ് റെയിൽപ്പാലം തീർത്തിരിക്കുന്നത്. കാശ്മീരിലെ കട്റ-റേസി എന്നീ ജില്ലകളെ ബന്ധിപ്പിക്കുന്നതാണ് ഈ പാലം. 653 കിലോമീറ്റർ നീളമുള്ള കേബിളുകൾ ഉപയോഗിച്ചാണ് ഇത് നിർമിച്ചിരിക്കുന്നത്.

Also Read : ചന്ദ്രയാൻ കാലുകുത്തിയത് ഇങ്ങനെ; ലാൻ‍ഡിങ് വീഡിയോ പങ്കുവച്ച് ഇസ്രോ

ഇന്ത്യൻ റെയിൽവേ നിർമിക്കുന്നതിലെ ഏറ്റവും സങ്കീർണമായ പാതയാണ് ഉദ്ധംപുർ – ശ്രീനഗർ – ബാരാമുള്ള റെയിൽ ലിങ്ക്. ഈ പാത പൂർത്തിയാകുന്നതോടെ കശ്മീർ താഴ്‍വരയിലേക്കുള്ള ട്രെയിൻ ഗതാഗതം ബന്ധിപ്പിക്കാൻ സാധിക്കും. നിലവിൽ ബാരമുള്ളയിൽ നിന്നും ബനിഹാളിലേക്കുള്ള 118 കിലോമീറ്റർ റെയിൽ ലൈൻ മാത്രമാണ് പ്രവർത്തനമുള്ളത്. ഈ വർഷം ഡിസംബർ – ജനുവരി മാസത്തോടെ ജമ്മു ശ്രീനഗർ ലിങ്ക് റോഡ് പൂർത്തിയാക്കാൻ സാധിക്കുമെന്നാണ് കരുതുന്നത്.

കശ്മീർ താഴ്വര കൂടി ഇന്ത്യൻ റെയിൽവേയുടെ ശൃംഘലയിൽ എത്തുന്നതോടെ താഴ്വരയിലേക്ക് ഗതാഗതം സുഗമമാകും.

Read Latest National News and Malayalam News