എന്താണ് ജെ-സ്ലാബ് ട്രാക്ക് സിസ്റ്റം? ഇന്ത്യയിൽ ഇതാദ്യം: മുംബൈ-അഹ്മദാബാദ് ബുള്ളറ്റ് ട്രെയിൻ ട്രാക്ക് ജോലി തുടങ്ങി

എന്താണ് ജെ സ്ലാബ് ട്രാക്ക് സിസ്റ്റം?

സാധാരണ റെയിൽവേ ട്രാക്കുകൾ നമുക്ക് സുപരിചിതമാണ്. കരിങ്കൽ കഷണങ്ങൾ കൂമ്പാരമാക്കിയിട്ട് അതിനു മുകളിൽ സ്ലീപ്പറുകൾ സ്ഥാപിക്കുന്നു. അതിന്മേലാണ് റെയിലുകൾ സ്ഥാപിക്കുക. ഇതിനെ ‘ബല്ലാസ്റ്റഡ് ട്രാക്ക്’ എന്നും വിളിക്കും. ഈ ട്രാക്ക് സിസ്റ്റം കാര്യക്ഷമമാണെങ്കിലും അതിവേഗ പാതകൾക്ക് അത്ര ഉത്തമമല്ല. കരിങ്കൽച്ചീളുകൾ തമ്മിൽ ഉറപ്പോടെ ബന്ധപ്പെട്ടു നിൽക്കുകയും, അതിനു മുകളിലായി പാകിയ സ്ലീപ്പറുകൾ ആവശ്യമായ ഇലാസ്തികത നൽകുകയും ചെയ്യും എന്നതാണ് ബല്ലാസ്റ്റഡ് ട്രാക്കുകളുടെ ഗുണം. എന്നാൽ ഈ ഗുണങ്ങൾ ഇതിനെക്കാൾ മെച്ചപ്പെട്ട രീതിയിൽ നൽകാൻ ജപ്പാൻകാർ കണ്ടുപിടിച്ച ജെ സ്ലാബ് ട്രാക്ക് സിസ്റ്റത്തിന് കഴിയും. പൂർണ്ണമായും കോൺക്രീറ്റിലാണ് ഈ ട്രാക്ക് ബെഡ്ഡിന്റെ നിർമ്മാണം. ഹൈസ്പീഡ് ട്രെയിനുകൾ ഓടിക്കണമെങ്കിൽ നിലവിൽ ഈ ട്രാക്കുകളാണ് ആശ്രയമെന്ന നിലയിലേക്ക് ജാപ്പനീസ് സാങ്കേതികത വളർന്നിട്ടുണ്ട്.

ഈ സാങ്കേതികതയുടെ മറ്റൊരു പ്രത്യേകത മെയിന്റനൻസ് താരതമ്യേന കുറവാണ് എന്നതാണ്. പരമ്പരാഗത ബല്ലാസ്റ്റഡ് ട്രാക്കുകൾ പെട്ടെന്നുതന്നെ കേടുകൾ ബാധിക്കാനിടയുണ്ട്. മെറ്റൽ ചീളുകൾക്കിടയിൽ പുല്ല് വളരുകയും ട്രാക്ക് ബെഡ്ഡിനെ അവ അസ്ഥിരപ്പെടുത്തുകയും ചെയ്യാം. ഇതെല്ലാം സമയാസമയങ്ങളിൽ മനുഷ്യർ ഇടപെട്ട് ശരിയാക്കിക്കൊണ്ടിരിക്കണം. എന്നാൽ, ബല്ലാസ്റ്റഡ്‌ലെസ് ട്രാക്കിൽ ഈ പ്രശ്നം വരുന്നില്ല.

ജപ്പാനിൽ ആദ്യത്തെ ബുള്ളറ്റ് ട്രെയിൻ 1964ൽ നിലവിൽ വന്നപ്പോൾ അത് ഓടിയിരുന്നത് പരമ്പരാഗത ബല്ലാസ്റ്റഡ് ട്രാക്കിലായിരുന്നു. ഈ ട്രാക്ക് കാര്യക്ഷമമല്ലെന്ന് ജപ്പാൻ തിരിച്ചറിയുകയും പിന്നീട് ജെ സ്ലാബ് സിസ്റ്റം വികസിപ്പിച്ചെടുത്ത് അതിലേക്ക് മാറുകയുമായിരുന്നു.

ജെ സ്ലാബ് സിസ്റ്റത്തിന് പ്രാരംഭ ചെലവ് കൂടുതലാണ്. എന്നാൽ പിന്നീടുള്ള ചെലവുകൾ വളരെ കുറവും. വയഡക്ടുകളിലും തുരങ്കങ്ങളിലും പാളങ്ങൾ നിർമ്മിക്കുമ്പോൾ ഈ സംവിധാനമേ ഉപയോഗിക്കാനാകൂ എന്നുമുണ്ട്.

ഇന്ത്യ പഠിക്കുന്നു, ജപ്പാനിൽനിന്ന്

ജപ്പാൻ വികസിപ്പിച്ചെടുത്ത ഈ സാങ്കേതികത ഇന്ത്യ പഠിച്ചെടുക്കുകയാണ്. ഇതിനായി കഴിഞ്ഞ മെയ് മാസത്തിൽ 1000 എൻജിനീയർമാരെ നമ്മൾ ജപ്പാനിലേക്ക് പറഞ്ഞയയ്ക്കുകയും ചെയ്തു. ഇവർ തിരിച്ചുവന്നാണ് സൂറത്തിലെ ട്രാക്ക് പണികൾ തുടങ്ങിയിരിക്കുന്നത്.

ട്രാക്ക് ജോലികൾക്കായുള്ള കരാറുകൾ ഭാഗികമായി നൽകിക്കഴിഞ്ഞിട്ടുണ്ട്. ഗുജറാത്തിന്റെ ഭാഗത്തെ ജോലികളുടെ കരാറുകളാണ് നൽകിയത്. ഇതിനായുള്ള അസംസ്കൃത വസ്തുക്കളുടെ ശേഖരണമാണ് ഇപ്പോൾ നടക്കുന്നത്. ഇതും ഏതാണ്ട് പൂർത്തിയായി വരികയാണ്. 14,000 മെട്രിക് ടൺ ജെഐഎസ് റെയിലുകളും, ട്രാക്ക് സ്ലാബുകൾ നിർമ്മിക്കാനുള്ള 50 അച്ചുകളും ജപ്പാനിൽ നിന്ന് എത്തിക്കഴിഞ്ഞതായി റിപ്പോർട്ടുകൾ പറയുന്നു.