ഹൂഗ്ലി നദിയുടെ ആഴപരപ്പിലാണ് ഈ വിസ്മയ പാത തയ്യാറായിരിക്കുന്നത്. രാജ്യത്തെ പ്രഥമ മെട്രോ നിലവില്‍ വന്ന കൊല്‍ക്കത്ത മെട്രോയുടെ ഭാഗമായാണ് ആദ്യ ജലാന്തര്‍ മെട്രോയും സര്‍വീസ് ആരംഭിക്കാന്‍ പോകുന്നതെന്ന പ്രത്യേകതയും ഉണ്ട്. ലണ്ടനിലാണ് ലോകത്തെ ആദ്യത്തെ ജലാന്തര്‍ മെട്രോ വരുന്നത്. 1843ല്‍ നിര്‍മ്മിച്ച തേംസ് ടണല്‍. 0.4 കിലോമീറ്ററാണ് പാതയുടെ ദൂരം. റഷ്യയിലെ ഗോത്താര്‍ഡ് ബേസ് ടണല്‍ പാതയും ജലാന്തര്‍ മെട്രോ സര്‍വീസിന് പേരുകേട്ടതാണ്. 2024 ആദ്യത്തിൽതന്നെ ജലാന്തര്‍ മെട്രോ സര്‍വീസ് രാജ്യത്ത് ആരംഭിക്കുമെന്നാണ് പ്രതീക്ഷിക്കപ്പെടുന്നത്.
സ്വപ്‌നസാക്ഷാത്കാരത്തിന്റെ വഴികള്‍
2023 ഏപ്രിലില്‍ തന്നെ കൊല്‍ക്കത്തയിലെ സെന്‍ട്രല്‍ ബിസിനസ് ഡിസ്ട്രിക്റ്റിലെ (സിബിഡി) എസ്പ്ലനേഡ് മെട്രോ സ്റ്റേഷനില്‍ നിന്ന് ഹൂഗ്ലി വഴി ഈസ്റ്റ്-വെസ്റ്റ് മെട്രോയുടെ ഹൗറ മൈതാന്‍ ടെര്‍മിനല്‍ സ്റ്റേഷനിലേക്ക് ആറ് കോച്ചുകളുള്ള രണ്ട് റേക്കുകള്‍ എത്തിച്ചു. ഈ റേക്കുകള്‍ ഉപയോഗിച്ച് പരീക്ഷണാടിസ്ഥാനത്തില്‍ സര്‍വീസ് നടത്തുന്നത് ഇതിനകം ആരംഭിച്ചുകഴിഞ്ഞു. ഇപ്പോള്‍ നടക്കുന്നത് സിഗ്‌നലുകള്‍, വെന്റിലേഷന്‍, പ്ലാറ്റ്‌ഫോം സ്‌ക്രീന്‍ ഡോറുകള്‍, ഫയര്‍ അലാറം സംവിധാനങ്ങള്‍ തുടങ്ങിയവ പ്രവര്‍ത്തനയോഗ്യമാക്കുന്ന പ്രവൃത്തികളാണ്. മേല്‍പ്പറഞ്ഞ എല്ലാ സംവിധാനങ്ങളും സമന്വയിപ്പിച്ചുകഴിഞ്ഞാല്‍ മെട്രോയുടെ സര്‍വീസ് ആരംഭിക്കുന്നതിന് സുരക്ഷാ റെഗുലേറ്ററിന്റെ അനുമതി ലഭിക്കണം.
520 മീറ്ററാണ് ജലാന്തര്‍ മെട്രോ ടണലിന്റെ ദൂരം. ഈസ്റ്റ്-വെസ്റ്റ് മെട്രോ ഇടനാഴിയുടെ ഭാഗമായാണ് ജലാന്തര്‍ മെട്രോ സര്‍വീസ് വരുന്നത്. 10,000 കോടി ചെലവ് വരുന്ന പദ്ധതിയാണ് ഈസ്റ്റ്-വെസ്റ്റ് മെട്രോ ഇടനാഴി. പദ്ധതി നടപ്പാക്കുന്നത് കേന്ദ്ര-സംസ്ഥാന സര്‍ക്കാരുകളാണ്. നടത്തിപ്പ് ചുമതല കൊല്‍ക്കത്ത മെട്രോ റെയില്‍ കോര്‍പ്പറേഷനുമാണ് (കെഎംആര്‍സി).
പദ്ധതിവിഹിതത്തിന്റെ ഒരുഭാഗം നല്‍കുന്നത് ജപ്പാനാണ്. അടുത്തവര്‍ഷം ആദ്യം ജലാന്തര്‍ സര്‍വീസ് ആരംഭിച്ചാല്‍ പദ്ധതിയുടെ നേതൃനിരയിലുള്ളവര്‍ക്ക് അഭിമാനിക്കാം. അതേസമയം, 520 മീറ്റര്‍ വരുന്ന ജലാന്തര്‍പാതയുടെ റേക്കുകള്‍ തയ്യാറായിട്ട് ആറ് വര്‍ഷമെങ്കിലും കഴിഞ്ഞിട്ടുണ്ട്. അന്നുമുതല്‍ പദ്ധതി യാഥാര്‍ത്ഥ്യമാവുന്നതും കാത്തിരിക്കുകയായിരുന്നു ജനം. പദ്ധതി പ്രാബല്യത്തില്‍ വരുന്നതോടെ, ഒരു മിനിറ്റിനുള്ളില്‍ നിങ്ങള്‍ക്ക് ജലോപരിതലത്തില്‍ നിന്ന് 12 നിലകളുടെ ആഴത്തിലേക്ക് പോകാനും നദി മുറിച്ചുകടക്കാനും സാധിക്കുമെന്നും കൊല്‍ക്കത്ത മെട്രോ റെയില്‍ കോര്‍പ്പറേഷന്റെ (കെഎംആര്‍സി) എഞ്ചിനീയര്‍ പറയുന്നു. അതേസമയം, യാത്രക്കാര്‍ക്ക് വെള്ളത്തിനടിയിലാണെന്ന തോന്നല്‍ ഉണ്ടാവില്ലെന്നും അദ്ദേഹം പറയുന്നു. ലണ്ടന്‍, പാരീസ് എന്നിവിടങ്ങളുലെ നദികളിൽ നിർമ്മിച്ച മെട്രോ തുരങ്കങ്ങള്‍ക്ക് സമാനമായ നിര്‍മാണമാണെന്ന് സാരം.
അത്ഭുതപാതയുടെ നിര്‍മാണം
ഗ്രീന്‍ ലൈന്‍ അല്ലെങ്കില്‍ ലൈന്‍ 2 എന്നും അറിയപ്പെടുന്ന പുതിയ ഈസ്റ്റ്-വെസ്റ്റ് മെട്രോ പാതയുടെ നീളം 16.6 കിലോമീറ്ററാണ്. നിലവില്‍ ഓടുന്ന പാതയുടെ ദൈര്‍ഘ്യം 9.4 കിലോമീറ്റര്‍ നീളം മാത്രമാണ്. കാരണം നിലവില്‍ ഈസ്റ്റ്-വെസ്റ്റ് മെട്രോ പാത കിഴക്കന്‍ കൊല്‍ക്കത്തയിലെ സെക്ടര്‍ 5നും ഏഷ്യയിലെ ഏറ്റവും തിരക്കേറിയ റെയില്‍വേ സ്റ്റേഷനുകളിലൊന്നായ സീല്‍ദായ്ക്കും ഇടയിലാണ് ഓടുന്നത്. പാത വികസിപ്പിക്കുന്നതിന്റെ ഭാഗമായാണ് ജലാന്തര്‍ മെട്രോ അടക്കമുള്ളവ വരുന്നതും. ഇപ്പോള്‍ പ്രതിദിനം 50,000 യാത്രക്കാരാണ് ഈ മെട്രോ സര്‍വീസ് ഉപയോഗിക്കുന്നത്. എന്നാല്‍ ജലാന്തര്‍ സര്‍വീസ് കൂടി വരുന്നതോടെ യാത്രക്കാരുടെ എണ്ണത്തില്‍ വന്‍ വര്‍ധനയാണ് പ്രതീക്ഷിക്കുന്നത്.
ജലാന്തര്‍ മെട്രോയുടെ ചരിത്രം
2010ല്‍ ആണ് നദി തുരങ്കങ്ങള്‍ നിര്‍മ്മിക്കുന്നതിനുള്ള കരാര്‍ കൊല്‍ക്കത്ത മെട്രോ റെയില്‍ കോര്‍പ്പറേഷന്‍ നിര്‍മാണ കമ്പനിയ്ക്ക് നല്‍കുന്നത്. നിര്‍മ്മാണ കമ്പനിയായ അഫ്കോണ്‍സാണ് കരാര്‍ നേടിയത്. എന്നാല്‍ അഫ്കോണ്‍സ് തനിച്ചല്ല ഈ നിര്‍മാണം പൂര്‍ത്തിയാക്കിയത്. അവര്‍ സഹപങ്കാളിയായി ഇറാനില്‍ കടലിനടിയില്‍ റോഡ് നിര്‍മ്മിച്ച അനുഭവസമ്പത്തുള്ള റഷ്യന്‍ കമ്പനിയായ ട്രാന്‍സ്ടോണെല്‍സ്‌ട്രോയെയും ചേര്‍ത്തു. ഹൂഗ്ലി നദിക്കടിയിലൂടെയുള്ള തുരങ്കങ്ങള്‍ 2017ലാണ് ഇരുകമ്പനികളും ചേര്‍ന്ന് നിര്‍മിച്ചത്. 67 ദിവസങ്ങളെടുത്ത നിര്‍മാണം 2017 ജൂലൈയില്‍ പൂര്‍ത്തിയായി.
ഒഴുക്കുള്ള നദിയുടെ അടിത്തട്ടില്‍ നിന്ന് ആയിരക്കണക്കിന് ടണ്‍ ചെളി നീക്കം ചെയ്ത ശേഷമാണ് മെട്രോ റെയിലിനുള്ള ട്രാക്കുകള്‍ നിര്‍മിച്ചത്. ജലോപരിതലത്തില്‍ നിന്ന് 26 മീറ്റര്‍ അടിയിലായാണ് തുരങ്കത്തിന്റെ അടിത്തട്ടുള്ളത്.
120 വര്‍ഷമാണ് ഈ തുരങ്കങ്ങളുടെ ആയുസ്സ് കണക്കാക്കുന്നത്. വാട്ടര്‍പ്രൂഫിംഗ് അടക്കമുള്ളവ വലിയ വെല്ലുവിളിയായിരുന്നു. അതേസമയം തുരങ്കങ്ങളുടെ കോണ്‍ക്രീറ്റിന് ഇടയില്‍ ഹൈഡ്രോഫിലിക് ഗാസ്‌കറ്റുകള്‍ ഉണ്ട്. ടണലുകളില്‍ വെള്ളം കയറിയാല്‍ ഞൊടിയിടിയില്‍ ഈ ഗാസ്‌കറ്റുകള്‍ തുറക്കും. അതിനാല്‍ നദിക്കടിയിലെ തുരങ്കങ്ങളില്‍ ഒരു തുള്ളി വെള്ളം പോലും പ്രവേശിക്കില്ലെന്നും നിര്‍മാണ പ്രവര്‍ത്തിയുടെ ഭാഗമായിരുന്ന എന്‍ജിനീയര്‍മാര്‍ പറയുന്നു.
ഭൂകമ്പസാധ്യതാ മേഖലകളിലൊന്നാണ് കൊല്‍ക്കത്ത. അതിനാല്‍ ഭൂകമ്പങ്ങളെ ചെറുക്കാന്‍ സാധിക്കുന്ന തരത്തിലാണ് ജലാന്തര്‍ മെട്രോ നിര്‍മാണം എന്നതും ശ്രദ്ധേയമാണ്. നിര്‍മാണസമയത്ത് ടണല്‍ ബോറിംഗ് മെഷീന്റെ കട്ടിംഗ് ചേമ്പറില്‍ പ്രവേശിക്കാനായി പരിചയസമ്പന്നരായ ടണല്‍ ക്രൂവിനെ അഫ്കോണ്‍സ് രംഗത്തെത്തിച്ചിരുന്നു. ടണല്‍ ബോറിംഗ് മെഷീന്‍ ഭാഗത്ത് വെള്ളം കയറിയാല്‍ സുരക്ഷാപ്രശ്‌നം ഉണ്ടാവില്ലെന്ന് ഉറപ്പുവരുത്താനായിരുന്നു ഇത്. ഒന്നുകൂടി വ്യക്തമായി പറഞ്ഞാല്‍, സാധാരണ തുരങ്കനിര്‍മ്മാണവും ജലാന്തര്‍ തുരങ്ക നിര്‍മാണവും വ്യത്യസ്തമാണ്. വെള്ളത്തിനടിയില്‍ തുരങ്കം നിര്‍മിക്കാനാരംഭിച്ചാല്‍ പിന്നെ ഇടയില്‍ നിര്‍ത്താന്‍ സാധിക്കില്ല. അത് തുടര്‍ന്നുപോയില്ലെങ്കില്‍ ചോര്‍ച്ചയ്ക്കും മറ്റുപല പ്രശ്നങ്ങള്‍ക്കും വഴിയൊരുക്കും. അതിനാല്‍ 24 മണിക്കൂറും വീക്ക്‌ലി അവധിയില്ലാതെ പ്രവൃത്തികള്‍ നടക്കുന്നതിനായി ജീവനക്കാരെ വിന്യസിച്ചിരുന്നു.
നദിയുടെ ആഴവും തുരങ്കത്തിന്റെ ഗ്രേഡിയന്റ് അഥവ ഉയര്‍ച്ച-താഴ്ച തോത് പൊരുത്തപ്പെടുന്നതിന്, അഫ്കോണ്‍സിന് 30 മീറ്റര്‍ ആഴത്തില്‍ വരെ ഹുഗ്ലി നദിയില്‍ കുഴിക്കേണ്ടി വന്നു. ഒപ്പം, രാജ്യത്തെ ഏറ്റവും ആഴത്തിലുള്ള വെന്റിലേഷന്‍ ഷാഫ്റ്റും നിര്‍മ്മിച്ചു. 43.5 മീറ്റര്‍ താഴെയാണിതുള്ളത്. 2020ല്‍, കൊവിഡ് മഹാമാരി കാലത്താണ് അഫ്കോണ്‍സ് ഈ വെന്റിലേഷന്‍ ഷാഫ്റ്റ് പൂര്‍ത്തിയാക്കിയത് ഇത് തുരങ്കങ്ങളിലേക്കും പുറത്തേക്കും വായു പമ്പ് ചെയ്യുകയും അടിയന്തര ഘട്ടങ്ങളില്‍ യാത്രക്കാരെ ഒഴിപ്പിക്കാന്‍ ഉപയോഗിക്കുകയും ചെയ്യും. ചുരുക്കത്തില്‍ രാജ്യത്തെ കൗതുകകമായ നിര്‍മാണങ്ങളിലൊന്ന് കൂടിയായി മാറുകയാണ് ഈ അണ്ടര്‍വാട്ടര്‍ മെട്രോ
