ഇറാന്‍ നാവിക സേനയുടെ ഏറ്റവും വലിയ കപ്പലിന് തീപിടിച്ചു; ഒമാൻ ഉൾക്കടലില്‍ മുങ്ങി

ടെഹ്‌റാന്‍: ഇറാൻ നാവികസേനയുടെ ഏറ്റവും വലിയ കപ്പൽ തീപിടിച്ച് മുങ്ങി. ഒമാൻ ഉൾക്കടലിലാണ് സംഭവമെന്ന് വിവിധ ഏജൻസികളെ ഉദ്ധരിച്ച് അസോസിയേറ്റഡ് പ്രസാണ് റിപ്പോർട്ട് ചെയ്തത്. തീപിടിത്തത്തിന്‍റെ കാരണം വ്യക്തമല്ല.

ബുധനാഴ്ച പുലർച്ചെ 2.25 ഓടെയാണ് കപ്പൽ മുങ്ങിയതെന്നാണ് അസോസിയേറ്റഡ് പ്രസ് റിപ്പോർട്ട് ചെയ്യുന്നത്. തീയണക്കാനുള്ള ശ്രമങ്ങൾ നടന്നെങ്കിലും വിജയിച്ചിരുന്നില്ല. ടെഹ്റാനിൽ നിന്ന് തെക്കുകിഴക്ക് 1270 കിലോമീറ്റർ അകലെയാണ് കപ്പൽ മുങ്ങിയത്. കപ്പൽ മുങ്ങുന്ന ചിത്രങ്ങൾ ഇറാനിയൻ സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്.

Also Read : മകന് അപൂർവരോഗം; ദയാവധം തേടി അമ്മ കോടതിയിൽ; മടങ്ങുംവഴി ഒമ്പത് വയസ്സുകാരൻ മരിച്ചു



ചൊവ്വാഴ്ച ഉച്ചയ്ക്ക് ശേഷമാണ് കപ്പലിൽ തീപിടുത്തമുണ്ടാകുന്നത്. ഏകദേശം 20 മണിക്കൂറോളം തീ അണക്കാനുള്ള ശ്രമങ്ങൾ നടത്തിയെങ്കിലും വിജയം കണ്ടില്ല. തുടർന്ന് ബുധനാഴ്ച പുലർച്ചെയോടെ കപ്പൽ മുങ്ങുകയായിരുന്നെന്നാണ് റിപ്പോർട്ട്. തീ അണയ്ക്കാൻ ശ്രമിക്കുന്നതിന് മുമ്പ് തന്നെ എല്ലാ ക്രൂ അംഗങ്ങളെയും രക്ഷപ്പെടുത്തിയിരുന്നു.

Also Read : വളർത്തു നായ്ക്കളെ ആക്രമിച്ച് കരടി; സധൈര്യം നേരിട്ട് പതിനേഴുകാരി, വീഡിയോ വൈറൽ



ലൈഫ് ജാക്കറ്റുകൾ ധരിച്ച് നാവികർ കപ്പലിൽ നിന്ന് രക്ഷപ്പെടുന്ന ചിത്രങ്ങളും പുറത്തുവന്നവയിൽ ഉണ്ടെന്നാണ് റിപ്പോർട്ട്. അതേസമയം പരിശീലന കപ്പലാണ് മുങ്ങിയതെന്നാണ് ഔദ്യോഗിക മാധ്യമങ്ങള്‍ വിശദീകരിക്കുന്നത്. കപ്പലിൽ നിന്ന് പുക ഉയരുന്ന ദൃശ്യങ്ങൾ വാർത്ത ഏജൻസികൾ പുറത്തുവിട്ടിട്ടുണ്ട്. 1977ല്‍ ബ്രിട്ടന്‍ നിര്‍മിച്ച കപ്പല്‍ 1984ലാണ് ഇറാന്‍ നാവികസേനയുടെ ഭാഗമാകുന്നത്.