ബൈഡനും സുനകും അടക്കമുള്ള ലോകനേതാക്കൾ നാളെ എത്തും; വിശദാശങ്ങൾ അറിയാം

ഡൽഹിയിലെ ഭാരത് മണ്ഡപം കൺവെൻഷൻ സെന്ററിൽ നടക്കുന്ന പരിപാടിയിൽ സമ്പദ്‌വ്യവസ്ഥ, പരിസ്ഥിതി, സുസ്ഥിര വികസനം തുടങ്ങിയ നിർണായക വിഷയങ്ങളിൽ ചർച്ചകൾ നടക്കും. അതേസമയം, ഉച്ചകോടിയിൽ ചൈനീസ് പ്രസിഡന്റ് ഷി ജിൻപിങ്ങും റഷ്യൻ പ്രസിഡന്റ് വ്ലാഡിമർ പുടിനും പങ്കെടുക്കില്ലെന്നാണ് റിപ്പോർട്ടുകൾ. പ്രമുഖ ലോകനേതാക്കൾ നാളെ തന്നെ ഡൽഹിയിൽ എത്തിച്ചേരുമെന്നാണ് റിപ്പോർട്ടുകൾ.

ഋഷി സുനക്

ഉച്ചകോടിയിൽ പങ്കെടുക്കാൻ ഇന്ത്യയിലേക്ക് ആദ്യം എത്തുന്നവരിൽ പ്രമുഖൻ യുകെ പ്രധാനമന്ത്രി ഋഷി സുനാക്കാണ്. ബ്രിട്ടനിലെ ആദ്യ ഇന്ത്യൻ വംശജനായ പ്രധാനമന്ത്രി എന്ന നിലയിൽ ശ്രദ്ധേയനായ സുനക് വെള്ളിയാഴ്ച ഉച്ചയ്ക്ക് 1.40 ന് ഡൽഹിയിൽ വിമാനമിറങ്ങും. കേന്ദ്ര സഹമന്ത്രി അശ്വിനി കുമാർ ചൗബെയാണ് അദ്ദേഹത്തെ സ്വീകരിക്കുക.

ഇന്ത്യയിലെത്തുന്നതിന് മുന്നോടിയായി സുനക് പ്രധാനമന്ത്രി നരേന്ദ്ര മോദിയെ പ്രശംസിച്ച് രംഗത്തുവന്നിരുന്നു. “കഴിഞ്ഞ വർഷം പ്രധാനമന്ത്രി മോദിയുടെ നേതൃത്വത്തിന് ഞാൻ കൃതജ്ഞത അർപ്പിക്കുന്നു, ഇന്ത്യ ഇത്തരത്തിൽ ആഗോള നേതൃത്വം കാണിക്കുന്നത് അത്ഭുതകരമാണ്,” അദ്ദേഹം കുറിച്ചു.

ജപ്പാൻ പ്രധാനമന്ത്രി

സുനകിന് പിന്നാലെ ഇന്ത്യയിലേക്ക് എത്തുന്ന മറ്റൊരു ലോകനേതാവ് ജാപ്പനിസ് പ്രധാനമന്ത്രി ഫൂമിയോ കിഷിണ്ടയാണ്. പാലാം എയർ ഫോഴ്സ് സ്റ്റേഷനിൽ ഉച്ചതിരിഞ്ഞ് 2.15നാണ് അദ്ദേഹം വിമാനമിറങ്ങുക. കേന്ദ്ര സഹമന്ത്രി അശ്വിനി കുമാർ ചൗബെ തന്നെയാണ് അദ്ദേഹത്തേയും സ്വീകരിക്കുക. ‌‌

കിഷിണ്ടയുടെ രണ്ടാമത്തെ ഇന്ത്യൻ സന്ദർശനമാണിത്. ഈ വർഷം മാർച്ചിൽ അദ്ദേഹം രണ്ട് ദിവസത്തെ സന്തർശനത്തിനായി അദ്ദേഹം ഇന്ത്യയിൽ എത്തിയിരുന്നു. ഈ യാത്രയിൽ അദ്ദേഹം പ്രധാനമന്ത്രി മോദിയുമായി കൂടിക്കാഴ്ച നടത്തുകയും
ഇന്ത്യ-ജപ്പാൻ ബന്ധം ശക്തിപ്പെടുത്തുന്നതിനെക്കുറിച്ച് ചർച്ച ചെയ്യുകയും ചെയ്തിരുന്നു.

യുഎസ്

കൂട്ടത്തിലെ ഏറ്റവും പ്രമുഖനായി കരുതുന്നത് യുഎസ് പ്രസിഡന്റ് ജോ ബൈഡൻ്റെ വരവാണ്. വെള്ളിയാഴ്ച വൈകിട്ട് 6.55നാകും അദ്ദേഹം എത്തും. അദ്ദേഹത്തെ സ്വാഗതം ചെയ്യാൻ കേന്ദ്ര സഹമന്ത്രി ജനറൽ (റിട്ട) വി കെ സിംഗ് വിമാനത്താവളത്തിലെത്തും.

അദ്ദേഹത്തിന്റെ ഭാര്യയും യുഎസ് പ്രഥമ വനിതയുമായ ജിൽ ബൈഡന് കൊവിഡ് -19 സ്ഥിരീകരിച്ചതോടെ ഉച്ചകോടിയിൽ പങ്കെടുക്കാൻ എത്തുമോ എന്നതിൽ വ്യക്തത ഇല്ല.

ജസ്റ്റിൻ ട്രൂഡോ

കനേഡിയൻ പ്രധാനമന്ത്രി ജസ്റ്റിൻ ട്രൂഡോയാണ് നാളത്തെ മറ്റൊരു അതിഥി. രാത്രി ഏഴ് മണിക്ക് വിമാനമിറങ്ങുന്ന അദ്ദേഹത്തെ കേന്ദ്ര സഹമന്ത്രി രാജീവ് ചന്ദ്രശേഖർ ആണ് സ്വീകരിക്കുക.

നിരവധി പ്രവാസി ഇന്ത്യാക്കാരുള്ള രാജ്യത്തിലെ ഖാലിസ്ഥാനി വിഘടനവാദ ഗ്രൂപ്പുകളുടെ പ്രവർത്തനങ്ങളുടെ പശ്ചാത്തലത്തിൽ ഇന്ത്യയും കാനഡയും തമ്മിലുള്ള ബന്ധം വഷളായ സമയത്താണ് ട്രൂഡോയുടെ ഇന്ത്യൻ സന്ദർശനം. ഇന്ത്യയുമായുള്ള ഒരു നിർദ്ദിഷ്ട വ്യാപാര ഉടമ്പടിക്കായുള്ള ചർച്ചകൾ കാനഡ അപ്രതീക്ഷിതമായി താൽക്കാലികമായി നിർത്തിയിരുന്നു.

ചൈന

അതിർത്തി പ്രശ്നങ്ങൾ രൂക്ഷമായിരിക്കെയാണ് ചൈനയുടെ പ്രധാനമന്ത്രി ലി ക്വിങ്ങ് ഇന്ത്യയിലേക്ക് എത്തുന്നത്. പ്രസിഡന്റ് ഷി ജിൻപിങ്ങിന്റെ അസാന്നിധ്യത്തിലാണ് അദ്ദേഹത്തിന്റെ പ്രതിനിധിയായി പ്രധാനമന്ത്രി എത്തുന്നത്. രാത്രി 7.45നാണ് അദ്ദേഹം എത്തുക.

ഷി ജിൻപിംഗ് ഉച്ചകോടിയിൽ നിന്നും ഒഴിവായത് അസാധാരണമായ നീക്കമല്ലെന്നും യോഗത്തിൽ സമവായ പ്രസ്താവന ഉണ്ടാക്കുന്നതിനുള്ള ചർച്ചകളെ ബാധിക്കില്ലെന്നും വിദേശകാര്യ മന്ത്രി എസ് ജയശങ്കർ വ്യക്തമാക്കിയിരുന്നു. അതിന് പുറമെ, അരുണാചൽ പ്രദേശും അക്സായി ചിൻ പീഠഭൂമിയും ചൈനയുടെ പ്രദേശമാണെന്ന് കാണിച്ച് ബെയ്ജിംഗ് പുറത്തിറക്കിയ പുതിയ ഭൂപടം ഇരു രാജ്യങ്ങളും തമ്മിലുള്ള സംഘർഷം കൂടുതൽ വഷളാക്കിയിരുന്നു.

Also Read : അഫ്ഗാൻ അതിർത്തിയിൽ ഏറ്റുമുട്ടൽ; നാല് പാക് സൈനികരെ താലീബാൻ ഭീകരർ കൊലപ്പെടുത്തി

ഇവർക്ക് പുറമെ, അർജന്റീന, ഇറ്റലി, സൗത്ത് ആഫ്രിക്ക, അറബ് യൂണിയൻ, ബംഗ്ലാദേശ്, സൗദി അറേബ്യ, നൈജീരിയ, റിപ്പബ്ലിക് ഓഫ് കൊറിയ, ഈജിപ്റ്റ്, ഓസ്ട്രേലിയ, യുഎഇ, നെതർലാൻഡ്സ്, ബ്രസീൽ, ഇന്തോനേഷ്യ, തുർക്കി, സ്പെയിൻ, ജർമനി, ഫ്രാൻസ്, മൗറീഷ്യസ്, യൂറോപ്യൻ യൂണിയൻ, സിങ്കപ്പൂർ എന്നീ രാജ്യങ്ങളും ഉച്ചകോടിയിൽ പങ്കെടുക്കാൻ ഇന്ത്യയിലെത്തും