പിതാവിനെ പിന്നിലിരുത്തി 1200 കി.മീ സൈക്കിൾ ചവിട്ടിയ ജ്യോതിയെ ഓർമ്മയില്ലേ? ആ അച്ഛൻ മരിച്ചു

പറ്റ്ന: കഴിഞ്ഞവർഷത്തെ ലോക്ക് ഡൗൺ സമയത്ത് രാജ്യത്തിന്‍റെ ശ്രദ്ധ നേടിയ ‘സൈക്കിൾ ഗേൾ‘ ജ്യോതിയുടെ പിതാവ് അന്തരിച്ചു. ബിഹാറിലെ ദർബംഗയിലെ വീട്ടിൽ വെച്ച് ഹൃദയാഘാതത്തെ തുടർന്നാണ് മോഹൻ പാസ്വാൻ വിടപറഞ്ഞത്. 2020 മെയ് മാസത്തിൽ രാജ്യം ലോക്ക് ഡൗണിലൂടെ കടന്ന് പോകുന്നതിനിടെയായിരുന്നു പരിക്കേറ്റ് എഴുന്നേൽക്കാൻ കഴിയാതിരുന്ന അച്ഛനെ പിന്നിലിരുത്തി ജ്യോതി 1200 കിലോമീറ്റർ സൈക്കിൾ ചവിട്ടിയത്.

ഹരിയാനയിലെ ഗുരുഗ്രാമിൽ നിന്ന് ദർബംഗ വരെയാണ് ജ്യോതികുമാരി എന്ന പതിനഞ്ചുകാരി അച്ഛനെ പിന്നിലിരുത്തി സൈക്കിൾ ചവിട്ടി എത്തിയത്. യാത്ര കഴിഞ്ഞ് ഏതാണ്ട് ഒരു വർഷം പൂർത്തിയാകുമ്പോഴാണ് മോഹൻ പാസ്വാൻ അന്തരിച്ചെന്ന വാർത്തയും പുറത്ത് വരുന്നത്. ജ്യോതിയുടെ അച്ഛൻ മരിച്ചെന്ന് സ്ഥിരീകരിച്ച ദർബംഗ ജില്ലാ മജിസ്ട്രേട്ട് എസ്എം ത്യാഗരാജൻ ബ്ലോക്ക് ഡെവലപ്മെന്‍റ് ഓഫീസർ കുടുംബത്തെ സന്ദർശിച്ചെന്നും വ്യക്തമാക്കി.

‘ഡെൽറ്റ വേരിയൻ്റ്’എന്നറിയപ്പെടും; ഇന്ത്യയിൽ കണ്ടെത്തിയ വൈറസ് വകഭേദത്തിന് പേരിട്ട് WHO

ഗുരുഗ്രാമിൽ ഇ–റിക്ഷ ഓടിച്ചു ജീവിക്കുകയായിരുന്ന മോഹൻ പാസ്വാന് അപകടത്തിൽ പരുക്കേറ്റതോടെയാണ് കുടുംബത്തിന്‍റെ ജീവിതം പ്രതിസന്ധിയിലാകുന്നത്. കൊവിഡ് വ്യാപനത്തെ തുടർന്ന് രാജ്യത്ത് ലോക്ക് ഡൗൺ പ്രഖ്യാപിച്ചതോടെ മറ്റുമാർഗങ്ങളില്ലാതെ വന്നതോടെയാണ് സൈക്കിളിൽ അച്ഛനെ പിന്നിൽ ഇരുത്തി ജ്യോതി സൈക്കിൾ ചവിട്ടാൻ തീരുമാനിക്കുന്നത്.

ലക്ഷദ്വീപ് ജനതയെ ദ്രോഹിക്കില്ലെന്ന് അമിത് ഷാ ഉറപ്പ് നല്‍കി: എപി അബ്ദുള്ളക്കുട്ടി

കൈയ്യിലുണ്ടായിരുന്ന പൈസയ്ക്ക് സൈക്കിൾ വാങ്ങിയ കുട്ടി 12 ദിവസം കൊണ്ടാണ് ഗുരുഗ്രാമിൽ നിന്ന് ബിഹാറിലെ ജന്മനാട്ടിലേക്ക് യാത്ര ചെയ്തത്. ജ്യോതിയുടെയും അച്ഛന്‍റെയും സൈക്കിൾ യാത്ര ലോക ശ്രദ്ധ തന്നെ നേടിയിരുന്നു. ഈ വർഷം ജനുവരിയിൽ ബിഹാറിലെ ഒരു ലഹരി വിരുദ്ധ പദ്ധതിയുടെ ബ്രാൻഡ് അംബാസഡറായി ജ്യോതിയെ തെരഞ്ഞെടുത്തിരുന്നു. ധീരതയ്ക്കുള്ള പ്രധാൻ മന്ത്രി രാഷ്ട്രീയ ബാൽ പുരസ്കാരവും കുട്ടിക്ക് ലഭിച്ചിരുന്നു.