യോഗ ചെയ്യാൻ യോഗാ മാറ്റ് ഇല്ലേ? പകരം ഉപയോഗിക്കാം ഇവയെല്ലാം

യോഗ ചെയ്യുന്നവർക്ക് ഏറ്റവും പ്രിയപ്പെട്ടത് അവരുടെ യോഗാ മാറ്റ് തന്നെയാവും. ഏത് തരത്തിലുള്ള ആസനങ്ങൾ ചെയ്യുമ്പോഴും ഏറ്റവും സുഖകരമാക്കാനും സുരക്ഷിതമായി നിൽക്കാനും സഹായിക്കുന്നത് യോഗ മാറ്റാണ്. എന്നാൽ യോഗാ മാറ്റ് കയ്യിലില്ലാത്ത സമയങ്ങളിൽ എന്ത് ചെയ്യും? അല്ലെങ്കിൽ യോഗ ചെയ്യുന്നതിനായി പ്രത്യേകം ഒരു മാറ്റ് വാങ്ങാൻ ഉദ്ദേശമില്ലെങ്കിലോ? വീട്ടിൽ തന്നെ ലഭ്യമാകുന്ന മറ്റു പല വസ്തുക്കളും യോഗാ മാറ്റായി ഉപയോഗിക്കാം.



പരവതാനി:



നിങ്ങളുടെ മുറികളിലോ സ്വീകരണമുറിയിലോ ഉപയോഗിക്കുന്ന മനോഹരമായ പരവതാനികൾ ഏറ്റവും മികച്ച യോഗ മാറ്റുകളായി ഉപയോഗിക്കാം. നേർത്ത നൂലുകളാൽ തയ്യാറാക്കിയ ഈ പരവതാനികളിൽ സുഖകരമായി തന്നെ യോഗ ചെയ്യാം. ഏത് യോഗാ പോസുകളും വേദനയില്ലാതെ പൂർത്തിയാക്കാൻ ഇത്തരം പരവതാനികൾ തിരഞ്ഞെടുക്കാം. ഇവയുടെ അടിവശം തെന്നി നീങ്ങുന്ന തരത്തിൽ അല്ലെന്ന് ഉറപ്പാക്കണം. അടിവശത്ത് റബ്ബർ മെറ്റേറിയൽ ഒട്ടിച്ച ശേഷം ഉപയോഗിക്കുകയാണെങ്കിൽ തെന്നി നീങ്ങുന്ന പ്രശ്നം ഒഴിവാക്കാം.

ഫിറ്റ്നസ് സ്വന്തമാക്കാൻ ആദ്യം ഒഴിവാക്കണം ഈ ശീലങ്ങൾ

പുതപ്പ്:



തണുപ്പിനെ മറികടക്കാനായി മാത്രമല്ല പുതപ്പ് ഉപയോഗിക്കാൻ കഴിയുക, നിങ്ങളുടെ കയ്യിൽ യോഗാ മാറ്റ് ഇല്ലെങ്കിൽ അല്പം കട്ടിയുള്ള പുതപ്പ് ആവശ്യമായ രീതിയിൽ മടക്കി യോഗാ മാറ്റായി ഉപയോഗിക്കാം. ഇത് നിങ്ങൾക്ക് വീടിനകത്തോ പുറത്തോ ഉപയോഗിക്കാം. അഴുക്ക് പറ്റിയാൽ വളരെ പെട്ടെന്ന് തന്നെ കഴുകി വൃത്തിയാക്കാനും സാധിക്കും. അതിനാൽ , യോഗാ മാറ്റിനായി അധിക ചെലവ് വേണ്ട, പഴയതു ഉപയോഗിക്കാത്തതോ ആയ ഒരു പുതപ്പെടുത്ത് ഇപ്പോൾ തന്നെ യോഗാ മാറ്റായി ഉപയോഗിച്ചോളൂ.

ബീച്ച് ടവൽ:



ബീച്ച് ടവൽ കയ്യിലുണ്ടോ? എങ്കിൽ പ്രത്യേകിച്ച് ഒന്നും ചെയ്യാതെ തന്നെ ഇത് നിങ്ങൾക്ക് യോഗാ മാറ്റായി ഉപയോഗിക്കാൻ കഴിയും. വീടിനകത്തും പുറത്തും ഒരുപോലെ ഈ യോഗ മാറ്റ് ഉപയോഗിക്കാം. എന്നാൽ വീടിനകത്തെ മിനുസമുള്ള പ്രതലങ്ങളിൽ ഉപയോഗിക്കുമ്പോൾ തെന്നി പോകുന്നില്ലെന്ന് ഉറപ്പ് വരുത്തണം.

ക്വിൽറ്റഡ് മാറ്റ്:



നിങ്ങൾക്ക് ഒരു യോഗ മാറ്റ് വാങ്ങാൻ താൽപ്പര്യമില്ലെങ്കിൽ, ഒരു ക്വിൽറ്റഡ് മാറ്റ് ഇതിനായി ഉപയോഗിക്കാം. തയ്യൽ മെഷീൻ ഉപയോഗിച്ച് നിങ്ങൾക്ക് ആവശ്യമുള്ളത്ര കട്ടിയിൽ തയ്യാറാക്കി ഈ മാറ്റ് ഉപയോഗിക്കാം. തെന്നി നീങ്ങാത്ത രീതിയിൽ തറ ക്രമീകരിച്ച ശേഷം ഈ മാറ്റ് യോഗ പരിശീലിക്കുന്നതിനായി ഉപയോഗിക്കാം.