കോവാക്സിന് ശേഷം തദ്ദേശിയമായി വികസിപ്പിച്ച ഒരു വാക്സിൻ കൂടി

ന്യൂഡൽഹി: ഭാരത് ബയോടെക്കിന്റെ കോവാക്സിന് പിന്നാലെ ഇന്ത്യ തദ്ദേശീയമായ വികസിപ്പിച്ച രണ്ടാമത്തെ കൊവിഡ് പ്രതിരോധ വാക്സിനും വിതരണത്തിന് കേന്ദ്ര സര്‍ക്കാര്‍ തയ്യാറെടുക്കുന്നു.

Also Read : രാജ്യത്ത് 1.34 ലക്ഷം കൊവി‍‍ഡ് കേസുകള്‍; മൂവ്വായിരത്തിന് താഴെ മരണം

ഹൈദരാബാദ് ആസ്ഥാനമായി പ്രവര്‍ത്തിക്കുന്ന വാക്സിൻ നിര്‍മ്മാതാക്കളായ ബയോളജിക്കൽ – ഇ എന്ന കമ്പനിയാണ് വാക്സിൻ നിര്‍മ്മിക്കുന്നത്. ഇവരിൽ നിന്നും 30 കോടി ഡോസ് വാക്സിന്‍ കേന്ദ്ര സര്‍ക്കാര്‍ സംഭരിക്കുമെന്ന് കേന്ദ്ര ആരോഗ്യമന്ത്രാലയം അറിയിച്ചു. ഇത് സംബന്ധിച്ച കരാറിൽ രാജ്യം ഒപ്പുവച്ചു.

ഓഗസ്റ്റ് മുതൽ ഡിസംബര്‍ വരെയുള്ള മാസങ്ങള്‍ക്കുള്ളിൽ കമ്പനി വാക്സിന്‍ നിര്‍മ്മിക്കുകയും സംഭരിക്കുകയും ചെയ്യും. ഇതിനായി 1500 കോടി രൂപ മുൻകൂറായി കമ്പനിക്ക് നൽകുമെന്നും കേന്ദ്രം അറിയിച്ചിട്ടുണ്ട്. വാക്സിന്റെ മൂന്നാം ഘട്ട പരീക്ഷണം തുടരുകയാണ്.

മൂന്നാം ഘട്ട പരീക്ഷണത്തിലുള്ള ബയോളജിക്കൽ ഇ വാക്സിൻ ഒന്നും രണ്ടും പരിക്ഷണഘട്ടങ്ങളിൽ മികച്ച ഫലമാണ് ലഭിച്ചതെന്ന് മന്ത്രാലയത്തിന്റെ പ്രസ്താവനയിൽ പറയുന്നുണ്ട്.

കേന്ദ്ര സര്‍ക്കാരിന്റെ വാക്സിൻ നയത്തിനെതിരെ വിവിധ കോണുകളിൽ നിന്നും വിമര്‍ശനമുയര്‍ന്നതോടെയാണ് പുതിയ തീരുമാനം വന്നിരിക്കുന്നത്. അടുത്ത കുറച്ച് മാസങ്ങള്‍ക്കുള്ളിൽ വാക്സിൻ ലഭ്യമാകുമെന്നും സര്‍ക്കാര്‍ പ്രസ്താവനയിൽ പറയുന്നു.

Also Read : സ്റ്റോക്കുണ്ടായിട്ടും വാക്സിന്‍ വിതരണത്തിൽ പിശുക്ക്; സര്‍ക്കാരിനെതിരെ ആക്ഷേപം, റിപ്പോര്‍ട്ട്

നിലവിൽ കോവാക്സിന് പുറമേ സിറം ഇൻസ്റ്റിറ്റ്യൂട്ടിന്റെ കോവിഷീൽഡ്, സ്പുട്നിക് വി എന്നീ വാക്സിനുകളാണ് രാജ്യത്ത് നിലവിൽ വിതരണം ചെയ്യുന്നത്.