ലോക്ക് ഡൗൺ വീണ്ടും നീട്ടി കർണാടക; ജൂൺ 14വരെ നിയന്ത്രണങ്ങൾ തുടരും

ബെംഗളൂരു: കർണാടകയിൽ ലോക്ക് ഡൗൺ വീണ്ടും നീട്ടി. ജൂൺ 14 വരെയാണ് ലോക്ക് ഡൗൺ നീട്ടിയത്. നേരത്തെ ജൂൺ ഏഴ് വരെയായിരുന്നു ലോക്ക് ഡൗൺ പ്രഖ്യാപിച്ചിരുന്നത്. കൊവിഡ് വ്യാപന പശ്ചാത്തലത്തിലാണ് നിയന്ത്രണങ്ങൾ നീട്ടിയിരിക്കുന്നതെന്ന് മുഖ്യമന്ത്രി ബിഎസ് യെദ്യൂരപ്പ.

“കൊവിഡ് വ്യാപനം തടയുന്നതിന് മെയ് 24 മുതൽ ജൂൺ 7വരെ കർശന നിയന്ത്രണങ്ങൾ നേരത്തെ പ്രഖ്യാപിച്ചിരുന്നു. കേസുകൾ കുറഞ്ഞിട്ടുണ്ടെങ്കിലും രോഗ വ്യാപനം ഇപ്പോഴും തുടരുകയാണ്. വിദഗ്ധരുടെ നിർദേശത്തെ തുടർന്ന് ജൂൺ 14വരെ നിയന്ത്രണങ്ങൾ നീട്ടാൻ തീരുമാനിച്ചു” കർണാടക മുഖ്യമന്ത്രി ബിഎസ് യെദ്യൂരപ്പ വാർത്താ സമ്മേളനത്തിൽ പറഞ്ഞു.

Also Read : നീതി ആയോഗിന്‍റെ എസ്ഡിജി സൂചികയില്‍ കേരളം വീണ്ടും ഒന്നാമത്; ഏറ്റവും പിന്നില്‍ ബിഹാര്‍



രോഗ വ്യാപന നിരക്ക് അഞ്ച് ശതമാനത്തില്‍ താഴെയാകുമ്പോൾ മാത്രമേ നിയന്ത്രണങ്ങൾ അവസാനിപ്പിക്കേണ്ടതുള്ളൂവെന്നാണ് സമിതി നിർദേശിച്ചതെന്നാണ് റിപ്പോർട്ട്. സംസ്ഥാനത്ത് ഇന്നലെ 16,387 പേർക്കാണ് കൊവിഡ് സ്ഥിരീകരിച്ചിരുന്നത്. 463 പേർ മരിക്കുകയും ചെയ്തിരുന്നു. ഇതോടെ സംസ്ഥാനത്ത് കൊവിഡ് ബാധിച്ച് മരിച്ചവരുടെ എണ്ണം 30,000 കവിഞ്ഞു.

Also Read : യുഡിഎഫിലെ നിരവധി നേതാക്കൾ പാർട്ടിയിലേക്ക് വരും; സമീപിച്ചത് ജനപിന്തുണയുള്ള നേതാക്കളെന്ന് ജോസ് കെ മാണി



അതേസമയം കേന്ദ്ര ആരോഗ്യ മന്ത്രാലയം ഇന്ന് രാവിലെ പുറത്തുവിട്ട കണക്കുകൾ പ്രകാരം കഴിഞ്ഞ 24 മണിക്കൂറിനിടെ 1,34,154 ലക്ഷം പേർക്കാണ് രാജ്യത്ത് കൊവിഡ്-19 സ്ഥിരീകരിച്ചത്. ഇതോടെ രാജ്യത്ത് കൊവിഡ് സ്ഥിരീകരിച്ചവരുടെ ആകെ എണ്ണം 2,84,41,986 ആയി ഉയർന്നു. കഴിഞ്ഞ 24 മണിക്കൂറിനിടെ 2,887 പേർക്ക് ജീവൻ നഷ്‌ടമായതോടെ രാജ്യത്തെ ആകെ കൊവിഡ് മരണം 3,37,989 ആയി ഉയർന്നിട്ടുണ്ട്.