ലഹരിമരുന്ന് വാങ്ങാൻ പണമില്ല; പിതാവ് രണ്ടര വയസുകാരനെ 40,000 രൂപയ്ക്ക് വിറ്റു

ഗുവാഹത്തി: ലഹരിമരുന്ന് വാങ്ങാൻ പണം കണ്ടെത്താനായി അച്ഛൻ രണ്ടര വയസുകാരനായ മകനെ വിറ്റു. അസമിലെ മോറിഗാവ് ജില്ലയിലാണ് ഞെട്ടിക്കുന്ന സംഭവം. അമിനുൽ ഇസ്ലാം എന്നയാൾ 40,000 രൂപയ്ക്കാണ് മകനെ വിറ്റതെന്ന് ടൈംസ് ഓഫ് ഇന്ത്യയാണ് റിപ്പോർട്ട് ചെയ്തത്. കുട്ടിയുടെ അമ്മയുടെ പരാതിയിൽ പോലീസ് ഇയാളെ അറസ്റ്റ് ചെയ്തു.



അമിനുലിന്‍റെ ഭാര്യ റുക്മിന ബീഗമാണ് മകനെ ഭര്‍ത്താവ് മറ്റൊരാള്‍ക്ക് വിറ്റെന്ന പരാതിയുമായി പോലീസിനെ സമീപിച്ചത്. വ്യാഴാഴ്ചയാണ് അമിനുൽ ഇസ്ലാമിനെ പോലീസ് അറസ്റ്റ് ചെയ്തത്. തുടർന്ന് വെള്ളിയാഴ്ച കുട്ടിയെ വാങ്ങിയ ഷാസിദ ബീഗത്തെയും അറസ്റ്റ് ചെയ്തു.ബർബാരി സ്വദേശിയാണ് ഷാസിദ.

പ്രാങ്ക് വീഡിയോ: ‘വില്ലൻ ഹബ്’ അരിച്ചുപെറുക്കി പോലീസ്, കൊച്ചിയില്‍ യുവാവ് അറസ്റ്റില്‍

ഭർത്താവിന്‍റെ ലഹരി ഉപയോഗവുമായി ബന്ധപ്പെട്ട് റുക്മിന ഇവരുമായി തർക്കത്തിലായിരുന്നു. കഴിഞ്ഞ ഏതാനം മാസങ്ങളായി സ്വന്തം വീട്ടിലാണ് ഇവർ കഴിയുന്നത്. പോലീസ് പറയുന്നതിനനുസരിച്ച് 40,000 രൂപയ്ക്കാണ് ഷാസിദ ബീഗത്തിന് അമിനുൽ മകനെ വിൽക്കുന്നത്. പരാതി ലഭിച്ചതിനെ തുടർന്ന് നടത്തിയ അന്വേഷത്തിനൊടുവിൽ ഷാസിദയുടെ വീട്ടിൽ നിന്ന് കുട്ടിയെ കണ്ടെടുത്തു. മകനെ റുക്മിനയ്ക്ക് കൈമാറുകയും ചെയ്തു.

ശീതളപാനീയത്തിൽ മയക്കുമരുന്ന് കലക്കി നൽകി ബലാത്സംഗം ചെയ്തു, നഗ്നചിത്രങ്ങള്‍ പകര്‍ത്തി ഭീഷണി; എസ്ഐക്കെതിരെ പരാതിയുമായി വനിതാ പോലീസ്

റുക്മിനയ്ക്കൊപ്പമായിരുന്നു മകനും കഴിഞ്ഞിരുന്നത്. എന്നാൽ ദിവസങ്ങൾക്ക് മുമ്പ് ഇവരുടെ വീട്ടിലെത്തിയ അമിനുൽ കുട്ടിയ്ക്ക് അധാർ കാർഡിന് അപേക്ഷിക്കണമെന്ന് പറഞ്ഞാണ് കൂട്ടിക്കൊണ്ടുപോകുന്നത്. എന്നാൽ മൂന്ന് ദിവസം കഴിഞ്ഞും കുട്ടിയെ തിരികെ കൊണ്ട് വന്നില്ല. കഴിഞ്ഞ മൂന്നുവർഷമായി ഇയാൾ ലഹരി മരുന്ന് ഉപയോഗിക്കുന്നുണ്ടെന്നാണ് റിപ്പോർട്ട്. സെക്സ് റാക്കറ്റ് ഉൾപ്പെടെയുള്ള കേസുകളും ഇയാൾക്കെതിരെ ഉണ്ട്.