നവവധുവിനെ സൗദി പൗരന്‍ കാറില്‍ നിന്ന് തള്ളിയിട്ട് വാഹനം കയറ്റിക്കൊന്നു

റിയാദ്: നവവധുവിനെ ഓടിക്കൊണ്ടിരിക്കുന്ന കാറില്‍ നിന്ന് തള്ളിയിട്ട് പാറ കൊണ്ട് തലക്കടിച്ച് കൊന്നതായി റിപ്പോര്‍ട്ട്. അതിനു ശേഷം മരിച്ചുവെന്ന് ഉറപ്പുവരുത്താന്‍ താന്‍ ഓടിച്ച കാര്‍ യുവതിയുടെ ശരീരത്തിലൂടെ കയറ്റി ഇറക്കുകയും ചെയ്തു. തായിഫിലെ റവാന്‍ അല്‍ ഗാംദിയെന്ന നവവധുവിനാണ് ഇത്തരമൊരു ദാരുണമായ അന്ത്യമുണ്ടായത്. ഹവിയ്യ – താഇഫ് റോഡിലായിരുന്നു മനസ്സാക്ഷിയെ ഞെട്ടിച്ച സംഭവം.



വിവാഹം കഴിഞ്ഞ് ഒരു ആഴ്ച മാത്രം പിന്നിട്ടപ്പോഴാണ് 30കാരനായ സൗദി യുവാവ് ഭാര്യയെ ക്രൂരമായ രീതിയില്‍ കൊലപ്പെടുത്തിയത്. യുവാവ് തന്നെയായിരുന്നു വാഹനം ഓടിച്ചിരുന്നതെന്ന് പോലിസ് പറഞ്ഞു. യുവതിയുടെ താഇഫിലെ വീട്ടിലേക്ക് തിരികെ വരികയായിരുന്നു നവദമ്പതികള്‍. ആളൊഴിഞ്ഞ സ്ഥലത്തെത്തിയപ്പോള്‍ ഓടിക്കൊണ്ടിരിക്കുന്ന വാഹനത്തില്‍ നിന്ന് യുവതിയെ തള്ളി പുറത്തിട്ട ശേഷം വാഹനം നിര്‍ത്തി പാറക്കല്ലെടുത്ത് തലക്കടിച്ചു. അതിനു ശേഷം വീണ്ടും വാഹനം യുവതിയുടെ ശരീരത്തിലൂടെ കയറ്റി ഇറക്കുകയായിരുന്നുവെന്നും പോലീസ് അറിയിച്ചു.

Also Read: പിസിആര്‍ ടെസ്റ്റിന് അമിത ചാര്‍ജ് ഈടാക്കിയാല്‍ കര്‍ശന നടപടിയെന്ന് അബുദാബി

കൊലപാതകത്തിന് ശേഷം വാഹനത്തില്‍ രക്ഷപ്പെട്ട പ്രതിയെ അധികം താമസിയാതെ പോലിസ് പിടികൂടി. കൊലപാതകത്തിന് പിന്നിലെ കാരണം എന്താണെന്ന് വ്യക്തമല്ല. ഇയാള്‍ മയക്കുമരുന്നിന് അടിമയാണോ എന്ന കാര്യവും മാനസികാസ്ഥ്യമുണ്ടോ എന്ന കാര്യവും പരിശോധിച്ചുവരുകയാണെന്നും പോലീസ് അറിയിച്ചു. ചോദ്യം ചെയ്യുന്നതിനും തുടര്‍ നടപടികളുമായി ഇയാളെ പബ്ലിക് പ്രൊസിക്യൂഷന് കൈമാറിയിരിക്കുകയാണ് പോലീസ്.