സ്വന്തം പേരിനൊപ്പം അച്ഛന്റെ പേര് മാത്രമേ ചേര്‍ക്കാവു എന്ന വാദം തള്ളി ഡല്‍ഹി ഹൈക്കോടതി. പിതാവ് നല്‍കിയ ഹര്‍ജി തള്ളിക്കൊണ്ടാണ് വാക്കാലുള്ള പരാമര്‍ശം. അച്ഛന്‍ മക്കളുടെ ഉടമയല്ലെന്ന് കോടതി നിരീക്ഷണം
കോടതി നിരീക്ഷണം. Photo: Pexels/Stock
സ്വന്തം പേരിനൊപ്പം അച്ഛന്റെ പേരു ചേർക്കുന്നതുപോലെ തന്നെ അമ്മയുടെ പേര് ചേർക്കാനും മക്കൾക്ക് അവകാശമുണ്ടെന്ന് ഡൽഹി ഹൈക്കോടതി വ്യക്തമാക്കി. മക്കളുടെ ഉടമയല്ല അച്ഛനെന്നും ഹൈക്കോടതി നിരീക്ഷിച്ചു. ജസ്റ്റിസ് രേഖ പള്ളിയുടേതാണ് വാക്കാലുള്ള ഈ നിരീക്ഷണം, വിവിധ ധേശീയ മാധ്യമങ്ങൾ റിപ്പോർട്ട് ചെയ്തു.
മകളുടെ പേരിനൊപ്പം അമ്മയുടെ പേര് മാറ്റി തന്റെ പേര് ചേർക്കണമെന്നാവശ്യപ്പെട്ട് പിതാവ് നൽകിയ ഹർജി തള്ളിക്കൊണ്ടായിരുന്നു കോടതിയുടെ പരാമർശം. അമ്മയുടെ പേര് മക്കൾക്ക് സ്വന്തം പേരിനൊപ്പം ചേർക്കാനുള്ള അവകാശമുണ്ടെന്ന് നിരീക്ഷിച്ച കോടതി, തന്റെ പേര് മാത്രമേ ചേർക്കാവൂ എന്ന് നിർബന്ധിക്കാൻ മക്കളുടെ ഉടമയല്ല പിതാവ് എന്നും നിരീക്ഷിച്ചു.
ഔദ്യോഗിക രേഖകളിൽ മകളുടെ പേരിനൊപ്പം അമ്മയുടെ പേരല്ല, മറിച്ച് അച്ഛനായ തന്റെ പേരാണ് വേണ്ടതെന്നായിരുന്നു പിതാവിന്റെ വാദം. എന്നാൽ, ഈ വാദം തള്ളിയ കോടതി എന്തുകൊണ്ട് അമ്മയുടെ പേര് കുട്ടിയുടെ പേരിനൊപ്പം ചേർത്തു കൂടാ എന്ന് ഹർജിക്കാരനോട് ചോദിച്ചു.
പ്രായപൂർത്തിയാകാത്ത കുട്ടിക്ക് സ്വന്തം തീരുമാന പ്രകാരം പേരു മാറ്റാൻ സാധിക്കില്ലെന്നും, ഹർജിക്കാരനുമായി അകന്നു കഴിയുന്ന ഭാര്യയാണ് പേരു മാറ്റിയതെന്നുമായിരുന്നു അഭിഭാഷകന്റെ വാദം. കുട്ടിയുടെ അമ്മ ശ്രീവാസ്തവ എന്ന പേരിൽ നിന്ന് സക്സേന എന്നാക്കി മാറ്റിയിരുന്നു.
ഹർജി അനുവദിക്കാൻ വിസമ്മതിച്ച കോടതി, 2018 ആഗസ്റ്റ് 10 -ന് ഈസ്റ്റ് ഡൽഹി മുനിസിപ്പൽ കോർപ്പറേഷൻ (ഇഡിഎംസി) നൽകിയ ജനന സർട്ടിഫിക്കറ്റിൽ പോലും രണ്ട് പേരുകളും ഉണ്ടായിരിക്കുമെന്ന് സൂചിപ്പിച്ചു.
കുട്ടിയുടെ പഴയപേരിൽ ഇൻഷുറൻസ് പോളിസി എടുത്തിട്ടുണ്ടെന്നും പേര് മാറ്റുന്നതിലൂടെ ഇൻഷുറൻസ് നടപടികൾക്ക് ബുദ്ധിമുട്ടുണ്ടാകുമെന്നും പിതാവ് വാദിച്ചു. എന്നാൽ ഇക്കാര്യങ്ങൾക്ക് സ്‌കൂളിനെ സമീപിക്കാനായിരുന്നു കോടതിയുടെ നിർദേശം.
****
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : delhi court rules father is not the owner of his kids in mother surname case
Malayalam News from malayalam.samayam.com, TIL Network
