യുഎൻ രക്ഷാസമിതി യോഗം: ചരിത്രത്തിലാദ്യമായി ഇന്ത്യൻ പ്രധാനമന്ത്രി ചർച്ച നയിക്കും

ന്യൂഡൽഹി: ഇന്നു ചേരുന്ന യുഎൻ രക്ഷാസമിതി യോഗത്തിൽ പ്രധാനമന്ത്രി നരേന്ദ്ര മോദി അധ്യക്ഷത വഹിക്കും. ഇതാദ്യമായാണ് ഇന്ത്യൻ പ്രധാനമന്ത്രി യുഎൻ രക്ഷാസമിതി യോഗത്തിൻ്റെ അധ്യക്ഷത വഹിക്കുന്നത്. സമുദ്ര സുരക്ഷ സംബന്ധിച്ച ചര്‍ച്ചകളായിരിക്കും യോഗത്തിൽ നടക്കുകയെന്നാണ് റിപ്പോര്‍ട്ട്. ഇന്നു വൈകിട്ടാണ് സുപ്രധാനമായ ഓപ്പൺ ഡിബേറ്റ് നടക്കുന്നത്.



ഓഗസ്റ്റ് മാസത്തിൽ ഇന്ത്യയാണ് യുഎൻ രക്ഷാസമിതിയുടെ അധ്യക്ഷത വഹിക്കുന്നത്. ഈ സാഹചര്യത്തിൽ ഇന്ത്യ മൂന്ന് സുപ്രധാന ചര്‍ച്ചകള്‍ക്ക് യുഎൻ രക്ഷാസമിതിയിൽ വേദിയൊരുക്കുമെന്നാണ് ഇന്ത്യയുടെ യുഎൻ അംബാസഡര്‍ ടിഎസ് തിരുമൂര്‍ത്തി വ്യക്തമാക്കുന്നത്. സമുദ്ര സുരക്ഷ, സമാധാനം, തീവ്രവാദം എന്നീ വിഷയങ്ങളിലായിരിക്കും ചര്‍ച്ചകള്‍ നടത്തുക. ഇതിൽ സമുദ്രതല സുരക്ഷയിൽ അന്താരാഷ്ട്ര പങ്കാളിത്തത്തിൻ്റെ പ്രാധാന്യത്തെപ്പറ്റിയാണ് ആദ്യ ചര്‍ച്ച നടക്കുന്നത്. ഇതിനാണ് പ്രധാനമന്ത്രി മോദി അധ്യക്ഷത വഹിക്കുന്നത്. വൈകിട്ട് 5.30ന് പ്രധാനമന്ത്രി വീഡിയോ കോൺഫറൻസിലൂടെയാണ് യോഗത്തിൽ പങ്കെടുക്കുന്നത്.

Also Read: ‘സ്കൂളുകൾ ഘട്ടം ഘട്ടമായി തുറക്കും’: ഒരുക്കങ്ങൾ ഉടനെന്ന് വിദ്യാഭ്യാസമന്ത്രി

റഷ്യൻ പ്രസിഡൻ്റ് വ്ലാഡിമിര്‍ പുടിൻ അടക്കമുള്ള ലോകനേതാക്കള്‍ യുഎൻ രക്ഷാസമിതി യോഗത്തിൽ പങ്കെടുക്കുമെന്നാണ് വാര്‍ത്താ ഏജൻസിയായ എഎൻഐ റിപ്പോര്‍ട്ട് ചെയ്യുന്നത്. സമുദ്രം വഴിയുള്ള കുറ്റകൃത്യങ്ങളും സുരക്ഷആപ്രശ്നങ്ങളും എങ്ങനെ മറികടക്കാനാകുമെന്നാണ് യോഗത്തിൽ ചര്‍ച്ചയാകുക. വിഷയത്തിൽ യുഎൻ രക്ഷാസമിതി സമഗ്രമായ ചര്‍ച്ച നടത്തുന്നതും ഇതാദ്യമാണ്. മൂന്ന് പ്രധാന ചര്‍ച്ചകള്‍ക്ക് കുറമെ സിറിയ, ഇറാഖ്, സൊമാലിയ, യെമൻ തുടങ്ങിയ മധ്യപൂര്‍വേഷ്യൻ രാജ്യങ്ങളിലെ പ്രതിനിധികളുമായി ചര്‍ച്ച നടത്താനും ഇന്ത്യ തീരുമാനിച്ചിട്ടുണ്ട്.

Also Read: ലിംഗമാറ്റ സര്‍ജറി: രണ്ട് ട്രാൻസ് വ്യക്തികള്‍ സംസാരിക്കുന്നു

യുഎൻ രക്ഷാസമിതിയുടെ സ്ഥിരാംഗമല്ലാത്ത ഇന്ത്യ ഇതുവരെ പത്ത് തവണ സമിതിയുടെ ഭാഗമായിട്ടുണ്ട്. ഇതിൽ ഒൻപതു തവണയും ഇന്ത്യയായിരുന്നു ഈ കാലയളവിൽ അധ്യക്ഷത വഹിച്ചിരുന്നത്. 1950 ജൂൺ, 1967 സെപ്റ്റംബര്‍, 1972 ഡിസംബര്‍, 1977 ഒക്ടോബര്‍, 1985 ഫെബ്രുവരി, 1991 ഒക്ടോബര്‍, 1992 ഡിസംബര്‍, 2011 ഓഗസ്റ്റ്, 2012 നവംബര്‍ എന്നീ മാസങ്ങളിൽ ഇന്ത്യ രക്ഷാസമിതിയുടെ അധ്യക്ഷത വഹിച്ചു.