എന്റെ ബന്ധുവിൻ്റെ പേരും ഈശോ എന്നാണ്; ഈ പേര് സിനിമയ്ക്ക് ഇട്ടാൽ എന്താണ് കുഴപ്പമെന്ന് യുഹാനോന്‍ മാര്‍ മിലിത്തിയോസ്

തൃശൂർ: ഒരു സിനിമയ്ക്ക് ‘ഈശോ’ എന്ന പേര് നൽകിയാൽ എന്താണ് കുഴപ്പമെന്ന് തൃശ്ശൂര്‍ ഓര്‍ത്തഡോക്‌സ് മെത്രാപ്പൊലീത്ത യുഹാനോന്‍ മാര്‍ മിലിത്തിയോസ്. മധ്യതിരുവിതാംകൂറില്‍ ധാരാളം പേര്‍ക്ക് ഈശോ എന്ന പേരുണ്ട്. എൻ്റ് ബന്ധുവിനും ഇതേ പേരുണ്ടെന്നും ഫേസ്ബുക്ക് പോസ്റ്റിലൂടെ അദ്ദേഹം വ്യക്തമാകി.



‘യേശുദേവൻ സമാധാനത്തിൻ്റെ വക്താവ്’: നാദിർഷ ക്രൈസ്തവരെ അവഹേളിക്കുന്നുവെന്ന് തുഷാർ വെള്ളാപ്പള്ളി

ഈശോ എന്ന പേര് മറ്റെങ്ങും വന്നുകൂടാ എന്നുണ്ടോയെന്നും അദ്ദേഹം ചോദിക്കുന്നുണ്ട്. “ഞാൻ, സിനിമാ ഡയറക്ടർ നാദിർഷായുടെ, ഈശോ എന്ന സിനിമയുടെ കാര്യത്തിൽ‌ നൽകിയ കമന്റ്‌.‌ എന്താണു ഈശോ എന്ന പേരു ഒരു സിനിമക്ക്‌ ഇട്ടാൽ കുഴപ്പം? മധ്യതിരുവിതാംകൂറിൽ ധാരാളം പേർക്ക്, എന്റെ ഒരു ബന്ധുവിനുൾപ്പടെ,‌ ഇങ്ങനെ പേരുണ്ടല്ലോ! ഇവരിലാരെയും നിരോധിക്കണം എന്ന് ഇതുവരെ ആരും പറഞ്ഞു കേട്ടില്ല. ക്രിത്യാനികളിൽ ചിലർ മശിഹായെ ഈശോ എന്ന് വിളിക്കുമ്പോൾ മറ്റു ചിലർ യേശു എന്നാണു വിളിക്കുന്നത്‌. ഈ പേരും മറ്റെങ്ങും വന്നുകൂടാ എന്നും വരുമോ? – എന്നും ഫേസ്ബുക്ക് പോസ്റ്റിലൂടെ മെത്രാപ്പൊലീത്ത യുഹാനോന്‍ മാര്‍ മിലിത്തിയോസ് ചോദിച്ചു.

നടനും സംവിധായകനുമായ നാദിർഷ സംവിധാനം ചെയ്യുന്ന ഇശോ എന്ന ചിത്രത്തിന്റെ പേര് വിവാദമായ സാഹചര്യത്തിലാണ് അദ്ദേഹം പ്രതികരണം നടത്തിയത്. നാദിർഷ സംവിധാനം ചെയ്യുന്ന കേശു ഈ വീടിൻ്റെ നാഥൻ, ഈശോ എന്നീ സിനിമകളുടെ പേര് മാറ്റണമെന്ന ആവശ്യവുമായി ക്രിസ്ത്യൻ സംഘടനകൾ രംഗത്തുവന്നിരുന്നു. ക്രിസ്ത്യൻ സമൂഹത്തെ നിർബന്ധബുദ്ധിയോടെ അപമാനിക്കുന്ന പ്രവർത്തനങ്ങളാണ് സിനിമയിൽ ഉണ്ടാകുന്നതെന്നാണ് പ്രധാന വിമർശനം.

‘പേര് ഈശോ എന്നാണെങ്കിൽ സിനിമ തിയേറ്റർ കാണില്ല; കേരളം മുഴുവൻ ഞാൻ ഇറങ്ങും’: പി സി ജോർജ്

വിവാദങ്ങൾ തുടരുന്ന സാഹചര്യത്തിൽ നാദിർഷ പ്രതികരണം നടത്തിയിരുന്നു. “ഈശോ എന്ന പേരു നീക്കണോ എന്ന കാര്യത്തിൽ അവസാന തീരുമാനമെടുക്കുന്നത് ഫെഫ്ക ആയിരിക്കും. ഫെഫ്ക എന്ത് തീരുമാനിച്ചാലും അതിനൊപ്പം നിൽക്കും. ഞാൻ ഒരാൾ മാത്രം തീരുമാനമെടുത്ത് ഇട്ട പേരല്ല ഈശോ എന്നത്” – എന്നും അദ്ദേഹം പറഞ്ഞു.