അഴിമതി പുറത്തുകൊണ്ടുവന്നു; സസ്‌പെന്‍ഷനിലായ പോലീസുകാരൻ മാധ്യമപ്രവര്‍ത്തകനെ സ്‌ക്രൂഡ്രൈവര്‍ കൊണ്ട് കുത്തികൊന്നു

കുർണൂൽ (ആന്ധ്രാപ്രദേശ്) : സസ്പെൻഷനിലായ പോലീസ് കോൺസ്റ്റബിൾ മാധ്യമപ്രവർത്തകനെ കുത്തിക്കൊന്നു. ആന്ധ്രാപ്രദേശിലെ കുർണൂൽ ജില്ലയില്‍ ഞായറാഴ്ച രാത്രിയാണ് സംഭവം. കൃത്യം കണ്ട് നിന്ന ആളുകളാണ് പോലീസിനെ കൊലപാതക വിവരം അറിയിച്ചത്. സ്ക്രൂഡ്രൈവർ ഉപയോഗിച്ചായിരുന്നു ആക്രമണമെന്നാണ് ഇംഗ്ലീഷ് വാർത്താ ചാനലായ ഇന്ത്യ ടുഡേ റിപ്പോർട്ട് ചെയ്യുന്നത്.



പ്രാദേശിക ചാനലിൽ റിപ്പോർട്ടറായ കേശവ് എന്നയാളാണ് കൊല്ലപ്പെട്ടത്. സ്ഥലത്തെ പോലീസ് ഡിപ്പാർട്മെന്‍റിലെ അഴിമതിയെക്കുറിച്ച് ഇയാൾ വാർത്ത നൽകിയിരുന്നു. അഴിമതി പുറത്ത് വന്നതിന് പിന്നാലെ പോലീസ് കോൺസ്റ്റബിളായ വെങ്കട സുബ്ബയ്യ സസ്പെൻഷനിലാവുകയും ചെയ്തു. ഇതിന്‍റെ പ്രതികാരത്തിലാകാം സുബ്ബയ്യ കൃത്യം നടത്തിയതെന്നാണ് പോലീസ് കരുതുന്നത്.

Also Read : പെൺകുട്ടികളെ മയക്കി ലൈംഗികമായി ചൂഷണം ചെയ്യാൻ ‘ഹാപ്പിനസ് പിൽസ്’; വൻ ശേഖരം പിടികൂടി; വിൽപ്പന ടാറ്റൂ സ്ഥാപനങ്ങൾ കേന്ദ്രീകരിച്ച്



വിവരം ലഭിച്ചതിന് പിന്നാലെ പോലീസ് സ്ഥലത്തെത്തിയെങ്കിലും പ്രതികൾ കടന്ന് കളഞ്ഞിരുന്നു. കുർണൂൽ പോലീസ് സൂപ്രണ്ട് സുധീർ കുമാർ റെഡ്ഡിയുടെ നേതൃത്വത്തിലാണ് കേശവിന്‍റെ മൃതദേഹം സമീപത്തെ ആശുപത്രിയിലേക്ക് മാറ്റിയത്. സസ്പെൻഷനിലായ പോലീസുകാരനും സഹോദരനും ചേർന്നാണ് കൃത്യം നടത്തിയതെന്നും എസ്പി പറഞ്ഞു.

Also Read : കേരളത്തിൽ ഞങ്ങളെ കൊല്ലുമായിരുന്നു, ഇന്ന് ലക്ഷകണക്കിന് ആളുകളുണ്ട്; ഇനി ശക്തമായ തിരിച്ചടി, ഒന്നിന് പകരം രണ്ടെന്ന് ബിജെപി മന്ത്രി



കോണ്‍സ്റ്റബിളും സഹോദരനും ചേര്‍ന്ന് കേശവിനെ അടുത്തുള്ള ദാബയിലേക്ക് വിളിച്ചുവരുത്തിയാണ് ആക്രമിച്ചത്. സുബ്ബയ്യയ്ക്കും സഹോദരനുമെതിരെ കൊലപാതക കുറ്റം ചുമത്തി കേസെടുത്തു. പ്രതികളെ പിടികൂടാനായി രണ്ട് സംഘത്തെ നിയോഗിച്ചതായും ഉദ്യോഗസ്ഥൻ വ്യക്തമാക്കി. പ്രതികൾക്കെതിരെ കർശന നടപടി സ്വീകരിക്കാൻ ആന്ധ്രാ ഡിജിപി എസ്പിക്ക് നിർദേശം നൽകിയിട്ടുണ്ട്.