സാമൂഹ്യ മാധ്യമങ്ങളുടെ ദുരുപയോഗം; ഖത്തറില്‍ ഏഴു പേര്‍ അറസ്റ്റില്‍

ദോഹ: സാമൂഹ്യമാധ്യമങ്ങള്‍ ദുരുപയോഗം ചെയ്ത ഏഴു പേരെ അറസ്റ്റ് ചെയ്തതായി ഖത്തര്‍ ആഭ്യന്തര മന്ത്രാലയം അറിയിച്ചു. സോഷ്യല്‍ മീഡിയ വഴി വ്യാജ വാര്‍ത്തകള്‍ പ്രചരിപ്പിക്കുകയും സമൂഹത്തില്‍ വംശീയ വികാരവും ഗോത്ര വികാരവും ഉണര്‍ത്തുന്ന പോസ്റ്റുകള്‍ നല്‍കുകയും ചെയ്തതിനെ തുടര്‍ന്നാണ് നടപടി. ഇവരെ തുടര്‍ നടപടികള്‍ക്കായി പബ്ലിക് പ്രോസിക്യൂഷന് കൈമാറിയതായി ഔദ്യോഗിക ട്വിറ്റര്‍ അക്കൗണ്ടില്‍ ആഭ്യന്തര മന്ത്രാലയം അറിയിച്ചു.



Also Read: സൗദി മാളുകളില്‍ നിയമവിരുദ്ധമായി പ്രവാസികള്‍ ജോലി ചെയ്യുന്നുണ്ടോ എന്നറിയാന്‍ പരിശോധന

എന്നാല്‍ അറസ്റ്റിലായവരുടെ പേരു വിവരങ്ങള്‍ പുറത്തുവിട്ടിട്ടില്ല. ഏഴു പേരുടെയും സോഷ്യല്‍ മീഡിയ അക്കൗണ്ടുകളില്‍ ഇത്തരത്തില്‍ പ്രസിദ്ധീകരിച്ച പോസ്റ്റുകള്‍ സുരക്ഷാ ഉദ്യോഗസ്ഥര്‍ കണ്ടെത്തി. സമൂഹത്തിന്റെ സുരക്ഷയും സ്ഥിരതയും സാമൂഹിക സമാധാനവും അപകടപ്പെടുത്തുന്ന തരത്തിലുള്ള വംശീയപരമായ ആശയങ്ങള്‍ സമൂഹമ മാധ്യമങ്ങളില്‍ പങ്കുവെയ്ക്കുന്നവക്കെതിരെ ശക്തമായ നടപടികള്‍ സ്വീകരിക്കുമെന്ന് മന്ത്രാലയം മുന്നറിയിപ്പ് നല്‍കി.

സമൂഹത്തിന് ദോഷകരമായി ബാധിക്കുന്ന തരത്തില്‍ സോഷ്യല്‍ മീഡിയ പ്ലാറ്റ്ഫോമുകള്‍ ഉപയോഗിക്കരുത്. സമൂഹത്തിന്റെ വിവിധ വിഭാഗങ്ങള്‍ക്കിടയില്‍ സമാധാനപരമായ സഹവര്‍ത്തിത്വം കാത്തുസൂക്ഷിക്കുന്ന കാര്യത്തില്‍ എല്ലാവര്‍ക്കും ഉത്തരവാദിത്തമുണ്ടെന്നും മന്ത്രാലയം നിര്‍ദേശിച്ചു.