യുഎഇയില്‍ നിന്ന് വാക്സിന് സ്വീകരിച്ചവര്‍ക്ക് മാത്രമേ അബുദാബി, ഷാര്‍ജ തുടങ്ങിയ വിമാനത്താവളങ്ങളില്‍ പ്രവേശനാനുമതിയുള്ളൂ എന്നാണ് റിപ്പോര്‍ട്ട്
ദുബായ്: യുഎഇയില്‍ നിന്ന് വാക്സിന് എടുത്ത ഇന്ത്യക്കാര്‍ക്ക് യാത്രാനുമതി നല്‍കിയതിനു പിന്നാലെ വാക്സിന് എടുക്കാത്തവര്‍ക്കും ദുബായിലേക്ക് പ്രവേശനാനുമതി. ദുബായില്‍ റെസിഡന്‍സ് വിസയുള്ളവര്‍ക്കാണ് ഈ രീതിയില്‍ ഇന്ത്യയില്‍ നിന്ന് ദുബായ് വിമാനത്താവളത്തിലേക്ക് യാത്ര ചെയ്യാനാവുക. എന്നാല്‍ ജനറല്‍ ഡയരക്ടറേറ്റ് ഓഫ് റെസിഡന്‍സി ആന്റ് ഫോറിന്‍ അഫയേഴ്‌സിന്റെ (ജിഡിആര്‍എഫ്എ) മുന്‍കൂര്‍ അനുമതി ഉള്ളവര്‍ക്കു മാത്രമേ ഇത് സാധ്യമാവൂ എന്ന് ഖലീജ് ടൈംസ് റിപ്പോര്‍ട്ട് ചെയ്തു. യുഎഇയില്‍ നിന്ന് വാക്‌സിനെടുത്തവര്‍ക്ക് പുറമെ ഇന്ത്യയില്‍ നിന്ന് കോവിഷീല്‍ഡ് വാക്സിനെടുത്തവര്‍ക്കും ദുബായിലേക്ക് യാത്ര ചെയ്യാമെന്ന് വിമാന കമ്പനികള്‍ അറിയിച്ചതിനു പിന്നാലെയാണ് പുതിയ വാര്‍ത്ത പുറത്തുവന്നിരിക്കുന്നത്.
ദുബായിലേക്ക് വേണ്ടത് മൂന്ന് രേഖകള്‍
ജിഡിആര്‍എഫ്എയുടെ അനുമതിക്കൊപ്പം യാത്ര തിരിക്കുന്നതിന് 48 മണിക്കൂറിനുള്ളില്‍ നടത്തിയ പിസിആര്‍ പരിശോധനയിലെ നെഗറ്റീവ് സര്‍ട്ടിഫിക്കറ്റും പുറപ്പെടുന്ന വിമാനത്താവളത്തില്‍ നിന്ന് നാലു മണിക്കൂറിനിടയില്‍ എടുത്ത റാപ്പിഡ് ടെസ്റ്റ് റിസല്‍ട്ടും കൈയില്‍ കരുതണം. ഈ രണ്ട് സര്‍ട്ടിഫിക്കറ്റുകള്‍ മാത്രമേ വിമാനത്താവളങ്ങളിലെ ചെക്കിന്‍ കൗണ്ടറില്‍ നിന്ന് എയര്‍ലൈന്‍ അധികൃതര്‍ പരിശോധിക്കുന്നുള്ളൂ എന്നും ഖലീജ് ടൈംസ് വ്യക്തമാക്കി. ഇക്കാര്യം എമിറേറ്റ്‌സ് എയര്‍ലൈന്‍സ് തങ്ങളുടെ ട്വിറ്റര്‍ അക്കൗണ്ടില്‍ ഒരു യാത്രക്കാരന്റെ സംശയത്തിന് മറുപടിയായി നല്‍കിയിട്ടുമുണ്ട്.
ദുബായ് വിമാനത്താവളത്തില്‍ ഇറങ്ങാന്‍ മൂന്ന് രേഖകളാണ് ദുബായ് സിവില്‍ ഏവിയേഷന്‍ അധികൃതര്‍ ആവശ്യപ്പെട്ടിരിക്കുന്നതെന്ന് എയര്‍ ഇന്ത്യയും വ്യക്തമാക്കി. ജിഡിആര്‍എഫ്എയുടെ അംഗീകാരം, പിസിആര്‍ നെഗറ്റീവ് സര്‍ട്ടിഫിക്കറ്റ്, റാപ്പിഡ് ടെസ്റ്റിലെ നെഗറ്റീവ് റിസല്‍ട്ട് എന്നിവയാണ് മൂന്ന് രേഖകള്‍. ഇതേകാര്യങ്ങള്‍ ചൂണ്ടിക്കാട്ടി വിസ്താര എയര്‍ലൈന്‍സ് ട്രാവല്‍ ഏജന്‍സികള്‍ക്കും മറ്റും അറിയിപ്പ് നല്‍കുകയും ചെയ്തിട്ടുണ്ട്. എന്നാല്‍ ദുബായ് സിവില്‍ ഏവിയേഷന്‍ അധികൃതരില്‍ നിന്ന് ഔദ്യോഗിക പ്രഖ്യാപനമൊന്നും ഇക്കാര്യത്തില്‍ ഉണ്ടായിട്ടില്ല.
അബുദാബിയിലും ഷാര്‍ജയിലും ഇളവില്ല
യുഎഇയില്‍ നിന്ന് വാക്സിന് സ്വീകരിച്ചവര്‍ക്ക് മാത്രമേ അബുദാബി, ഷാര്‍ജ തുടങ്ങിയ വിമാനത്താവളങ്ങളില്‍ പ്രവേശനാനുമതിയുള്ളൂ എന്നാണ് റിപ്പോര്‍ട്ട്. മൂന്നു മാസത്തെ യാത്രാ വിലക്കിനു ശേഷം കഴിഞ്ഞയാഴ്ചയാണ് ഇന്ത്യയടക്കം ആറു രാജ്യക്കാര്‍ക്ക് യുഎഇയിലേക്ക് നിബന്ധനകളോടെ പ്രവേശനാനുമതി നല്‍കിയത്. പാകിസ്താന്‍, നേപ്പാള്‍, ശ്രീലങ്ക, നൈജീരിയ, ഉഗാണ്ട എന്നിവയാണ് യാത്രാനുമതി നല്‍കപ്പെട്ട മറ്റ് രാജ്യങ്ങള്‍. അതേസമയം, ഡോക്ടര്‍മാര്‍, നഴ്‌സുമാര്‍ ടെക്‌നീഷ്യന്‍മാര്‍ ഉള്‍പ്പെടെ ആരോഗ്യ മേഖലയിലെ ജീവനക്കാര്‍, വിദ്യാഭ്യാസ മേഖലയില്‍ പ്രവര്‍ത്തിക്കുന്നവര്‍, വിദ്യാര്‍ഥികള്‍, മാനുഷിക പരിഗണന അര്‍ഹിക്കുന്നവര്‍, ഫെഡറല്‍ സ്ഥാപനങ്ങളിലെയും പ്രാദേശിക സര്‍ക്കാര്‍ സ്ഥാപനങ്ങളിലെയും ജീവനക്കാര്‍, യുഎഇയില്‍ ചികില്‍സയില്‍ കഴിയുന്നവരില്‍ തുടര്‍ ചികില്‍സ ആവശ്യമുള്ളവര്‍ തുടങ്ങിയവര്‍ക്ക് വാക്‌സിനെടുക്കാതെ തന്നെ യുഎഇയിലേക്ക് വരാന്‍ അനുമതിയുണ്ട്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : vaccinated passengers can travel to dubai
Malayalam News from malayalam.samayam.com, TIL Network
