കുവൈറ്റ് സിറ്റി: ബെല്ലി ഡാന്‍സില്‍ പരിശീലന കോഴ്‌സ് നടത്താന്‍ പദ്ധതിയിട്ട കുവൈറ്റിലെ നൃത്ത പരിശീലന സ്ഥാപനം അധികൃതര്‍ അടച്ചുപൂട്ടി. ജഹ്‌റ ഏരിയയിലെ സ്വകാര്യ നൃത്ത പരിശീലന സ്ഥാപനത്തിന്റെ ആസ്ഥാന ഓഫീസാണ് അധികൃതര്‍ അടപ്പിച്ചത്. സ്ത്രീകള്‍ക്കായി മാത്രം നൃത്ത പരിശീലനം നല്‍കുന്ന കേന്ദ്രമായിരുന്നു ഇത്. ഇവിടെ പുരുഷന്‍മാര്‍ക്ക് പ്രവേശനമുണ്ടായിരുന്നില്ല. രാജ്യത്തെ നിയമങ്ങള്‍ക്കും സാംസ്‌കാരിക മൂല്യങ്ങളും വിരുദ്ധമാണെന്ന് ചൂണ്ടിക്കാട്ടിയാണ് വാണിജ്യ- വ്യവസായ മന്ത്രാലയം കേന്ദ്രം അടച്ചുപൂട്ടിയതെന്ന് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു.
കുവൈറ്റ് ലൈസന്‍സ് നല്‍കാറില്ല
ബെല്ലി ഡാന്‍സ് പോലുള്ള പരിപാടികള്‍ക്ക് കുവൈറ്റ് ലൈസന്‍സ് നല്‍കാറില്ലെന്ന് മന്ത്രാലയത്തെ ഉദ്ധരിച്ച് അല്‍ റായ് പത്രം റിപ്പോര്‍ട്ട് ചെയ്തു. ആരോഗ്യ ക്ലബ്ബുകള്‍ക്കും സ്ഥാപനങ്ങള്‍ക്കുമാണ് മന്ത്രാലയം ലൈസന്‍സ് നല്‍കാറുള്ളത്. ഇവിടെ വിവിധ രീതിയിലുള്ള വ്യായാമ മുറകള്‍ അഭ്യസിക്കാനും പരിശീലിക്കാനും അനുവാദമുണ്ടെങ്കിലും രാജ്യത്തിലെ നിയമവും സംസ്‌ക്കാരവും അനുവദിക്കാത്ത ബെല്ലി ഡാന്‍സ് പോലുള്ള പ്രവര്‍ത്തനങ്ങള്‍ അനുവദിക്കാനാവില്ലെന്നും അധികൃതര്‍ വ്യക്തമാക്കി.
നിയമ ലംഘനം കണ്ടെത്തി
ബെല്ലി ഡാന്‍സ് കോഴിസ് നടത്തുന്നതിലൂടെ ലൈസന്‍സ് വ്യവസ്ഥകളുടെ ലംഘനം നടത്തിയെന്ന് ചൂണ്ടിക്കാട്ടി പാര്‍ലമെന്റംഗം ഫായിസ് ഗാനം അല്‍ ജുംഹൂര്‍ സ്വകാര്യ സ്ഥാപനത്തിനെതിരേ വാണിജ്യ- വ്യവസായ മന്ത്രി ഡോ. അബ്ദുല്ല അല്‍ സല്‍മാന് നല്‍കിയ പരാതിയെ തുടര്‍ന്നാണ് നടപടിയെടുത്തത്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : belly dance training centre closed down kuwait
Malayalam News from malayalam.samayam.com, TIL Network
