തടിയും വയറുമെല്ലാം പലരും സൗന്ദര്യ പ്രശ്‌നമായി കാണുമെങ്കിലും ഇത് പ്രധാനമായും ആരോഗ്യ പ്രശ്‌നം കൂടിയാണ്. തടിയേക്കാള്‍ വയര്‍ കൂടുതല്‍ അപകടകാരിയാണ്. തടി കുറവുള്ളവര്‍ക്കു പോലും ചാടുന്ന വയര്‍ വലിയ പ്രശ്‌നമാണ്. ഇത് വരുത്തുന്ന രോഗങ്ങളാകട്ടെ, ചില്ലറയുമല്ല. പെട്ടെന്ന് കൊഴുപ്പടിഞ്ഞു കൂടുന്ന ഒരിടമാണ് വയര്‍. വന്നാലാകട്ടെ പോകാന്‍ ഏറെ പണിപ്പെടുകയും വേണം. വയറ്റിലെ കൊഴുപ്പിന് കാരണങ്ങള്‍ പലതാണ്. ഭക്ഷണ ശീലം, വ്യായാമക്കുറവ്, സ്‌ട്രെസ് പോലുള്ളവ, സ്ത്രീകള്‍ക്കെങ്കില്‍ ഗര്‍ഭധാരണ, പ്രസവം പോലുള്ള കാര്യങ്ങള്‍ എല്ലാം ഇതില്‍ പെടും. ചാടുന്ന വയര്‍ കുറയ്ക്കാനുള്ള പല പ്രയോഗങ്ങളും പണ്ടു മുതല്‍ തന്നെ പറഞ്ഞു വരുന്നു. ഇത്തരത്തില്‍ വീട്ടില്‍ ചെയ്യാവുന്ന ഒരു പരിഹാര വഴിയെ കുറിച്ചറിയൂ.

ഗ്രാമ്പൂ

ഇതിന് വേണ്ടത് രണ്ടേ രണ്ടു ചേരുവകള്‍ മാത്രമാണ്. ഗ്രാമ്പൂ അഥവാ കരയാമ്പൂ, പിന്നെ ചെറുനാരങ്ങ. മസാലയായി ഉപയോഗിയ്ക്കുന്ന ഗ്രാമ്പൂവിന് ഏറെ ഗുണങ്ങളുണ്ട്. ഗ്രാമ്പൂ ഫൈബർ, വിറ്റാമിൻ സി, വിറ്റാമിൻ കെ എന്നിവയാൽ സമ്പുഷ്ടമാണ്. വിറ്റാമിൻ സി, വിറ്റാമിൻ കെ എന്നിവ രോഗ പ്രതിരോധശേഷി വർദ്ധിപ്പിക്കുകയും രക്തം കട്ടപിടിക്കുന്നതിൽ നിന്ന് തടയുവാൻ സഹായിക്കുകയും ചെയ്യുമ്പോൾ, ഇതിൽ അടങ്ങിയിരിക്കുന്ന മാംഗനീസ് ഓർമ്മശക്തി വർദ്ധിപ്പിക്കുന്നു. ഈ സുഗന്ധവ്യഞ്ജനം ചൂടുള്ള പാനീയങ്ങൾക്ക് രുചി പകരുവാനും വ്യത്യസ്ത ഭക്ഷണങ്ങളിൽ മസാലകളായും ചേർത്ത് ഉപയോഗിക്കുന്നു. കരളിന്റെ ആരോഗ്യം മെച്ചപ്പെടുത്തുവാനും രക്തത്തിലെ പഞ്ചസാരയുടെ അളവ് സ്ഥിരപ്പെടുത്തുന്നതിനും സഹായിക്കുന്ന ഔഷധ ഗുണങ്ങളും ഗ്രാമ്പൂവിലുണ്ട്.

ചെറുനാരങ്ങ

വയര്‍ കുറയ്ക്കാന്‍ സഹായിക്കുന്ന വീട്ടു വൈദ്യങ്ങളില്‍ പ്രധാനപ്പെട്ടതാണ് ചെറുനാരങ്ങ. ആരോഗ്യത്തിനും സൗന്ദര്യത്തിനും മുടിയ്ക്കുമെല്ലാം ഒരു പോലെ സഹായിക്കുന്ന ഒന്നാണിത്. ഇതിലെ വൈറ്റമിന്‍ സി, സിട്രിക് ആസിഡ് എന്നിവയാണ് വയര്‍ കുറയ്ക്കാന്‍ സഹായിക്കുന്ന പ്രധാനപ്പെട്ട ഘടകങ്ങള്‍. ശരീരത്തിന്റെ ചൂടു വര്‍ദ്ധിപ്പിച്ച് അപചയ പ്രക്രിയ ശക്തിപ്പെടുത്തി ഇത് ശരീരത്തിലെ കൊഴുപ്പു നീക്കുന്നു. ഇതു പോലെ ശരീരത്തിലെ കൊഴുപ്പു പുറന്തള്ളാന്‍ വൈറ്റമിന്‍ സി ഏറെ നല്ലതുമാണ്. നല്ല ദഹനത്തിനും ശോധനയ്ക്കുമെല്ലാം സഹായിക്കുന്നതിലൂടെയും ഇത് വയറ്റിലെ കൊഴുപ്പു നീക്കാന്‍ സഹായിക്കുന്നു. ഗ്യാസ്, അസിഡിറ്റി പ്രശ്‌നങ്ങള്‍ക്കുള്ള നല്ലൊരു പരിഹാരം കൂടിയാണിത്.

​ഇതുണ്ടാക്കാന്‍

ഇതുണ്ടാക്കാന്‍ ഏറെ എളുപ്പമാണ്. ഇതിനായി വേണ്ടത് ഒരു ടീസ്പൂണ്‍ ഗ്രാമ്പൂവാണ്. ഒരു പകുതി ചെറുനാരങ്ങയും. ചെറുനാരങ്ങ തൊലിയോടെ ചെറിയ കഷ്ണങ്ങളായി മുറിയ്ക്കുക. ഇതും ഗ്രാമ്പൂവും രണ്ടു ഗ്ലാസ് വെള്ളത്തില്‍ ഇട്ടു ചെറുചൂടില്‍ തിളപ്പിയ്ക്കുക. ഇത് ഒന്നര ഗ്ലാസാകുമ്പോള്‍ വാങ്ങി വയ്ക്കാം. ഊറ്റിയെടുക്കുക. ഇത് രാവിലെ പ്രാതലിന് ശേഷവും രാത്രി ഡിന്നറിന് മുന്‍പും ആയി രണ്ടു തവണയായി കുടിയ്ക്കാം. ഭക്ഷണവും ഇത് കുടിയ്ക്കുന്നതും തമ്മില്‍ അര മണിക്കൂര്‍ ഗ്യാപ് നല്ലതാണ്. ദിവസവും കുടിച്ചില്ലെങ്കിലും ആഴ്ചയില്‍ മൂന്നു നാലു തവണ ഇതു കുടിയ്ക്കാം.

​ഗ്രാമ്പൂവും നാരങ്ങയും

ഗ്രാമ്പൂവും നാരങ്ങയും ചേര്‍ന്ന ഈ കോമ്പോ ശരീരത്തിലെ അപചയ പ്രക്രിയ ശക്തിപ്പെടുത്തുന്നു. ശരീരത്തിലെ ചൂടു കൂട്ടി കൊഴുപ്പു പുറന്തള്ളുന്നു. ഇതാണ് തടി പോകാനുളള ഒരു വഴി. ഇതു പോലെ തന്നെ ഇത് നല്ല ദഹനത്തിന് സഹായിക്കുന്ന ഒന്നും കൂടിയാണ്. ഇതും വയര്‍ കുറയ്ക്കാന്‍ സഹായിക്കുന്നു. കുടല്‍ ആരോഗ്യത്തിനും വായയുടെ ആരോഗ്യത്തിനുമെല്ലാം ഇതേറെ നല്ലതാണ്. ഗ്രാമ്പൂവും നാരങ്ങയും ആന്റി ഓക്‌സിഡന്റുകളാല്‍ സമ്പുഷ്ടമാണ്.