കയറി പിടിച്ച് ചുംബിച്ചു, അശ്ലീല സംസാരം; പരാതിയുമായി 11 സ്ത്രീകൾ; ഒടുവിൽ ന്യൂയോർക്ക് ഗവർണർ രാജിവെച്ചു

ന്യുയോര്‍ക്ക്: ലൈംഗികാരോപണങ്ങളെത്തുടർന്ന് രാജി സമ്മർദ്ദം ശക്തമായതോടെ ന്യൂയോര്‍ക്ക് ഗവര്‍ണര്‍ ആന്‍ഡ്ര്യൂ കുമോ രാജിവെച്ചു. 11 സ്ത്രീകൾ ഉയർത്തിയ ആരോപണങ്ങളിൽ കഴമ്പുണ്ടെന്ന് തെളിഞ്ഞ അതേസാഹചര്യത്തിലാണ് കുമോയുടെ രാജി. എനിക്ക് ഇപ്പോൾ ഏറ്റവും നല്ലത് മാറി നിൽക്കുന്നതാണെന്ന് ആരോപണങ്ങൾ നിഷേധിച്ചുകൊണ്ടുള്ള മുൻ നിലപാടിൽ ഉറച്ച് നിന്നുകൊണ്ട് അദ്ദേഹം പറഞ്ഞു.



കുമോയുടെ രാജി പ്രാബല്യത്തില്‍ വരാൻ 14 ദിവസമെടുക്കും. ലെഫ്റ്റനന്‍റ് ഗവര്‍ണര്‍ കാത്തി ഹോച്ചലിനാണ് ആന്‍ഡ്ര്യൂ കുമോ അധികാരം കൈമാറുക. ന്യൂയോർക്ക് അറ്റോർണി ജനറലിന്‍റെ ഓഫീസ് നടത്തിയ സ്വതന്ത്ര അന്വേഷണത്തിൽ 63കാരനായ കുമോ 11 സ്ത്രീകളെ ലൈംഗികമായി പീഡിപ്പിച്ചെന്ന് കണ്ടെത്തിയിരുന്നു. ജീവനക്കാർ ഉൾപ്പെടെയുള്ളവരെയാണ് ഇദ്ദേഹം പീഡിപ്പിച്ചത്.

Also Read : നാലാമത്തെ കുട്ടിക്ക് ബിഷപ്പ് മാമോദീസ നല്‍കും; കൂടുതൽ മക്കളുണ്ടാകാൻ പ്രോത്സാഹനവുമായി ലത്തീൻ സഭയും



ലൈംഗിക പരാമർശങ്ങൾ നടത്തിയെന്നും അനുവാദമില്ലാതെ ശരീരത്തിൽ കയറി പിടിച്ചെന്നും ചുംബിച്ചുവെന്നുമായിരുന്നു സ്ത്രീകൾ ആരോപിച്ചിരുന്നത്. റിപ്പോർട്ടിന് പിന്നാലെ ഡെമോക്രാറ്റ് അംഗങ്ങൾ തന്നെ കുമോയ്ക്കെതിരെ രംഗത്തെത്തി. ഈ സാഹചര്യത്തിലാണ് ഗവർണർ സ്ഥാനം രാജിവെച്ചുകൊണ്ടുള്ള പ്രഖ്യാപനം.

ഇംപീച്ച്‌മെന്‍റ് നടപടികളിലേക്ക് കടക്കാനുള്ള ആലോചനകൾ ആരംഭിച്ചപ്പോഴാണ് കുമോ രാജിക്ക് തയാറായതെന്നാണ് അന്താരാഷ്ട്ര മാധ്യമമായ ബിബിസി റിപ്പോർട്ട് ചെയ്യുന്നത്.

Also Read : ബെംഗളൂരുവിൽ അഞ്ച് ദിവസത്തിനിടെ 242 കുട്ടികൾക്ക് കൊവിഡ്: മൂന്നിരട്ടി വരെ കൂടുമെന്ന് മുന്നറിയിപ്പ്



അതേസമയം തനിക്കെതിരെ ഉയർന്ന ആരോപണങ്ങള്‍ പെണ്‍മക്കളുമായുള്ള ബന്ധത്തെപ്പോലും ബാധിച്ചുവെന്നാണ് കുമോ പറയുന്നത്. ഒരുമിച്ചിരിക്കവെ ഇത്തരം ആരോപണങ്ങൾ കേൾക്കുമ്പോൾ അവരുടെ കണ്ണുകളും മുഖത്തെ ഭാവങ്ങളും എന്നെ വേദനിപ്പിച്ചുവെന്നും അദ്ദേഹം കൂട്ടിച്ചേർത്തു.