തെരഞ്ഞെടുപ്പുമായി ബന്ധപ്പെട്ട തര്‍ക്കങ്ങളെ തുടര്‍ന്ന് ദോഹയിലെ അമീരി ദിവാന് ആക്രമിക്കാനെത്തിയ ഗോത്ര വിഭാഗങ്ങള്‍ ആക്രമണം നടത്തുന്നതായാണ് അടിക്കുറിപ്പില്‍ പറയുന്നത്.
വീഡിയോ പ്രചരിച്ചത് ട്വിറ്റര്‍ അക്കൗണ്ടില്‍ നിന്ന്
വേള്‍ഡ് കൗണ്‍സില്‍ ഫോര്‍ യൂത്ത് എന്ന പേരിലുള്ള ട്വിറ്റര്‍ അക്കൗണ്ടിലാണ് യന്ത്രത്തോക്കുകളുമായി ആകാശത്തേക്ക് വെടിയുതിര്‍ക്കുന്നതിന്റെ വീഡിയോ പോസ്റ്റ് ചെയ്തിരിക്കുന്നത്. തെരഞ്ഞെടുപ്പുമായി ബന്ധപ്പെട്ട തര്‍ക്കങ്ങളെ തുടര്‍ന്ന് ദോഹയിലെ അമീരി ദിവാന് ആക്രമിക്കാനെത്തിയ ഗോത്ര വിഭാഗങ്ങള്‍ ആക്രമണം നടത്തുന്നതായാണ് അടിക്കുറിപ്പില്‍ പറയുന്നത്. അല്‍ജസീറ വാര്‍ത്ത മുക്കുകയാണെന്നും ഖത്തര്‍ അമീര്‍ അപ്രത്യക്ഷനായെന്നുമുള്ള വ്യാജപ്രചാരണങ്ങളും പോസ്റ്റിലുണ്ട്.
യമനിലെ വിവാഹച്ചടങ്ങിന്റെ വീഡിയോ എന്ന് കണ്ടെത്തല്‍
രാത്രിയില്‍ ഷൂട്ട് ചെയ്തതാണ് വീഡിയോ. ഒരു കെട്ടിടത്തിന് സമീപത്ത് നിര്‍ത്തിയിട്ടിരിക്കുന്ന നിരവധി വാഹനങ്ങളുടെ ചുറ്റില്‍ നിന്നുമായി വെടിയുതിര്‍ക്കുന്നതാണ് വീഡിയോ. സാധാരണ ഖത്തരികള്‍ ധരിക്കാറുള്ള വെളുത്ത തൗബിന് പകരം ടീഷര്‍ട്ട് ധരിച്ച ആളുകളാണ് വെടിവയ്പ്പ് നടത്തുന്നത്. എന്നാല്‍ അന്താരാഷ്ട്ര വാര്‍ത്താ ഏജന്‍സിയായ എഎഫ്പി നടത്തിയ പരിശോധനയില്‍ വീഡിയോ ഖത്തറില്‍ നിന്നുള്ളതല്ലെന്ന് വ്യക്തമായി. യെമനിലെ ഹദ്റമൗത്തില്‍ വാദീ ഹനീന്‍ ഏരിയയില്‍ നടന്ന ഒരു വിവാഹ ചടങ്ങിനനിടെ ആഘോഷത്തിന്റെ ഭാഗമായി നടത്തിയ വെടിവയ്പ്പാണ് വീഡിയോയില്‍ ഉള്ളതെന്ന് എഎഫ്പി വ്യക്തമാക്കി. 2020 ഫെബ്രുവരിയില്‍ യുട്യൂബില്‍ പോസ്റ്റ് ചെയ്ത വീഡിയോ ആണിത്.
ലക്ഷ്യം ശൂറാ കൗണ്‍സില്‍ തെരഞ്ഞെടുപ്പ്
ഖത്തറിലെ ശൂറാ കൗണ്‍സിലിലേക്ക് നടക്കാനിരിക്കുന്ന തെരഞ്ഞെടുപ്പിന് മുന്നോടിയായി രാജ്യത്തിലെ ജനങ്ങളെ ഇളക്കിവിടുകയും അമീറിനെതിരായ ജനവികാരം സൃഷ്ടിക്കുകയും ചെയ്യുകയെന്ന ലക്ഷ്യത്തോടെ പോസ്റ്റ് ചെയ്തതാണ് വീഡിയോ എന്നാണ് നിരീക്ഷകര്‍ വിലയിരുത്തുന്നത്. ഇതേ ട്വിറ്റര്‍ അക്കൗണ്ടില്‍ നിന്ന് ഖത്തറിനെതിരേ നേരത്തേയും നിരവധി വ്യാജ വിവരങ്ങള്‍ ഷെയര്‍ ചെയ്യപ്പെട്ടതായി റിപ്പോര്‍ട്ടുകളുണ്ടായിരുന്നു. ഖത്തറില്‍ ഒക്ടോബറില്‍ നടക്കാനിരിക്കുന്ന ശൂറ കൗണ്‍സില്‍ തിരഞ്ഞെടുപ്പിലേക്കുള്ള വോട്ടര്‍ പട്ടികയില്‍ പേര് ചേര്‍ക്കുന്നതുമായി ബന്ധപ്പെട്ട ചെറിയ പ്രതിഷേധങ്ങളെ പര്‍വതീകരിച്ച് #Qatar_Revolts എന്ന ഹാഷ് ടാഗിലായിരുന്നു വ്യാജ പ്രചാരണം. നിരവധി അക്കൗണ്ടുകളില്‍ നിന്ന് ഒരേ സമയം നടക്കുന്ന പ്രചാരണം ആസൂത്രിതമാണെന്ന് പരിശോധനയില്‍ വ്യക്തമായതായി ദോഹ ന്യൂസ് റിപോര്‍ട്ട് ചെയ്തിരുന്നു.
വോട്ടര്‍ പട്ടിക: പരാതിപ്പെടാനുള്ള സമയം നീട്ടി
അതിനിടെ, ഖത്തര്‍ ശൂറ കൗണ്‍സില്‍ തിരഞ്ഞെടുപ്പിനുള്ള വോട്ടര്‍ പട്ടികയില്‍ പരാതിയും തടസ്സവും ഉന്നയിക്കാനുള്ള സമയം ഒരാഴ്ച്ച കൂടി നീട്ടിയതായി ആഭ്യന്തര മന്ത്രാലയം അറിയിച്ചു. വോട്ടര്‍ പട്ടികയില്‍ പരാതി സമര്‍പ്പിക്കാനുള്ള തിയ്യതി ഇന്നലെ അവസാനിച്ചിരുന്നു. ഇതുമായി ബന്ധപ്പെട്ട് നിരവധി അപേക്ഷകള്‍ ലഭിച്ച പശ്ചാത്തലത്തിലാണ് തീരുമാനം. ഇതിനകം പട്ടികയെക്കുറിച്ച് നിരവധി പരാതികള്‍ ലഭിച്ചതായും അവയില്‍ വലിയൊരു ഭാഗവും പരിഹരിച്ചതായും ശൂറ കൗണ്‍സില്‍ തിരഞ്ഞെടുപ്പ് മേല്‍നോട്ട സമിതി വൈസ് ചെയര്‍മാന്‍ ബ്രിഗേഡിയര്‍ സാലിം സഖര്‍ അല്‍ മുറൈഖി അറിയിച്ചു. പൗരത്വ ഉപാധികള്‍, ഒരു ജില്ലയില്‍ നിന്ന് മറ്റൊരു ജില്ലയിലേക്ക് വോട്ട് മാറ്റല്‍ എന്നിവയുമായി ബന്ധപ്പെട്ടവയാണ് പരാതികളില്‍ ഏറെയും. അന്തിമ വോട്ടര്‍ പട്ടിക ആഗസ്ത് 22ന് പ്രസിദ്ധീകരിക്കുമെന്നാണ് നേരത്തേ അറിയിച്ചിരുന്നത്. പുതിയ സാഹചര്യത്തില്‍ തീയതി നീട്ടുമോ എന്ന കാര്യം വ്യക്തമല്ല.
സോഷ്യല്‍ മീഡിയയില്‍ പ്രചരിക്കുന്ന വീഡിയോ
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : gunshot outside amiri diwan video is actually a wedding in yemen
Malayalam News from malayalam.samayam.com, TIL Network
