ഇന്ത്യന്‍ സ്‌കൂളുകള്‍ ഉള്‍പ്പെടെയുള്ള വിദേശ സ്വകാര്യ സ്‌കൂളുകളുടെ കാര്യത്തില്‍ പൊതുവായ തീരുമാനം പ്രഖ്യാപിച്ചിട്ടില്ല.
കുവൈറ്റ് സിറ്റി: ഏറെ കാലത്തെ കാത്തിരിപ്പിനൊടുവില്‍ കുവൈറ്റ് സ്‌കൂളുകളില്‍ നേരിട്ടുള്ള ക്ലാസ്സുകള്‍ ആരംഭിക്കാന്‍ തീരുമാനം. സ്വകാര്യ സ്‌കൂളുകള്‍ സെപ്തംബര്‍ 27നും പബ്ലിക് സ്‌കൂളുകള്‍ ഒക്ടോബര്‍ മൂന്നിനും നേരിട്ടുള്ള ക്ലാസ്സുകള്‍ ആരംഭിക്കുമെന്ന് വിദ്യാഭ്യാസ മന്ത്രി ഡോ. അലി അല്‍ മുദ്ഹഫ് അറിയിച്ചു. രാജ്യത്തെ അറബിക് അക്രഡിറ്റഡ് സ്‌കൂളുകള്‍ സര്‍ക്കാര്‍ സ്‌കൂളുകള്‍ തുറക്കുന്ന ഒക്ടോബര്‍ മൂന്നിന് തന്നെയാണ് തുറക്കുകയെന്നും ഓണ്‍ലൈനായി നടത്തിയ വാര്‍ത്താ സമ്മേളനത്തില്‍ മന്ത്രി അറിയിച്ചു.
നേരിട്ടുള്ള ക്ലാസ്സുകള്‍ ഇടവിട്ട ദിവസങ്ങളില്‍
നേരിട്ടുള്ള ക്ലാസ്സുകള്‍ രണ്ട് ഷിഫ്റ്റുകളിലായി നടത്താനാണ് തീരുമാനം. സര്‍ക്കാര്‍ സ്‌കൂളുകളില്‍ ഒരു വിഭാഗം കുട്ടികള്‍ക്ക് ഒരു ദിവസം നേരിട്ടുള്ള ക്ലാസ്സും അടുത്ത ദിവസം ഓണ്‍ലൈന്‍ ക്ലാസ്സുമായിരിക്കും. രണ്ടാമത്തെ വിഭാഗത്തിന് രണ്ടാം ദിവസം നേരിട്ടുള്ള ക്ലാസ്സും അടുത്ത ദിവസം ഓണ്‍ലൈന്‍ ക്ലാസ്സും നല്‍കും. എന്നാല്‍ ഇന്ത്യന്‍ സ്‌കൂളുകള്‍ ഉള്‍പ്പെടെയുള്ള വിദേശ സ്വകാര്യ സ്‌കൂളുകളുടെ കാര്യത്തില്‍ പൊതുവായ തീരുമാനം പ്രഖ്യാപിച്ചിട്ടില്ല. നേരിട്ടുള്ള ക്ലാസ്സാണോ ഓണ്‍ലൈനാണോ അതോ രണ്ടും ചേര്‍ന്നതാണോ എന്ന കാര്യത്തില്‍ ഓരോ സ്‌കൂളിനും തീരുമാനമെടുക്കാം.
അധ്യാപകര്‍ നേരത്തേ ഹാജരാവണം
എന്നാല്‍ അധ്യാപകര്‍ക്ക് ഏതാനും ദിവസങ്ങള്‍ക്ക് മുമ്പേ പ്രവൃത്തി ദിവസം ആരംഭിക്കും. കിന്റര്‍ഗാര്‍ട്ടന്‍, പ്രൈമറി, സെക്കന്ററി സ്‌കൂള്‍ എന്നിവിടങ്ങളില്‍ സപ്തംബര്‍ 19 മുതലും ഹൈസ്‌കൂളില്‍ സപ്തംബര്‍ 26 മുതലും ആയിരിക്കും അധ്യാപകരുടെയും മറ്റ് ജീവനക്കാരുടെയും പ്രവൃത്തി ദിനം ആരംഭിക്കുക. എന്നാല്‍ കൊവിഡ് വ്യാപനത്തിന്റെ പശ്ചാത്തലത്തില്‍ ഏര്‍പ്പെടുത്തിയ യാത്രാ നിരോധനം കാരണം ഇപ്പോഴും നാടുകളില്‍ കുടുങ്ങിക്കഴിയുന്ന അധ്യാപകരുടെ കാര്യത്തില്‍ വ്യക്തമായ തീരുമാനം ഇതുവരെ കൈക്കൊണ്ടിട്ടില്ല. 2000ത്തിലേറെ അധ്യാപകര്‍ ഇങ്ങിനെ കുവൈറ്റിന് പുറത്ത് കഴിയുന്നതായാണ് റിപ്പോര്‍ട്ട്. ഇവരില്‍ 60 ശതമാനത്തിലേറെയും സ്വകാര്യ സ്‌കൂള്‍ അധ്യാപകരാണ്.
വാക്‌സിന്‍ എടുക്കാത്തവര്‍ക്ക് പിസിആര്‍ ടെസ്റ്റ്
12 മുകളിലുള്ള കുട്ടികള്‍, അധ്യാപകര്‍ ഉള്‍പ്പെടെയുള്ള ജീവനക്കാര്‍ എന്നിവര്‍ പൂര്‍ണമായും വാക്‌സിനേഷന് വിധേയരായിട്ടില്ലെങ്കില്‍ അവര്‍ എല്ലാ ഞായറാഴ്ചയും പിസിആര്‍ നെഗറ്റീവ് സര്‍ട്ടിഫിക്കറ്റ് ഹാജരാക്കണമെന്നും വിദ്യാഭ്യാസ മന്ത്രി നിര്‍ദ്ദേശിച്ചു. അതേസമയം, വാക്‌സിനെടുക്കാത്ത രക്ഷിതാക്കളും മറ്റ് സന്ദര്‍ശകരും 72 മണിക്കൂറിനുള്ളില്‍ എടുത്ത പിസിആര്‍ ടെസ്റ്റിലെ നെഗറ്റീവ് റിസല്‍ട്ടുമായി വന്നാലേ അവര്‍ക്ക് സ്‌കൂളില്‍ പ്രവേശനം അനുവദിക്കുകയുള്ളൂ.
ക്ലാസ്സുകള്‍ പ്രത്യേകമായി സജ്ജീകരിക്കണം
ക്ലാസ്സുകളില്‍ കുട്ടികളുടെ എണ്ണം കുറച്ച് സാമൂഹ്യ അകലം പാലിക്കുന്ന രീതിയില്‍ ക്ലാസ്സുകള്‍ സജ്ജീകരിക്കുകയും ഹൈബ്രിഡ് ക്ലാസ്സ് രീതി അനുവര്‍ത്തിക്കുകയും വേണം. വിദ്യാര്‍ഥികള്‍ തമ്മില്‍ ചുരുങ്ങിയത് ഒരു മാറ്റര്‍ അകലം പാലിക്കുന്ന രീതിയിലായിരിക്കണം ക്ലാസ്സ് മുറികളില്‍ ഇരിപ്പിടങ്ങള്‍ സജ്ജീകരിക്കേണ്ടത്. കുട്ടികള്‍, അധ്യാപകര്‍, മറ്റ് ജീവനക്കാര്‍ എന്നിവര്‍ക്കിടയില്‍ കൃത്യമായ സാമൂഹിക അകലം പാലിക്കാന്‍ സംവിധാനമൊരുക്കുകയും എല്ലാവരും മാസ്‌ക്ക് ധരിക്കുന്നുവെന്ന് ഉറപ്പുവരുത്തുകയും വേണമെന്നും മന്ത്രി നിര്‍ദ്ദേശിച്ചു.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : kuwait private schools to reopen for in person classes on september 27
Malayalam News from malayalam.samayam.com, TIL Network
