2017-18 കാലയളവിൽ പാകിസ്ഥാനിലേക്ക് പോയ യുവാക്കളാണ് ഭീകരവാദ പ്രവർത്തനങ്ങളിൽ ഏർപ്പെട്ടതായി ഞങ്ങളുടെ ശ്രദ്ധയിൽപ്പെട്ടിട്ടുള്ളതെന്ന് ദിൽബാഗ് സിംഗ് രജൗരിയിൽ മാധ്യമപ്രവർത്തകരോട് പറഞ്ഞു.
57 പേരിൽ 30 പേർ ആയുധങ്ങളുമായി അനധികൃതമായി കശ്മീരിലേക്ക് പ്രവേശിച്ചിരുന്നെന്നും ഇവരിൽ 17 പേർ അവിടെ വെച്ച് കൊല്ലപ്പെട്ടുവെന്നും ഡി.ജി.പി വ്യക്തമാക്കി. ബാക്കിയുള്ള 13 ഇപ്പോഴും ജീവനോടെ ഉണ്ടെന്നും സുരക്ഷാ സേന അവരെ നിരീക്ഷിക്കുന്നുണ്ടെന്നും അദ്ദേഹം പറഞ്ഞു.
ഇക്കാരണത്താലാണ് പാകിസ്ഥാന്‍ വിസയ്ക്ക് അപേക്ഷിക്കുന്നവരുടെ സുരക്ഷാ ക്ലിയറൻസ് അധികൃതർ കൂടുതൽ ശക്തിപ്പെടുത്തുന്നതെന്ന് സിംഗ് മാധ്യമ പ്രവർത്തകരോട് പറഞ്ഞു.
യുവാക്കൾ പഠനത്തിനായി പാകിസ്ഥാനിലേക്ക് പോകുന്നു, എന്നാൽ തിരികെ എത്തുന്നത് തീവ്രവാദികളായാണ്. ഏത് സാഹചര്യത്തിലാണ് വിദ്യാർത്ഥികൾ പാകിസ്ഥാനിൽ തങ്ങുന്നതെന്ന് അറിയില്ലെന്നും ഡി.ജി.പി പറഞ്ഞു.
ഈ വർഷം ജൂണിൽ, ജമ്മുകശ്മീർ സ്റ്റുഡന്റ്സ് അസോസിയേഷൻ കശ്മീരിൽ നിന്ന് പാകിസ്ഥാനിലേക്കുള്ള പോകുന്ന നൂറോളം മെഡിക്കൽ, എൻജിനീയറിങ് വിദ്യാർത്ഥികളുടെ യാത്ര സുഗമമാക്കുന്നതിന് ഇടപെടണമെന്ന് അഭ്യർത്ഥിച്ചു കൊണ്ട് കേന്ദ്ര ആഭ്യന്തര മന്ത്രി അമിത് ഷായ്‍ക്കും കശ്മീർ ലെഫ്റ്റനന്റ് ഗവർണർ മനോജ് സിൻഹയ്‍ക്കും കത്ത് നൽകി.
ഇന്ത്യയിലെ ഇമിഗ്രേഷൻ ഉദ്യോഗസ്ഥർ ആവശ്യപ്പെട്ടതുപോലെ പാകിസ്ഥാനിൽ പഠിക്കുന്നതിന് ആവശ്യമായ നോ ഒബ്‍ജക്ഷൻ സർട്ടിഫിക്കറ്റ് നൽകണമെന്ന് ബന്ധപ്പെട്ട അധികാരികൾക്ക് കത്തിൽ ആവശ്യപ്പെട്ടു.
ഫെബ്രുവരി 20ന് ഇന്ത്യയും പാകിസ്താനും തമ്മിലുള്ള വെടിനിർത്തൽ കരാറിന് ശേഷം അതിർത്തി കടന്നുള്ള നുഴഞ്ഞുകയറ്റം നിലച്ചതാണ്. രജൗരിയിലെ തൻമന്ദി പ്രദേശത്ത് അടുത്തിടെ കൊല്ലപ്പെട്ട രണ്ട് ഭീകരരും പാകിസ്ഥാനിൽ നിന്ന് വന്ന ഒരു പുതിയ സംഘത്തിൽപ്പെട്ട ആളുകളായിരുന്നുവെന്ന് ജമ്മു & കശ്മീരിലെ തീവ്രവാദ പ്രവർത്തനങ്ങൾ വർദ്ധിച്ചതിനെ കുറിച്ച് സംസാരിക്കവെ ഡി.ജി.പി സിംഗ് പറഞ്ഞു.
നുഴഞ്ഞുകയറ്റത്തിന് പിന്നിൽ ഭീകരവാദികളുടെ പുതിയ സംഘമാണ്. ഇനിയും ഏറ്റുമുട്ടലിന് സാധ്യത ഉണ്ടെന്നും ഡിജിപി പറഞ്ഞു. തൻമന്ദിയിൽ അടുത്തിടെ ഉണ്ടായ ഏറ്റുമുട്ടലിൽ കൊല്ലപ്പെട്ട തീവ്രവാദികളിൽ ഒരാൾ പാകിസ്ഥാനിൽ പഠിക്കാൻ പോയ മകനാണെന്ന് ഷോപിയാനിലെ ഒരു കുടുംബം അറിയിച്ചിട്ടുണ്ടെന്നും ഇക്കാര്യത്തിൽ ഔദ്യോഗിക സ്ഥിരീകരണം നടത്താൻ ഡി.എൻ.എ സാമ്പിളുകൾ ശേഖരിച്ചിട്ടുണ്ടെന്നും ഡി.ജി.പി വ്യക്തമാക്കി.
****
