വനിതാ കേഡറ്റുകൾക്ക് കന്യകാത്വ പരിശോധന; വിവാദ നടപടി അവസാനിപ്പിച്ച് ഇന്തോനേഷ്യൻ ആർമി

ജക്കാര്‍ത്ത: സൈന്യത്തിൽ ചേരുന്നതിന് മുന്നോടിയായി വനിതകളിൽ നടത്തിയിരുന്ന കന്യകാത്വ പരിശോധന അവസാനിപ്പിച്ച് ഇന്തോനേഷ്യൻ ആർമി. കേഡറ്റുകളാകാൻ എത്തുന്ന വനിതകൾ കന്യകാത്വ പരിശോധന പൂർത്തിയാക്കണമെന്ന ഇന്തോനേഷ്യൻ ആർമിയുടെ നടപടി ഏറെ വിവാദമായിരുന്നു. നടപടിക്കെതിരെ കാലങ്ങളായി പ്രതിഷേധിച്ചിരുന്ന മനുഷ്യാവകാശ പ്രവർത്തകർ സൈന്യത്തിന്‍റെ പുതിയ തീരുമാനത്തെ സ്വാഗതം ചെയ്ത് രംഗത്തെത്തിയിട്ടുണ്ട്.

ഇന്തോനേഷ്യൻ സുരക്ഷാ സേനയിലെ കന്യകാത്വ പരിശോധനയെക്കുറിച്ച് 2014ൽ ന്യൂയോർക്ക് ആസ്ഥാനമായുള്ള ഹ്യൂമൻ റൈറ്റ്സ് വാച്ചാണ് വെളിപ്പെടുത്തൽ നടത്തിയത്. വർഷങ്ങളായി വനിതാ അപേക്ഷകരിൽ ഇത്തരം പരിശോധന നടക്കുന്നുണ്ടെന്നായിരുന്നു കണ്ടെത്തൽ. സംഭവത്തിന് പിന്നാലെ 2015ൽ നാഷണൽ പോലീസ് ഈ രീതി നിർത്തലാക്കിയെങ്കിലും ആർമി ടെസ്റ്റ് തുടരുകയായിരുന്നു.

കയറി പിടിച്ച് ചുംബിച്ചു, അശ്ലീല സംസാരം; പരാതിയുമായി 11 സ്ത്രീകൾ; ഒടുവിൽ ന്യൂയോർക്ക് ഗവർണർ രാജിവെച്ചു

റിക്രൂട്ട് ചെയ്യുന്നവരുടെ ധാർമ്മികത നിർണ്ണയിക്കുന്നതിൽ പരീക്ഷണം പ്രധാനമാണെന്നായിരുന്നു സൈന്യം മുമ്പ് പറഞ്ഞിരുന്നത്. എന്നാൽ കന്യാചർമ്മം ലൈംഗിക ബന്ധത്തിന്‍റെ വിശ്വസനീയമായ സൂചകമല്ലെന്നും പരിശോധനയ്ക്ക് ശാസ്ത്രീയമായ അടിത്തറയില്ലെന്നും ലോകാരോഗ്യസംഘടന വ്യക്തമാക്കിയിരുന്നു.

ഭീകരരെ വിവാഹം ചെയ്യാൻ യുവതികൾക്ക് ഭീഷണി; അഫ്ഗാനിസ്ഥാനിൽ അതിക്രമവുമായി താലിബാൻ

സൈന്യത്തിൽ ഇനി ഇത്തരം പരിശോധനകൾ ഉണ്ടാകില്ലെന്ന് ആര്‍മി മേധാവി ആണ്ടിക പെര്‍കാസ പറഞ്ഞു. കന്യാചർമ്മവുമായി ബന്ധപ്പെട്ട പരിശോധനകളൊന്നും ഉണ്ടാകില്ലെന്നാണ് മേധാവി വ്യക്തമാക്കിയതെന്ന് ആർമി വക്താവ് പ്രതികരിച്ചതായി സിഎൻഎന്നാണ് റിപ്പോർട്ട് ചെയ്തത്. സൈന്യത്തിൽ പ്രവേശനം ലഭിക്കാൻ പുരുഷന്മാർക്കും സ്ത്രീകൾക്കുമുള്ള നടപടികൾ ഒരുപോലെ ആയിരിക്കണമെന്നും ആണ്ടിക കഴിഞ്ഞമാസം പറഞ്ഞിരുന്നതാണ്.