കൺടെയ്ൻമെന്റ് സോണിൽ കൊവിഡ് ബാധിതരല്ലാത്തവർക്ക് വാക്സിൻ നൽകും; മുഖ്യമന്ത്രി

തിരുവനന്തപുരം: കൺടെയ്ൻമെന്റ് സോണിൽ കൊവിഡ്-19 ബാധിതരല്ലാത്ത മുഴുവൻ പേർക്കും പ്രതിരോധ വാക്സിൻ നൽകുമെന്ന് മുഖ്യമന്ത്രി പിണറായി വിജയൻ. കൺടെയ്ൻമെന്റ് സോണുകളിൽ എല്ലാവർക്കും പരിശോധന നടത്തും. കൊവിഡ് നെഗറ്റീവ് റിസൾട്ടുളുള്ള മുഴുവൻ പേർക്കും മുൻഗണന നൽകി വാക്സിൻ നൽകുമെന്നും കൊവിഡ് അവലോകന യോഗത്തിൽ മുഖ്യമന്ത്രി വ്യക്തമാക്കി.



19,49,640 ഓണക്കിറ്റുകള്‍ വിതരണം ചെയ്തു; കൂടുതല്‍ കിറ്റുകള്‍ വിതരണം ചെയ്തത് മലപ്പുറത്തെന്ന് ഭക്ഷ്യമന്ത്രി

സംസ്ഥാനത്ത് കൊവിഡ് കേസുകൾ ഉയർന്ന തോതിൽ തുടരുന്ന സാഹചര്യത്തിലാണ് കൺടെയ്ൻമെന്റ് സോണുകളിൽ വാക്സിനേഷൻ വേഗത്തിലാക്കുന്നത്. വാക്സിനേഷൻ യജ്ഞം വേഗത്തിലാക്കാൻ മുഖ്യമന്ത്രി നിർദേശം നൽകി. ജില്ലകൾ കേന്ദ്രീകരിച്ച് വിതരണം ചെയ്തിരിക്കുന്ന വാക്സിൻ ഡോസുകൾ സമയബന്ധിതമായി വിതരണം ചെയ്യണം.

ഓരോ ജില്ലയുടെയും വലുപ്പം കണക്കിലെടുത്ത് പത്ത് ജില്ലകൾ ഒരു ദിവസം 40,000 വാക്സിനേഷനും മറ്റ് നാല് ജില്ലകൾ 25,000 വാക്സിനേഷനും നൽകണം. വീടുകളിലെ കൊവിഡ് വ്യാപനം നിയന്ത്രിക്കാൻ ആവശ്യമായ ബോധവൽക്കരണ പരിപാടികൾ ആരോഗ്യവകുപ്പ് സംഘടിപ്പിക്കണം. പൊതു പരിപാടികൾക്കെല്ലാം അനുമതി വാങ്ങേണ്ടതുണ്ടെന്നും മുഖ്യമന്ത്രി പറഞ്ഞു.

സംസ്ഥാനത്ത് ഓഗസ്റ്റ് 14, 15, 16 തീയതികളിൽ വാക്സിനേഷൻ ഡ്രൈവ് നടത്തും. ഓണ്‍ലൈന്‍ ക്ലാസ്സുകള്‍, പരീക്ഷകള്‍, പ്ലസ് വണ്‍ പ്രവേശനം എന്നിവ ആരംഭിക്കേണ്ടതിനാല്‍ അധ്യാപകരെ കൊവിഡ് ഡ്യൂട്ടിയില്‍ നിന്നും ഒഴിവാക്കും. സർക്കാർ ഓഫീസുകളിൽ ഓണത്തോട് അനുബന്ധിച്ച് പൂക്കളം ഇടുന്നത് ഒഴികെയുള്ള ആഘോഷ പരിപാടികൾ ഒഴിവാക്കണമെന്നും അവലോകന യോഗത്തിൽ മുഖ്യമന്ത്രി വ്യക്തമാക്കി.

ഒഴിവിന് ആനുപാതികമായി ലിസ്റ്റ്; പിഎസ്‍സി റാങ്ക് പട്ടിക ചുരുക്കുന്ന കാര്യം ആലോചിക്കുന്നതായി മുഖ്യമന്ത്രി

അതേസമയം, കേരളത്തിൽ ഇന്ന് 20,452 പേര്‍ക്ക് കൊവിഡ് സ്ഥിരീകരിച്ചു. സംസ്ഥാനത്തെ ടെസ്റ്റ് പോസിറ്റിവിറ്റി നിരക്ക് 14.35 ആണ്. കഴിഞ്ഞ ദിവസങ്ങളിലുണ്ടായ 114 മരണങ്ങൾ കൊവിഡ് മൂലമാണെന്ന് സ്ഥിരീകരിച്ചതോടെ ആകെ മരണം 18,394 ആയി. 1,80,000 പേരാണ് രോഗം സ്ഥിരീകരിച്ച് ഇനി ചികിത്സയിലുള്ളത്. സംസ്ഥാനത്തെ വിവിധ ജില്ലകളിലായി 4,90,836 പേരാണ് ഇപ്പോള്‍ നിരീക്ഷണത്തിലുള്ളത്. 34,53,174 പേര്‍ ഇതുവരെ കൊവിഡില്‍ നിന്നും മുക്തി നേടി.