independence day 2021: സ്വാതന്ത്ര്യദിനത്തെക്കുറിച്ച് എങ്ങനെ ഉപന്യാസം തയ്യാറാക്കാം? ഉൾപ്പെടുത്തേണ്ടത് എന്തെല്ലം

കൊവിഡ്-19 മഹാമാരിയുടെ ഭീഷണിയിലും രാജ്യം അഭിമാനത്തോടെ സ്വാതന്ത്ര്യദിന ആഘോഷങ്ങളിൽ മുഴുകും. ഏത് ഭീഷണിക്കിടെയിലും ഇന്ത്യ മഹാരാജ്യത്തെ ഓരോ പൗരനും മറക്കാൻ കഴിയാത്ത ദിവസമാണ് ഓഗസ്റ്റ് 15. വർഷങ്ങൾ നീണ്ട ബ്രിട്ടീഷ് അടിച്ചമർത്തലുകളിൽ നിന്ന് പൂർവ്വികർ നമുക്ക് സ്വാതന്ത്രം നേടിത്തന്നതിൻ്റെ ഓർമ്മദിവസമാണ് ഓഗസ്റ്റ് പതിനഞ്ച്.



പ്രാണനേക്കാൾ വലുത് ജനിച്ച നാടും സ്വന്തം മണ്ണുമാണെന്ന് അഭിമാനത്തോടെയും ചങ്കൂറ്റത്തോടെയും ഉറക്കെ വിളിച്ചു പറയുകയും അധിനിവേശത്തിനെതിരെ പോരടിക്കുകയും ചെയ്ത ഒരു തലമുറ നമുക്കുണ്ടായിരുന്നു. ഇരുളിൽ നിന്ന് പ്രകാശമാനമായ ആകാശവും ഭൂമിയും ഭാരതീയന് നേടിത്തന്ന നമ്മുടെ പൂർവ്വികരെ ഓർക്കാതെയും അവരുടെ ഓർമ്മകൾക്കു മുന്നിൽ ശിരസ് നമിക്കാതെയും ഒരു സ്വാതന്ത്ര്യദിനവും പൂർണമാവില്ല.

ഓഗസ്‌റ്റ് 15 മോശം ദിവസമെന്ന് ജ്യോതിഷികൾ പറഞ്ഞോ; എന്താണ് സത്യം? ഇന്ത്യ മാത്രമല്ല ഈ ദിവസം സ്വാതന്ത്ര്യം ആഘോഷിക്കുന്നത്

രാജ്യം 75മത് സ്വാതന്ത്ര്യദിനത്തിൻ്റെ നിറവിൽ നിൽക്കുമ്പോഴും ചരിത്രവും വിവരങ്ങളും വളർന്നുവരുന്ന തലമുറയും അറിയേണ്ടതുണ്ട്. വീടുകളിൽ നിന്നും സ്കൂളുകളിൽ നിന്നും കുട്ടികൾ കൂടുതൽ അറിവുകൾ നേടേണ്ടതുണ്ട്. സ്വാതന്ത്ര്യദിനവുമായി ബന്ധപ്പെട്ട് കൂടുതൽ അറിവുകൾ നേടുന്നതിനൊപ്പം ചരിത്രം ആഴത്തിൽ അറിയാൻ വിദ്യാർഥികളെ സഹായിച്ചിരുന്നത് പ്രസംഗവും ഉപന്യാസ മത്സരങ്ങളുമാണ്. സ്കൂളുകൾ കേന്ദ്രീകരിച്ചും അല്ലാതെയും നടത്തുന്ന ഉപന്യാസ മത്സരങ്ങൾ തയ്യാറാക്കാൻ കുട്ടികളെ സഹായിക്കുന്നത് മാതാപിതാക്കളാണ്. എന്നാൽ എങ്ങനെയാണ് ഉപന്യാസ മത്സരങ്ങൾ തയ്യാറാക്കേണ്ടതെന്ന കാര്യത്തിൽ പലർക്കും ആശയക്കുഴപ്പം ഉണ്ടാകാറുണ്ട്. ഉൾപ്പെടുത്തേണ്ട വിഷയങ്ങൾ ഏതെല്ലാം ആണെന്ന് മനസിലാക്കാൻ കഴിയാത്തതാണ് കാരണം.

എല്ലാ വർഷവും ഓഗസ്റ്റ് 15ന് എന്തിനാണ് സ്വാതന്ത്ര്യദിനം ആഘോഷിക്കുന്നതെന്ന് ഉപന്യാസത്തിൽ പ്രധാനമായും ഉൾപ്പെടുത്തണം. സ്വാതന്ത്ര്യദിനത്തെക്കുറിച്ചുള്ള എല്ലാ വസ്തുതകളും ഇവിടെ വിവരിക്കാം. തുടർന്ന് സ്വാതന്ത്ര്യദിനം രാജ്യം എങ്ങനെ ആഘോഷിക്കുന്നുവെന്ന് പറയാം. ബ്രിട്ടീഷ് കൊളോണിയൽ ഭരണത്തിൻ്റെ ചെറിയ വിവരങ്ങളും ഉൾപ്പെടുത്തണം. സ്വാതന്ത്ര്യസമരം പൊട്ടിപ്പുറപ്പെട്ടത് എവിടെ നിന്നാണെന്നും അതിന് തുടക്കമിട്ടത് ആരാണെന്നും വിവരിക്കാം. കേരളത്തിലെ സ്വാതന്ത്ര്യസമര പോരാട്ടങ്ങളും പങ്കുവയ്ക്കാം.

ഉപ്പ് സത്യാഗ്രഹം, ജാലിയൻ വാലാബാഗ് കൂട്ടക്കൊല, വാഗൺ ട്രാജഡി, ഭഗത് സിംഗിനെ തൂക്കിലേറ്റിയ ബ്രിട്ടീഷ് നടപടി എന്നിവ ഉൾപ്പെടുത്തുന്നത് ഉപന്യാസത്തിന് കരുത്ത് പകരും. അതിനൊപ്പം മഹാത്മാ ഗാന്ധി, ഭഗത് സിംഗ്, ചന്ദ്ര ശേഖർ ആസാദ് തുടങ്ങിയ സ്വാതന്ത്ര്യസമര സേനാനികളുടെയും പേരുകൾ പരാമർശിക്കുകയും വേണം. ഇവർക്കൊപ്പം സ്വാതന്ത്രസമരത്തിൽ പങ്കെടുത്ത് ജീവത്യാഗം ചെയ്ത മറ്റുള്ളവരെയും ഓർത്തെടുക്കാം.

സ്വാതന്ത്ര്യ ദിന പ്രസംഗം എങ്ങനെയായിരിക്കണം? ഉൾപ്പെടുത്തേണ്ട കാര്യങ്ങൾ എന്തൊക്കെ?

രാജ്യം സ്വാതന്ത്ര്യമായ ദിവസത്തെ ആഘോഷങ്ങളും ജവഹർലാൽ നെഹ്‌റു അടക്കമുള്ളവർ സ്വീകരിച്ച നിലപാടുകളും ഉൾപ്പെടുത്താം. ദേശീയഗാനം രൂപപ്പെട്ടില്ലല്ലാത്തതിനാൽ അന്ന് രാത്രി ബങ്കിം ചന്ദ്ര ചാറ്റർജി എഴുതിയ വന്ദേമാതരം എന്ന ഗാനത്തിൻ്റെ ചരിത്രവും ഒഴിവാക്കാനാകാത്ത കണ്ണിയാണ്. അതിനൊപ്പം ആരാണ് രാജ്യത്തെ ഭരണഘടന എഴുതിയത് തുടങ്ങിയ വിവരങ്ങളും ഉൾപ്പെടുത്തണം.

കൊവിഡ് വ്യാപനത്തിന് മുൻപുള്ള സ്വാതന്ത്ര്യദിന ആഘോഷങ്ങൾ എങ്ങനെയായിരുന്നുവെന്ന് വിവരിക്കാനാകണം. വിദ്യാഭ്യാസ സ്ഥാപനങ്ങളും സർക്കാർ ഓഫീസുകളിലും നടക്കുന്ന ആഘോഷങ്ങൾ പങ്കുവയ്ക്കാം. അതേസമയം, ഇന്ത്യ – പാക് വിഭജനം, ജമ്മു കശ്‌മീർ വിഷയം, മഹാത്മാ ഗാന്ധിയുടെ മരണം എന്നിവ പരാമർശിക്കാതിരിക്കാൻ പ്രത്യേകം ശ്രദ്ധിക്കുകയും വേണം.