ഇന്ത്യയുടെ സ്വാതന്ത്ര്യത്തിനു വേണ്ടി പോരാടി രക്തസാക്ഷിത്വംവരിച്ച പ്രമുഖ വ്യക്തിത്വങ്ങളെ അറിയാം

ഭഗത് സിംഗ്

രാജ്യത്തിനുവേണ്ടി പോരാടിയ കമ്യൂണിസ്റ്റ് വിപ്ലവകാരികളിലൊരാളായിരുന്നു ഭഗത് സിംഗ്. ലാഹോർ ഗൂഢാലോചനയിൽ പങ്കാളിയായ അദ്ദേഹത്തെ ബ്രിട്ടീഷ് സർക്കാർ വധശിക്ഷക്ക് വിധേയനാക്കി. 1907 സെപ്റ്റംബർ 28 ന് ജനിച്ച അദ്ദേഹത്തെ 1931 മാർച്ച് 23 ന് ബ്രിട്ടീഷുകാർ തൂക്കിലേറ്റി.

ഖുദീരാം ബോസ്

പതിനെട്ടു വയസ്സും, എട്ടുമാസവും, എട്ടു ദിവസവും പ്രായമുള്ളപ്പോഴാണ് ഖുദീരാം ബോസിനെ ബ്രിട്ടീഷുകാർ തൂക്കിലേറ്റിയത്. ഇന്ത്യൻ സ്വാതന്ത്ര്യസമരത്തിലെ യുവ നേതാക്കളിൽ ഒരാളായിരുന്നു അദ്ദേഹം. 1889 ഡിസംബർ മൂന്നിനാണ് അദ്ദേഹത്തിന്റെ ജനനം. 1908 ഓഗസ്റ്റ് 19 ന് അദ്ദേഹത്തെ ബ്രിട്ടീഷുകാർ തൂക്കിലേറ്റി. പതിനാറാം വയസിൽ കിംഗ്സ്ഫോർഡ് പ്രഭുവിനെ ബോംബെറിഞ്ഞ് കൊല്ലാൻ ശ്രമിച്ചത് അടക്കമുള്ളതാണ് അദ്ദേഹത്തിനെതിരെ ചുമത്തപ്പെട്ട കുറ്റങ്ങൾ. ഓഗസ്റ്റ് 19 വൈകിട്ട് ആറ് മണിക്കാണ് അദ്ദേഹത്തെ തൂക്കിലേറ്റിയത്.

പിയർ അലി ഖാൻ

ബൈൻഡറായിരുന്ന പിയർ അലി ഖാനെ സ്വാതന്ത്ര്യ സമരത്തിൽ പങ്കെടുത്തതിനാണ് തൂക്കിലേറ്റിയത്. 1812ലാണ് അദ്ദേഹത്തിന്റെ ജനനം. 1857 ജൂലൈ ഏഴിന് അദ്ദേഹത്തിന്റെ വധശിക്ഷ ബ്രിട്ടീഷ് ഭരണകൂടം നടപ്പാക്കി. പ്രധാനപ്പെട്ട ലഘുലേഖകളും കോഡ് ചെയ്ത സന്ദേശങ്ങളും സ്വാതന്ത്ര്യ സമര സേനാനികൾക്ക് അദ്ദേഹം വിതരണം ചെയ്യുമായിരുന്നു. 1857 ജൂലൈ 4 ന് 33 അനുയായികൾക്കൊപ്പം അദ്ദേഹം അറസ്റ്റ് ചെയ്യപ്പെട്ടു. പാട്‌ന കമ്മീഷണറായിരുന്ന വില്യം ടെയ്‌ലറാണ് അദ്ദേഹത്തെ തൂക്കിലേറ്റിയത്. മറ്റ് 14 അനുയായികളേയും അദ്ദേഹത്തോടൊപ്പം വധശിക്ഷയ്ക്ക് വിധേയരാക്കി.

ഷേർ അലി അഫ്രിദി

ഇന്ത്യയിൽ കൊല്ലപ്പെട്ട ഏക വൈസ്രോയിയായ മേയോ പ്രഭുവിനെ ആന്തമാൻ നിക്കോബാർദ്വീപിൽ പോർട്ട് ബ്ലെയർ തുറമുഖത്ത് വെച്ച് വെച്ച് കൊലപ്പെടുത്തിയ ധീര രക്തസാക്ഷിയാണ് ഷേർ അലി അഫ്രിദി. ഇന്ത്യയുടെ നാലാമത്തെ വൈസ്രോയി(1869-1872) യായിരുന്നു മേയോ പ്രഭു. 1860കളിൽ പഞ്ചാബ് പോലീസിലായിരുന്നു അദ്ദേഹം. ഒരു ബന്ധുവിനെ കൊലപ്പെടുത്തിയ കേസിൽ കാലാപാനിയിൽ തടവ് ശിക്ഷയ്ക്ക് അയച്ചതായിരുന്നു അഫ്രിദിയെ. 1872ൽ മേയോ പ്രഭു ആന്തമാൻ സന്ദർശിച്ചപ്പോൾ പോർട്ട് ബ്ലെയറിലേക്ക് വരികയായിരുന്ന അദ്ദേഹത്തെ അഫ്രിദി കുത്തിക്കൊന്നു. മൗണ്ട് ഹാരിയറ്റ് എന്ന പർവ്വതത്തിനു സമീപമാണ് സംഭവം നടന്നത്.

ഇനിയുമുണ്ട്, ഗോപിനാഥ് സാഹ, ഉധം സിങ്, കർത്താർ സിംഗ് സരാഭ, താന്തിയാ ഭിൽ, താരകേശ്വർ ദസ്തിദാർ, ബരീന്ദ്ര കുമാർ ഘോഷ്, മംഗൽ പാണ്ഡേ, മദൻ ലാൽ ഢീംഗ്റ, വീരപാണ്ഡ്യ കട്ടബ്ബൊമ്മൻ, ശിവറാം രാജ്‌ഗുരു, സൂര്യ സെൻ അങ്ങനെ അനേകർ ചിന്തിയ ചോരച്ചാലിലൂടെയാണ് ഇന്ത്യ സ്വാതന്ത്ര്യത്തിലേക്ക് നടന്നുകയറിയത്.