വീട്ടമ്മയെ ഫോണിൽ വിളിച്ച് ശല്യം ചെയ്ത സംഭവം; അഞ്ച് പേർ അറസ്റ്റിൽ

കോട്ടയം: വീട്ടമ്മയുടെ ഫോൺ നമ്പർ ലൈംഗിക തൊഴിലാളിയുടേതെന്ന പേരിൽ പ്രചരിപ്പിച്ച സംഭവത്തിൽ അഞ്ച് പേർ അറസ്റ്റിൽ. പാലക്കാട് സ്വദേശി നിഷാന്ത്, ഹരിപ്പാട് സ്വദേശികളായ രതീഷ് ആനാരി, ഷാജി, അനിക്കുട്ടന്‍, പാണംചേരി സ്വദേശി വിപിൻ എന്നിവരെ ചങ്ങനാശേരി പോലീസാണ് അറസ്റ്റ് ചെയ്തത്.



കുറ്റക്കാർക്കെതിരെ കർശന നടപടി സ്വീകരിക്കുമെന്ന് മുഖ്യമന്ത്രി പിണറായി വിജയൻ വ്യക്തമാക്കിയിരുന്നു. എറണാകുളം റേഞ്ച് ഐജി നീരജ് കുമാർ ഗുപ്ത നേരിട്ടാണ് അന്വേഷണം ഏകോപിപ്പിച്ചത്.

വീട്ടമ്മയുടെ ഫോണിലേക്ക് വിളിച്ചത് 44 പേർ; 20 പേരെ പോലീസ് വിളിച്ചുവരുത്തി, അന്വേഷണം തുടരുന്നു

വീട്ടമ്മയുടെ ഫോൺ നമ്പറിലേക്ക് 44 പേർ വിളിച്ചിരുന്നതായി അന്വേഷണത്തിൽ കണ്ടെത്തി. 24 നമ്പറുകൾ മാത്രമാണ് പ്രവർത്തിക്കുന്നതെന്നും കണ്ടെത്തിയിട്ടുണ്ട്. ചേരമർ സംഘം മഹിളാ സംഘം മുൻ സംസ്ഥാന സെക്രട്ടറി ജെസി ദേവ്യയുടെ നമ്പറാണ് വ്യക്തിവിരോധം തീർക്കാൻ ആരോ പൊതു സ്ഥലങ്ങളിൽ എഴുതിവെച്ചത്.

ലൈംഗിക തൊഴിലാളിയുടേതെന്ന പേരിൽ പൊതു ശുചിമുറികളിലടക്കം നമ്പർ എഴുതിവച്ചതോടെ രാത്രികാലങ്ങളിൽ നിരന്തരം ഫോൺ കോളുകൾ വരികയാണെന്നായിരുന്നു ജെസിയുടെ പരാതി. പോലീസിൽ പരാതി നൽകിയെങ്കിലും അനുകൂല നിലപാട് ഉണ്ടായില്ല. ഫോൺ നമ്പർ മാറ്റാനാണ് പോലീസ് നിർദേശിച്ചതെന്നും വീട്ടമ്മ വ്യക്തമാക്കി. മുഖ്യമന്ത്രിയുടെ പ്രതികരണം വന്നശേഷമാണ് പോലീസ് കേസെടുക്കാൻ തയ്യാറായത്.