അനിശ്ചിതത്വം നീണ്ട മണിക്കൂറുകൾ; വിമാനത്തിൽ 129 പേർ, ഒടുവിൽ കാബൂളിൽ നിന്ന് ഡൽഹിയിലെത്തി

ന്യൂഡൽഹി: അഫ്ഗാനിസ്ഥാൻ്റെ നിയന്ത്രണം പൂർണമായും താലിബാൻ ഏറ്റെടുത്തതിന് പിന്നാലെ 129 യാത്രക്കാരുമായി എയർ ഇന്ത്യ വിമാനം ഡൽ ഹിയിലെത്തി. ഞായറാഴ്ച വൈകിട്ട് ആറിന് കാബൂളിൽ നിന്ന് പുറപ്പെട്ട വിമാനം രാത്രി എട്ട് മണിയോടെ ഡൽഹിയിലെത്തി. കാബൂളിലെ സാഹചര്യങ്ങൾ മോശമായി തുടരുന്നതിനാൽ വിമാനം വൈകിയാണ് പുറപ്പെട്ടത്.



രാജ്യം വിട്ടത് രക്തച്ചൊരിച്ചിൽ ഒഴിവാക്കാനെന്ന് അഷ്റഫ് ഗനി; കൊട്ടാരത്തിൽ പതാക നാട്ടി താലിബാൻ

ഉച്ചയോടെ ഡൽഹിയിൽ നിന്നും വിമാനം കാബൂൾ ലക്ഷ്യമാക്കി തിരിച്ചെങ്കിലും മണിക്കൂറുകൾ നീണ്ട അനിശ്ചതത്വത്തിന് ഒടുവിലാണ് വിമാനത്തിന് ലാൻഡ് ചെയ്യാൻ അനുമതി ലഭിച്ചത്. നഗരം താലിബാൻ വളഞ്ഞതിനാൽ ലാൻഡ് ചെയ്യാനുള്ള അനുമതി ലഭിക്കാൻ വൈകി. വിമാനം പുറപ്പെടുന്നതിലും താമസമുണ്ടായി.

അഫ്ഗാനിസ്ഥാനിൽ നിന്ന് കൂടുതൽ ഇന്ത്യക്കാരെ തിരിച്ചെത്തിക്കുമോ എന്ന കാര്യത്തിൽ കേന്ദ്ര സർക്കാർ നിലപാട് വ്യക്തമാക്കിയിട്ടില്ല. അഫ്ഗാനിസ്ഥാൻ്റെ നിയന്ത്രണം താലിബാൻ്റെ കൈകളിലായതോടെ ഇന്ത്യൻ നയതന്ത്ര ഉദ്യോഗസ്ഥരെ ഒഴിപ്പിക്കാൻ കേന്ദ്രസർക്കാരിന് മേൽ സമ്മർദ്ദമുണ്ട്. നിലവിലെ സ്ഥിതിഗതികൾ വിലയിരുത്തി അതിവേഗത്തിൽ തീരുമാനമെടുക്കാനാണ് ഇന്ത്യയുടെ ആലോചന. അഫ്ഗാനിസ്ഥാനിലെ സാഹചര്യങ്ങൾ വിലയിരുത്തുകയാണെന്ന് കേന്ദ്ര സർക്കാർ വ്യക്തമാക്കി.

അഷ്റഫ് ഗനി രാജ്യം വിട്ടു; അഫ്ഗാൻ പ്രസിഡന്റിന്റെ കൊട്ടാരം പിടിച്ചെടുത്ത് താലിബാൻ

ദേശീയ സുരക്ഷ ഉപദേഷ്ടാവ് അജിത് ഡോവലിൻ്റെ നേതൃത്വത്തിലാണ് ചർച്ചകൾ. അടിയന്തര സാഹചര്യമുണ്ടായാൽ വിമാനങ്ങൾ അയച്ച് ഉദ്യോഗസ്ഥരെ ഒഴിപ്പിക്കാനാനുള്ള പദ്ധതിയാണ് ഇന്ത്യക്കുള്ളതെന്ന് വിവിധ മാധ്യമങ്ങൾ റിപ്പോർട്ട് ചെയ്തു. എംബിസി അടച്ച് പൂട്ടുന്നത് അഫ്ഗാനിസ്ഥാൻ സർക്കാരിനെ കൈവിടുന്നതിന് തുല്യമാകുമെന്ന നിഗമനവും ഇന്ത്യക്കുണ്ട്. നിലവിൽ കാബൂളിലെ എംബസി മാത്രമാണ് ഇപ്പോൾ അഫ്ഗാനിസ്ഥാനിൽ പ്രവർത്തിക്കുന്നത്. അതേസമയം, ഇന്ത്യയിലേക്ക് എത്താൻ അനുവാദം നൽകണമെന്ന് ആയിരക്കണക്കിന് അഫ്ഗാൻ പൗരന്മാർ ആവശ്യപ്പെട്ടിട്ടുണ്ട്.