ദുബായ്: കഴിഞ്ഞ രണ്ടു വര്‍ഷമായി കണ്ണില്‍ എണ്ണയൊഴിച്ച് കാത്തിരിക്കുകയായിരുന്നു റാസല്‍ഖൈമയിലെ അലി ഹസന്‍ അല്‍ ഖൈദിയെന്ന കര്‍ഷകന്‍. മറ്റാരെയുമല്ല, തന്റെ ഫാമിലെ 35 ആടുകളെ കൊന്നു തിന്നത് ആരാണെന്ന് കണ്ടെത്താന്‍. ഇതിനായി പഠിച്ച പണി പതിനെട്ടും നോക്കിയിട്ടും ഫലമുണ്ടായില്ല. പല വട്ടം പല ഇടങ്ങളിലായി കെണിവച്ചു നോക്കിയെങ്കിലും അതും ഫലിച്ചില്ല. അവസാനം കഴിഞ്ഞ വ്യാഴാഴ്ചയാണ് അല്‍ മുസൈലിയിലെ കര്‍ഷകന്റെ ശ്വാസം നേരെ വീണത്. ഫാമില്‍ സ്ഥാപിച്ച ഇരുമ്പ് കൂടുകളിലൊന്നില്‍ കൊലയാളിയായ തറക്കരടിയെന്ന് വിളിക്കപ്പെടുന്ന ഹണി ബാഡ്ജര്‍ അകപ്പെടുകയായിരുന്നു.

ഫാമിലുണ്ടായത് 80,000 ദിര്‍ഹമിന്റെ നഷ്ടം

ഫാമിലെ 35 ആടുകള്‍ ഉള്‍പ്പെടെ നിരവധി വളര്‍ത്തു മൃഗങ്ങളാണ് കഴിഞ്ഞ രണ്ടു വര്‍ഷത്തിനിടയില്‍ കൊല്ലപ്പെട്ടത്. 80,000 ദിര്‍ഹം (16 ലക്ഷത്തിലേറെ രൂപ) വില മതിക്കുന്ന കന്നുകാലികളെയാണ് രണ്ട് വര്‍ഷത്തിനിടയില്‍ ഈ തറക്കരടി കൊന്നുതിന്നതെന്ന് അദ്ദേഹം പറഞ്ഞു. കന്നുകാലികളെ കൊല്ലുക മാത്രമല്ല, ഒട്ടേറെ തവണ ഫാമിലെ തേനിന്‍ കൂടുകള്‍ തകര്‍ത്ത് തേന്‍ കുടിക്കുകയും ചെയ്തു ഈ ഹണി ബാഡ്ജര്‍. സമീപ പ്രദേശത്ത് മറ്റൊരു ഫാം നടത്തുന്ന തന്റെ സഹോദരന്റെ 15 ആടുകളും ഇതേപോലെ കൊല്ലപ്പെട്ടിരുന്നു. മൂന്നു മാസം മുമ്പായിരുന്നു ഇത്. അതിനു പിന്നിലും ഇവന്‍ തന്നെയാണ് പ്രതിയെന്നാണ് സംശയിക്കുന്നത്.

​ഒന്നിനെയും ഭയമില്ലാത്ത ജീവി

ഇന്ത്യന്‍ ഉപഭൂഖണ്ഡത്തിലും ആഫ്രിക്കയിലും പൊതുവെ കാണപ്പെടുന്ന ജീവിയാണ് ഹണി ബാഡ്ജര്‍. ഗള്‍ഫ് നാടുകളില്‍ വളരെ അപൂര്‍വമായേ ഇവയെ കാണാറുള്ളൂ. എന്തിനും മടിയില്ലാത്ത ഒന്നിനെയും പേടിയില്ലാത്ത മൃഗമാണിത്. പ്രകോപിതനായാല്‍ അത് മനുഷ്യരെയും ആക്രമിക്കും. ഹണി ബാഡ്ജര്‍ എന്ന പേര് സൂചിപ്പിക്കുന്ന പോലെ ഇഷ്ട ഭക്ഷണം തേനാണെങ്കിലും അത് കിട്ടിയില്ലെങ്കില്‍ കണ്ണില്‍ കണ്ടതെന്തും തിന്നും. തന്റെ ഫാമിലെ മൃഗങ്ങളെ ഇടയ്ക്കിടെ വന്ന് അക്രമിക്കുന്ന ഈ കൊലയാളി ആരാണെന്ന് അലി ഹസന് അറിയുമായിരുന്നില്ല. ഫാമിലെ നനഞ്ഞ മണലില്‍ പതിഞ്ഞ കാലടയാളങ്ങളില്‍ നിന്ന് ചെന്നായയാണെന്നായിരുന്നു താന്‍ കരുതിയതെന്ന് അദ്ദേഹം പറഞ്ഞു. എന്നാല്‍ കെണിയില്‍ അകപ്പെട്ടപ്പോഴാണ് ആള്‍ ചില്ലറക്കാരനല്ലെന്ന് ബോധ്യമായത്.

​തറക്കരടിയെ മൃഗ ഉദ്യോഗസ്ഥര്‍ക്ക് കൈമാറി

ഹണി ബാഡ്ജറിനെ റാസല്‍ ഖൈമ അധികൃതര്‍ക്ക് കൈമാറുന്നതിന് മുമ്പ് എടുത്ത വീഡിയോയും തറക്കരടി ക്രൂദ്ധനായി മുരളുകയും കൂട്ടിന്റെ കമ്പികള്‍ പല്ലുകൊണ്ട് കടിക്കുകയും ചെയ്യുന്നത് കാണാം. ഇവന്‍ തനിച്ചല്ലെന്ന അനുമാനത്തിലാണ് അധികൃതര്‍. പൊതുവെ ഇണകളായാണ് ഇവ കഴിയാറ് എന്നതുതന്നെ കാരണം. പച്ചമാംസം ഇരയായി കൊളുത്തിവച്ച് പലതവണ കെണിവച്ചെങ്കിലും അതില്‍ കുടുങ്ങാതിരുന്നതിനെ തുടര്‍ന്നാണ് നാലിടത്ത് ഇരുമ്പ് കൂട് സ്ഥാപിച്ചതെന്ന് അദ്ദേഹം പറഞ്ഞു. വ്യാഴാഴ്ച കാലത്ത് നോക്കിയപ്പോഴാണ് കൂടുകളിലൊന്നില്‍ തറക്കരടി കുടുങ്ങിയതായി കണ്ടത്. സുഹൃത്തുക്കള്‍ അയച്ചുകൊടുത്ത ഇതിന്റെ വീഡിയോ വൈറലാവുകയും ചെയ്തു. ചിലര്‍ ഇതിന്റെ വാങ്ങാന്‍ തയ്യാറായും രംഗത്തെത്തി. അവരിലൊരാള്‍ 50,000 ദിര്‍ഹം വാഗ്ദാനം ചെയ്തതായും കര്‍ഷകന്‍ പറഞ്ഞു. എന്നാല്‍ വന്യമൃഗങ്ങളെ വില്‍ക്കുന്നത് നിയമവിരുദ്ധമായതിനാല്‍ അധികൃതരെ വിവരമറിയിക്കുകയായിരുന്നു. ഷാര്‍ജ എണ്‍വയോണ്‍മെന്റ് ആന്റ് പ്രൊട്ടക്റ്റഡ് ഏരിയാസ് അതോറിറ്റിയില്‍ നിന്നുള്ള ഉദ്യോഗസ്ഥര്‍ വന്നാണ് ഇതിനെ കൊണ്ടുപോയത്.