അധികാരം പിടിച്ചെടുത്ത ശേഷം അമ്യൂസ്മെന്റ് പാര്‍ക്കിൽ തോക്കുകളുമായി കുട്ടികളെപ്പോലെ കളിച്ചുല്ലസിച്ച് താലിബാൻ ഭീകരര്‍

കാബൂൾ: അധികാരം പിടിച്ചെടുതിന് പിന്നാലെ ആഘോഷവുമായി താലിബാൻ ഭീകരര്‍. കാബൂളിലെ കുട്ടികള്‍ക്കുള്ള അമ്യൂസ്മെന്റ് പാര്‍ക്കിൽ കളിച്ചുല്ലസിക്കുന്നതിന്റെ വീഡിയോകളാണ് ഇപ്പോള്‍ സമൂഹമാധ്യമങ്ങളിലൂടെ പുറത്തുവരുന്നത്.



താലിബാൻ ഭീകരര്‍ കൈകളിൽ ആയുധങ്ങളുമായി ഇലക്ട്രിക് ബമ്പർ കാറുകൾ ഓടിക്കുന്നതിന്റെ ദൃശ്യമാണ് വ്യാപകമായി പ്രചരിക്കുന്നത്. മറ്റൊരു വീഡിയോയിൽ, അവർ പാർക്കിൽ കളി കുതിരകളെ ഓടിക്കുന്നതും കാണാൻ സാധിക്കും.

Also Read : ഇനി അഫ്ഗാനിസ്ഥാൻ ഇല്ല ‘ഇസ്ലാമിക് എമിറേറ്റ്സ് ഓഫ് അഫ്ഗാനിസ്ഥാന്‍’ എന്നാക്കി താലിബാൻ; പ്രാണനും കൊണ്ടോടി ജനങ്ങള്‍



അതേസമയം, വീഡിയോകളുടെ കീഴിൽ വൻ വിമര്‍ശനവും ഉയരുന്നുണ്ട്. ഞായറാഴ്ച കാബൂള്‍ വിമാനത്താവളത്തിൽ ഉണ്ടായ തിരക്കും മറ്റും അന്താരാഷ്ട്ര ശ്രദ്ധപിടിച്ചു പറ്റിയിരുന്നു. യുഎസ് സൈനിക വിമാനത്തിൽ കയറുന്നതിന് തിരക്ക് കൂട്ടുന്നതിന്റെ ദൃശ്യങ്ങളും പുറത്തുവന്നിരുന്നു.

യുഎസ് മിലിട്ടറി എയർക്രാഫ്റ്റിനൊപ്പം നൂറുകണക്കിന് അഫ്ഗാൻ പൗരന്മാർ ഓടുന്നതും വിമാനത്തിൽ പറ്റിപിടിച്ച് നിൽക്കുന്നതിന്റെയും വീഡിയോ പുറത്തുവന്നിരുന്നു. അതിൽ നിന്നും തികച്ചും വ്യത്യസ്തമായ വീഡിയോകളാണ് അഫ്ഗാനിസ്ഥാനില്‍ നിന്നും പുറത്തുവരുന്നത്.

അഫ്ഗാനിസ്ഥാനിലെ അമേരിക്കൻ സർക്കാരിനെ സഹായിച്ച ആളുകളാണ് യുവാക്കളിൽ കൂടുതലും ഉൾപ്പെടുന്നതെന്ന് വൃത്തങ്ങൾ പറഞ്ഞു. അവരിൽ ചിലർ അമേരിക്കൻ നിയന്ത്രണത്തിലായിരുന്നപ്പോൾ യുഎസിനെ സഹായിച്ച വിവർത്തകരായിരുന്നുവെന്നും റിപ്പോര്‍ട്ടുണ്ട്.

അഫ്ഗാനിസ്ഥാനിൽ കുടുങ്ങിയ ഇന്ത്യൻ പൗരന്മാരെ ഉടൻ സുരക്ഷിതമായി തിരിച്ചെത്തിക്കുമെന്ന് കേന്ദ്രസര്‍ക്കാര്‍ അറിയിച്ചു. താലിബാൻ അഫ്ഗാനിസ്ഥാൻ പിടിച്ചടക്കിയതിന് പിന്നാലെ ആദ്യ പ്രതികരണവുമായി അമേരിക്കൻ പ്രസിഡന്റ് ജോ ബൈഡൻ. രാജ്യത്തിന്റെ നിലവിലെ സ്ഥിതിഗതി സൂക്ഷ്മമായി നിരീക്ഷിച്ച് വരികയാണെന്ന് ബൈഡൻ വ്യക്തമാക്കി.

സേനാ പിന്മാറ്റം നടത്തിയതിൽ കുറ്റബോധമില്ല. പ്രതീക്ഷിച്ചതിലും നേരത്തെയാണ് അഫ്ഗാൻ സർക്കാരിൻ്റെ വീഴ്ചയുണ്ടായത്. താലിബാനെതിരെ ചെറുത്ത് നിൽക്കാൻ അഫ്ഗാൻ സൈന്യം ഒരു ഘട്ടത്തിൽ പോലും തയ്യാറായില്ലെന്നും ബൈഡൻ കുറ്റപ്പെടുത്തി.