റിയാദ്/ ദോഹ: അഫ്ഗാനിസ്താനില്‍ താലിബാന്‍ അധികാരം പിടിച്ചെടുത്തതിന് പിന്നാലെ എല്ലാ വിഭാഗം ആളുകളോടും സമാധാനത്തിന് ആഹ്വാനം ചെയ്ത് സൗദി, ഖത്തര്‍ ഭരണകൂടങ്ങള്‍. ജനങ്ങളുടെ ജീവനും സ്വത്തിനും സംരക്ഷണം നല്‍കാന്‍ താലിബാനും മറ്റ് അഫ്ഗാന് പാര്‍ട്ടികളും തയ്യാറാവണമെന്നും വിദേശകാര്യ മന്ത്രാലയം പുറത്തിറക്കിയ പ്രസ്താവനയില്‍ ആവശ്യപ്പെട്ടു.
സൗദി നയതന്ത്ര ഉദ്യോഗസ്ഥരെ ഒഴിപ്പിച്ചു
ഭരണകൂടത്തിന്റെ കാര്യത്തില്‍ അഫ്ഗാന് ജനത തിരഞ്ഞെടുക്കുന്നത് ആരെയാണെങ്കിലും സൗദി അംഗീകരിക്കും. സൗദിയുടെ ഭാഗത്തു നിന്ന് ഇക്കാര്യത്തില്‍ ഒരു ഇടപെടലും ഉണ്ടാവില്ല. അഫ്ഗാനിലെ സംഭവ വികാസങ്ങള്‍ രാജ്യം ശ്രദ്ധാപൂര്‍വം നിരീക്ഷിക്കുകയാണെന്നും എത്രയും വേഗത്തില്‍ സ്ഥിരത കൈവരിക്കാന്‍ അഫ്ഗാന് സാധിക്കുമെന്നാണ് കരുതുന്നതെന്നും പ്രസ്താവനയില്‍ വ്യക്തമാക്കി. അതിനിടെ, അഫ്ഗാന് തലസ്ഥാനമായ കാബൂളില്‍ നിന്ന് തങ്ങളുടെ നയതന്ത്ര പ്രതിനിധികളെ സുരക്ഷിതമായി ഒഴിപ്പിച്ചതായി സൗദി അറിയിച്ചു. താലിബാന്‍ കാബൂള്‍ പിടിച്ചടക്കുമെന്ന സ്ഥിതി വന്നതോടെ ഞായറാഴ്ച തന്നെ നയതന്ത്ര ഉദ്യോഗസ്ഥരെ തിരിച്ചുവിളിച്ചതായും അവര്‍ റിയാദില്‍ സുരക്ഷിതമായി തെരികെ എത്തിയതായും വിദേശകാര്യ മന്ത്രാലയം വ്യക്തമാക്കി.
സമാധാനപരമായ അധികാര കൈമാറ്റം വേണമെന്ന് ഖത്തര്‍
അതേസമയം, അഫ്ഗാന് വിടാന്‍ ആഗ്രഹിക്കുന്ന നയതന്ത്രപ്രതിനിധികളെയും വിദേശജീവനക്കാരെയും ഒഴിപ്പിക്കുന്നതിനാവശ്യമായ എല്ലാ സഹായവും നല്‍കുമെന്ന് ഖത്തര്‍ വിദേശകാര്യമന്ത്രി അറിയിച്ചു. ജോര്‍ദാന്‍ തലസ്ഥാനത്ത് അമ്മാനില്‍ നടത്തിയ വാര്‍ത്താ സമ്മേളനത്തില്‍ ഖത്തര്‍ വിദേശകാര്യ മന്ത്രി മുഹമ്മദ് ബിന്‍ അബ്ദുല്‍റഹ്മാന്‍ അല്‍താനിയാണ് ഇക്കാര്യം അറിയിച്ചത്. യുഎസ് സൈന്യത്തിന്റെ പിന്മാറ്റത്തിന് പിന്നാലെയുണ്ടായ അനിശ്ചിതാവസ്ഥ ഒഴിവാക്കുന്നതിന് സമാധാനപരമായ അധികാരമാറ്റത്തിന് ശ്രമം നടത്തുമെന്നും അദ്ദേഹം അറിയിച്ചു. അഫ്ഗാനില്‍ പെട്ടെന്നുണ്ടായ പുതിയ മാറ്റങ്ങളെക്കുറിച്ച് അന്താരാഷ്ട്ര തലത്തില്‍ ആശങ്ക ഉയര്‍ന്നിട്ടുണ്ട്. അഫ്ഗാനില്‍ നാഥനില്ലാത്ത അവസ്ഥ ഒഴിവാക്കുന്നതിനും സുസ്ഥിര സര്‍ക്കാര്‍ രൂപീകരിക്കുന്നതിനും ആവശ്യമായ എല്ലാ സഹായങ്ങളും ഖത്തര്‍ നല്‍കുമെന്നും അദ്ദേഹം പറഞ്ഞു.
ജിസിസി മന്ത്രിമാര്‍ ചര്‍ച്ച ചെയ്യും
അഫ്ഗാനിസ്താനില്‍ പുതുതായി ഉടലെടുത്ത സാഹചര്യം ഗള്‍ഫ് സഹകരണ കൗണ്‍സില്‍ (ജിസിസി) ചര്‍ച്ച ചെയ്യും. ഇക്കാര്യത്തില്‍ സ്വീകരിക്കേണ്ട നിലപാടുകളെ കുറിച്ച് ചര്‍ച്ച ചെയ്യാന്‍ ജിസിസി രാജ്യങ്ങളുമായി കൂടിയാലോചന നടത്തുമെന്ന് നിലവിലെ ജിസിസി അധ്യക്ഷനായ ബഹ്‌റൈന്‍ അറിയിച്ചു. മറ്റ് വിദേശകാര്യ മന്ത്രിമാരുമായി ഇക്കാര്യം കൂടിയാലോചിക്കുന്നതിനായി വിദേശകാര്യ മന്ത്രിയെ ബഹ്‌റൈന്‍ മന്ത്രി സഭ ചുമതലപ്പെടുത്തിയിട്ടുണ്ട്. ജിസിസി രാജ്യങ്ങളില്‍ ഖത്തര്‍ മാത്രമാണ് അഫ്ഗാന് വിഷയത്തില്‍ ഇതിനകം പരസ്യമായ നിലപാട് സ്വീകരിച്ചത്. താലിബാനുമായുള്ള സമാധാന ചര്‍ച്ചകള്‍ക്ക് നേതൃത്വം നല്‍കിവരുന്നത് ഖത്തറാണ്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : afghanistan crisis gcc will discuss
Malayalam News from malayalam.samayam.com, TIL Network
