പ്രവാസികള്‍ക്ക് സൗജന്യ കൊവിഡ് വാക്സിന്‍ നല്‍ക്കുന്നത് ഒമാനില്‍ പുരോഗമിക്കുന്നു. കൂടുതൽ സ്ഥലങ്ങളിൽ വിദേശികൾക്ക് സൗജന്യ വാക്സിന്‍ നല്‍കാന്‍ ആണ് തീരുമാനിച്ചിരിക്കുന്നത്. മസ്കത്തിൽ മത്ര സൂഖിലെ സ്ഥാപനങ്ങളിലുള്ളവർക്ക് വാക്സിനെടുക്കാൻ അപ്പോയിൻമെന്‍റ് കാർഡ് നൽകി. ഇന്ന് സിബ്ല മത്രയിലാണ് വാക്സിനേഷൻ ക്യാമ്പ് നടക്കുക. ആദ്യ ഘട്ടത്തിൽ സൂഖിലുള്ളവർക്ക് മാത്രമാണ് വാക്സിൻ നൽകുകയെന്നാണ് അറിയുന്നത്. ഞായറാഴ്ച വൈകീട്ട് ആരോഗ്യ വകുപ്പ് ജീവനക്കാർ കടകളിലെത്തി വാക്സിനെടുക്കാത്തവരുടെ വിവരങ്ങൾ ചോദിച്ച് അപ്പോയിൻമെന്‍റ് കാർഡ് നൽകുകയായിരുന്നു.

​ഞാ​യ​റാ​ഴ്ച മു​ത​ൽ സൗ​ജ​ന്യ വാ​ക്​​സി​നേ​ഷ​ൻ ആ​രം​ഭി​ച്ചു

ദാഹിറ ഗവർണറേറ്റിൽ വിദേശ തൊഴിലാളികൾക്ക് ഞായറാഴ്ച മുതൽ സൗജന്യ വാക്സിനേഷൻ ആരംഭിച്ചു. ബ്യൂട്ടി സലൂൺ ജീവനക്കാർ, വീട്ടുജോലിക്കാർ, കൃഷി സ്ഥലങ്ങളില്‍ ജോലി ചെയ്യുന്നവര്‍, ബാർബർമാർ, എന്നിവര്‍ക്കാണ് വാക്സിന്‍ നല്‍ക്കുന്നത്. പിന്നീട് മറ്റു വിഭാഗങ്ങളിലുള്ളവര്‍ക്ക് വാക്സിന്‍ നല്‍കാന്‍ ആണ് തീരുമാനിച്ചിരിക്കുന്നതെന്ന് ആരോഗ്യവകുപ്പ് അറിയിച്ചു. ഇബ്രിയിലെ അൽ മുഹല്ല ബിൻ അബി സൂഫ ഹാൾ, ദങ്കിലെ സ്പോർട്സ് ഹാൾ, യൻകലിൽ വാലി ഓഫീസ് എന്നിവിടങ്ങളില്‍ രാവിലെ എട്ടു മുതൽ ഉച്ചക്ക് ഒന്നര വരെ വാക്സിന്‍ വിതരണം നടക്കും. https://forms.gle/VLHi21HCkH9M2D129 എന്ന ലിങ്കിൽ ഓൺലൈനായി അപ്പോയിൻമെന്‍റ് രജിസ്റ്റർ ചെയ്യണം

​ആ​ശ്വാ​സ​ത്തിന്‍റെ നെ​ടു​വീ​ർ​പ്പി​ലാ​ണ്​ വി​ദേ​ശി​ക​ൾ

മസീറയിൽ വെള്ളിയാഴ്ച മുതൽ തന്നെ വിദേശികൾക്ക് വാക്സിനേഷൻ ആരംഭിച്ചിരുന്നു. മസീറ സ്പോർട്സ് ഹാളില്‍ ആണ് വാക്സിന്‍ വിതരണം നടക്കുന്നത്. നൂറു കണക്കിന് വിദേശികൾ ആണ് ഇവിടെ എത്തി വാക്സിന്‍ സ്വീകരിക്കുന്നത്. സൗജന്യ വാക്സിനേഷൻ നല്‍കാന്‍ ഒമാന്‍ ആരോഗ്യ വകുപ്പ് തീരുമാനിച്ചതോടെ ആശ്വാസത്തിലായിരിക്കുകയാണ് വിദേശികള്‍. കുറഞ്ഞ വരുമാനത്തില്‍ ഒമാനില്‍ ജോലി ചെയ്യുന്ന വിദേശികള്‍ക്കാണ് ആരോഗ്യവകുപ്പിന്‍റെ ഈ തീരുമാനം ആശ്വാസം പകരുന്നത്. കൊവിഡ് കാരണം മാസങ്ങളായി ചെറിയ വരുമാനത്തില്‍ ജോലി ചെയ്യുന്ന പ്രവാസികള്‍ വാക്സിനായി 22റിയാല്‍ എങ്ങനെ കണ്ടെത്തുമെന്ന ആലോചനയിലായിരുന്നു. അപ്പോഴാണ് സൗജന്യ വാക്സിന്‍ സൗകര്യം അധികതര്‍ ഒരുക്കിയത്.

​വിദേശികളെ കെെവിടാതെ ഒമാന്‍

സൗജന്യ വാക്സിനേഷൻ വിദേശികള്‍ക്കും എത്തും എന്ന് റിപ്പോര്‍ട്ടുകള്‍ പുറത്തു വന്നിരുന്നെങ്കിലും ഇത്രയും വേഗം നടപ്പിലാക്കുമെന്ന് ആരും കരുതിയില്ല. രാവിലെ എട്ടിനും ഒമ്പതിനുമിടയിൽ വാക്സിനേഷൻ കേന്ദ്രത്തില്‍ എത്തണം. ടോക്കണ്‍‌ നമ്പര്‍ അനുസരിച്ച് വാക്സിന്‍ സ്വീകരിക്കാം. സ്വകാര്യ ക്ലിനിക്കുകളിൽ പോയി വാക്സിൻ സ്വീകരിക്കാന്‍ നിന്ന പലര്‍ക്കും സൗജന്യ വാക്സിന്‍ കിട്ടിയത് വലിയ ആശ്വസമായിരിക്കുകയാണ്.