ഒന്നര വയസുള്ള കുഞ്ഞിനെ ബലാത്സംഗം ചെയ്തു കൊന്നു; പ്രതിയ്ക്ക് വധശിക്ഷ വിധിച്ച് കോടതി

ലഖ്നൗ: ഉത്തര്‍ പ്രദേശിൽ ഒന്നര വയസുള്ള കുഞ്ഞിനെ ബലാത്സംഗം ചെയ്തു കൊലപ്പെടുത്തിയ കേസിൽ പ്രതിയ്ക്ക് വധശിക്ഷ വിധിച്ച് കോടതി. ബഹ്റായ്ച്ച് ജില്ലയിലാണ് 30കാരന് കോടതി വധശിക്ഷ വിധിച്ചത്. വെറും 55 ദിവസത്തിനുള്ളിൽ നടപടികള്‍ പൂര്‍ത്തിയാക്കി വധശിക്ഷ വിധിച്ച കേസ് രാജ്യത്തിൻ്റെ ചരിത്രത്തിലെ ഏറ്റവും വേഗമേറിയ വിചാരണകളിൽ ഒന്നാണ്.



പരശുറാം എന്നയാളാണ് കേസിലെ പ്രതി. ജൂൺ 22നാണ് പ്രതി കുറ്റം സമ്മതിച്ചത്. സംഭവത്തിനു ശേഷം ഒളിവിലായിരുന്ന പ്രതിയെ പിടികൂടുന്നതിനിടെ പോലീസ് ഇരുകാലുകളിലും വെടിവെച്ചിടുകയായിരുന്നു. പ്രതിയ്ക്കെതിരെ ബലാത്സംഗം, കൊലപാതകം തുടങ്ങിയ വകുപ്പുകള്‍ക്കു പുറമെ പോക്സോ വകുപ്പുകളും ചുമത്തിയിരുന്നു.

Also Read: ‘രാജ്യസുരക്ഷയെ ബാധിക്കില്ല, പെഗാസസ് ഉപയോഗിച്ചോ ഇല്ലയോ?’; സുപ്രീം കോടതിയിൽ കേന്ദ്രത്തിന് തിരിച്ചടി

കേസിൽ ഒട്ടും സമയം പാഴാക്കാതെ തന്നെ തെളിവുകള്‍ ശേഖരിച്ചെന്നും 28 ദിവസത്തിനുള്ളിൽ കുറ്റപത്രം സമര്‍പ്പിക്കാൻ കഴിഞ്ഞെന്നും പോലീസ് പറഞ്ഞു. വളരെ വേഗത്തിൽ തന്നെ സാംപിളുകള്‍ ശേഖരിക്കുകയും ഗോരഖ്പൂരിലെ എഫ്എസ്എൽ ലാബിൽ വെച്ച് ഡിഎൻഎ പരിശോധന പൂര്‍ത്തിയാക്കുകയും ചെയ്തു. ഈ തെളിവുകളടക്കം 37 ദിവസത്തിനുള്ളിൽ കോടതിയിൽ സമര്‍പ്പിക്കാൻ കഴിഞ്ഞെന്നും ടൈംസ് ഓഫ് ഇന്ത്യ റിപ്പോര്‍ട്ടിൽ പറയുന്നു.

അഡീഷണൽ സെഷൻസ് ജഡ്ജി നിതിൻ പാണ്ടേയുടെ നേതൃത്വത്തിലാണ് കേസിലെ വിചാരണ പൂര്‍ത്തിയാക്കിയത്. എട്ടു ദിവസത്തെ കോടതി നടപടികള്‍ക്കൊടുവിലായിരുന്നു പരശുറാം കുറ്റക്കാരനാണെന്ന് വിധിച്ചത്. കുട്ടിയെ ബലാത്സംഗം ചെയ്തതും കൊലപ്പെടുത്തിയതും പരശുറാം തന്നെയാണെന്നാണ് കോടതി വിധി.

Also Read: സിപിഎം സംസ്ഥാന സെക്രട്ടറി സ്ഥാനത്തേക്ക് കോടിയേരി മടങ്ങിയെത്തുമെന്ന് റിപ്പോർട്ട്

കേസിൽ അതിവേഗം അന്വേഷണം പൂര്‍ത്തിയാക്കിയ ബഹ്രിയാച്ച് പോലീസിനു ഒരു ലക്ഷം രൂപയുടെ ക്യാഷ് അവാര്‍ഡും നല്‍കിയിട്ടുണ്ട്. കൂടാതെ അന്വേഷണം നയിച്ച ഉദ്യോഗസ്ഥന് ഫലകവും മറ്റു ഉദ്യോഗസ്ഥര്‍ക്ക് പ്രശസ്തിപത്രവും നല്‍കുമെന്നും യുപി ഡിജിപി മുകുള്‍ ഗോയൽ വ്യക്തമാക്കി.