പ്രതിരോധ നടപടികള്‍ക്കായി എല്ലാ പ്രശ്‌നബാധിത മേഖലകളിലും കൗണ്ടര്‍-ഡ്രോണ്‍ സാങ്കേതികവിദ്യ വിന്യസിച്ചിട്ടുണ്ടെന്ന് കശ്മീര്‍ സോണ്‍ പോലീസ് ട്വീറ്ററിലൂടെ അറിയിച്ചിരുന്നു.
2019 ല്‍ കേന്ദ്ര സര്‍ക്കാര്‍ ജമ്മു കശ്മീരിനുള്ള പ്രത്യേക പദവി 370 റദ്ദാക്കിയിരുന്നു. അതിനുശേഷമാണ് സംസ്ഥാനത്ത് ഇന്റര്നെറ്റ് സേവനങ്ങള്‍ തടസ്സപ്പെട്ടത്. അതേസമയം, 2003 ന് ശേഷം ഇതാദ്യമായാണ് സ്വാതന്ത്ര്യദിനത്തില്‍ കശ്മീരില് എല്ലാ ഫോണുകളും എസ്.എം.എസ് സര്‍വ്വീസുകളും ഇന്റര്നെറ്റ് സേവനങ്ങളും പ്രവര്‍ത്തിക്കുന്നതെന്ന് നെറ്റിസണ്‍സ് പറഞ്ഞു.
‘അഭിമാനകരമായ നിമിഷം, നയാകാശ്മീരില്‍ നിന്ന് ഇന്ത്യക്ക് സ്വാതന്ത്ര്യദിനാശംസകള്‍. 2003ന് ശേഷം ഇതാദ്യമായാണ്, സ്വാതന്ത്ര്യദിനത്തില്‍ ഇന്റര്നെറ്റ് വിഛേദിക്കാത്തത്, നിയന്ത്രണങ്ങളും ഇല്ല.’ — ഇന്റര്നെറ്റ് ഉപഭോക്താവ് പറഞ്ഞതായി വാര്‍ത്താ ഏജന്‍സിയായ എ.എന്‍.ഐ റിപ്പോര്‍ട്ട് ചെയ്തു.
എയര്‍പോര്‍ട്ടില്‍ ശത്രുക്കളുടെ ഡ്രോണ്‍ വഴി ഉണ്ടായ സ്‌ഫോടനത്തിന്റെ പശ്ചാത്തലത്തിലാണ് ജമ്മുവിലെ ഇന്ത്യന്‍ എയര്‍ഫോഴ്‌സ് (ഐ.എ.എഫ്) സ്റ്റേഷനില്‍ കൗണ്ടര്‍-ഡ്രോണ്‍ സാങ്കേതികവിദ്യ വിന്യസിച്ചത്. ആക്രമണത്തില്‍ രണ്ട് ഐ.എ.എഫ് ഉദ്യോഗസ്ഥര്‍ക്ക് പരിക്ക് പറ്റിയിരുന്നു.
2019ല്‍ സംഭവിച്ചത് എന്ത്?
2019 ആഗസ്റ്റ് 5 നാണ് ജമ്മു കാശ്മീരിന് പ്രത്യേക പദവി നല്‍കിയിരുന്ന ഭരണഘടനയിലെ ആര്‍ട്ടിക്കിള്‍ 370 കേന്ദ്ര സര്‍ക്കാര്‍ പിന്‍വലിച്ചത്. ആഭ്യന്തരമന്ത്രി അമിത് ഷാ 370 റദ്ദാക്കാനുള്ള പ്രമേയം രാജ്യസഭയില്‍ അവതരിപ്പിക്കുകയും രാഷ്ട്രപതി വളരെ വേഗത്തില്‍ തന്നെ ഉത്തരവ് പുറത്തിറക്കുകയുമായിരുന്നു. ഇതോടെ ജമ്മു കാശ്മീര്‍, ലഡാക്ക് എന്നിവ രണ്ട് കേന്ദ്രഭരണപ്രദേശങ്ങളായി മാറുകയും ചെയ്തു.
2019 ഓഗസ്റ്റ് 5 ന് ആര്‍ട്ടിക്കിള്‍ 370 ബി.ജെ.പി സര്‍ക്കാര്‍ റദ്ദാക്കുന്നതിന് ഒരു ദിവസം മുമ്പ് കശ്മീരിലെ ലാന്‍ഡ്ലൈന്‍ ഫോണ്‍ കണക്ഷനുകളും മൊബൈല്‍ സേവനങ്ങളും ഇന്റര്‍നെറ്റും താല്‍ക്കാലികമായി നിര്‍ത്തിവച്ചിരുന്നു. ആഴ്ചകളോളം കശ്മീരിന് പുറം ലോകവുമായുള്ള ബന്ധം വിച്ഛേദിക്കപ്പെട്ടു. എന്നാല്‍ വിമര്‍ശനങ്ങളെ അഭിമുഖീകരിച്ചുകൊണ്ട്, സര്‍ക്കാര്‍ ഏതാനും ആഴ്ചകള്‍ക്ക് ശേഷം കശ്മീരില് ലാന്‍ഡ് ഫോണുകള്‍ പുനസ്ഥാപിച്ചു. എന്നാലും ഇന്റര്നെറ്റ് സേവനം റദ്ദാക്കുക തന്നെയാണ് ചെയ്തത്.
‘ ഇന്റര്നെറ്റ് റദ്ദാക്കിയതുമായി ബന്ധപ്പെട്ട ഒരു റിപ്പോര്‍ട്ട് അനുസരിച്ച്, 2 ജി സേവനങ്ങള്‍ പുനസ്ഥാപിച്ചെങ്കിലും 2019 ആഗസ്റ്റ് 5 മുതല്‍ 2020 മാര്‍ച്ച് വരെ 213 ദിവസം വേഗതയില്ലാത്ത ഇന്റര്‍നെറ്റിന്റെ ഉപയോഗമായിരുന്നു ഉണ്ടായിരുന്നത്. നിരവധി ചെറുപ്പക്കാര്‍ക്ക് ജോലി തടസ്സപ്പെടുകയും മറ്റും ഈ കാലയളവില്‍ സംഭവിച്ചിരുന്നു. ഇതേ തുടര്‍ന്ന് ആളുകള്‍ തെരുവിലിറങ്ങി കേന്ദ്ര സര്‍ക്കാരിനെതിരെ പ്രതിഷേധിച്ചു.
അതേസമയം, കൊവിഡ് പര്‍ന്നുപിടിക്കുന്ന സാഹചര്യത്തില്‍ 4 ജി നിരോധനം കാരണം നാട്ടില്‍ നടക്കുന്ന വിവരങ്ങള്‍ അറിയാനോ ലോകാരോഗ്യ സംഘടനയുടെ നിര്‍ദേശങ്ങള്‍ എന്താണെന്ന് മനസിലാക്കുവാനോ ജനങ്ങള്‍ക്ക് കഴിയുന്നില്ലെന്ന ആക്ഷേപം ഉയര്‍ന്നിരുന്നു. ഇത് മരണസംഖ്യ കൂടാന്‍ വഴിയൊരുക്കിയെന്ന് മെഡിക്കല്‍ സ്ഥാപനങ്ങളും മുന്നറിയിപ്പ് നല്‍കി.
മാത്രമല്ല, പകര്‍ച്ചവ്യാധിയുടെ ഗുരുതരമായ സാഹചര്യത്തില്‍ 4 ജി ഇന്റര്നെറ്റ് പുനസ്ഥാപിക്കാന്‍ ആംനസ്റ്റി ഇന്റര്‍നാഷണലും സര്‍ക്കാരിനോട് ആവശ്യപ്പെട്ടിരുന്നു. 4 ജി ഇന്റര്നെറ്റ് ലഭ്യമല്ലാത്തതും ഓണ്‍ലൈനില്‍ ലഭ്യമായ വിവരങ്ങളുടെ അഭാവവും കാരണം ഇവിടത്തെ ഡോക്ടര്‍മാര്‍ക്കും കൊറോണ വൈറസിനെ നേരിടാന്‍ കഴിയുന്നില്ലെന്ന് വാര്‍ത്താ മാധ്യമങ്ങള്‍ റിപ്പോര്‍ട്ട് ചെയ്തിരുന്നു. ‘ഞങ്ങള്‍ കന്നുകാലികളെപ്പോലെ മരിക്കും’ എന്നാണ് കശ്മീരിലെ ഡോക്ടര്‍മാര്‍ പറഞ്ഞത്.
തുടര്‍ന്ന് 2020 ഏപ്രില്‍ – മേയ് മാസങ്ങളില്‍ 4 ജി ഇന്റര്നെറ്റ് സേവനങ്ങള്‍ നിരോധിച്ചതിനെ ചോദ്യം ചെയ്തുകൊണ്ട് ഒരു കൂട്ടം റിട്ട് ഹര്‍ജികള്‍ സുപ്രീം കോടതിയില്‍ എത്തിയിരുന്നു. എന്നാല്‍ ‘ഇന്റര്നെറ്റ് ലഭിക്കാനുള്ള അവകാശം മൗലികാവകാശമല്ല’ എന്നാണ് ജമ്മു കശ്മീര്‍ ഭരണകൂടം പ്രസ്താവിച്ചിച്ചത്. മാത്രമല്ല, 4 ജി ഇന്റര്നെറ്റ് സേവനങ്ങള്‍ പുനസ്ഥാപിക്കാനുള്ള അഭ്യര്‍ത്ഥന നിരസിച്ചുകൊണ്ട്, മെയ് 11 ന് സുപ്രീം കോടതി ഈ ഹര്‍ജികള്‍ തീര്‍പ്പാക്കുകയും ചെയ്തു. എന്നിരുന്നാലും, മുതിര്‍ന്ന ഉദ്യോഗസ്ഥര്‍ അടങ്ങിയ ഒരു പ്രത്യേക കമ്മിറ്റിയെ രൂപീകരിച്ച് ഈ വിഷയം പരിശോധിക്കാന്‍ കോടതി ആവശ്യപ്പെടുകയും ചെയ്തു.
പിന്നീട് ജമ്മു കശ്മീരിലെ 20 ജില്ലകളില്‍ രണ്ടിടത്ത് 4 ജി മൊബൈല്‍ ഇന്റര്നെറ്റ് സേവനങ്ങള്‍ പുനസ്ഥാപിച്ചിരുന്നു. 2020 ഓഗസ്റ്റ് 16 നാണ് ജമ്മുവിലെ ഉദാംപൂരിലും കശ്മീരിലെ ഗന്ദേര്‍ബാലിലുമായി പരീക്ഷണാടിസ്ഥാനത്തില്‍ ഇന്റര്നെറ്റ് സേവനങ്ങള്‍ പുനസ്ഥാപിച്ചത്. ഇന്റര്നെറ്റ് സേവനങ്ങള്‍ പുനസ്ഥാപിച്ചാല്‍, സുരക്ഷാ പ്രശ്നങ്ങളൊന്നും ഉണ്ടാക്കില്ലെന്ന സുരക്ഷാ ഏജന്‍സികളുടെ റിപ്പോര്‍ട്ടുകളുടെ അടിസ്ഥാനത്തിലായിരുന്നു ഈ നടപടി.
ഇതേത്തുടര്‍ന്ന് 18 മാസത്തെ നിരോധനത്തിന് ശേഷം ജമ്മു കശ്മീരിലെ എല്ലാ ജില്ലകളിലും 4ജി ഇന്റര്നെറ്റ് സേവനങ്ങള്‍ പുനസ്ഥാപിക്കുകയും ചെയ്തു. എന്നാല്‍ പലപ്പോഴും സ്‌കൂള്‍ വിദ്യാര്‍ത്ഥികള്‍ക്ക് ഓണ്‍ലൈന്‍ ക്ലാസുകള്‍ കേള്‍ക്കുവാന്‍ കഴിയുന്നില്ലെന്ന പരാതികളും പലഭാഗത്തു നിന്നും ഉയര്‍ന്നിരുന്നു.
****
