മേഘാലയ എങ്ങനെ പെട്ടന്നൊരു കലാപത്തിന് വേദിയായി?

എന്താണ് സംഘര്‍ഷത്തിന് പിന്നില്‍?

വിഘടനവാദിയും നിരോധിത സംഘടന, ഹൈനിവ്ട്രപ് നാഷണൽ ലിബറേഷൻ കൗൺസിൽ (Hynniewtrep National Liberation Council) മുൻ ജനറൽ സെക്രട്ടറിയുമായ ചെറിഷ്സ്റ്റര്‍ഫീല്‍ഡ് താങ്‍ഖ്യൂ (Cheristarfield Thangkhiew) കൊല്ലപ്പെട്ടതിന് പിന്നാലെയാണ് സംസ്ഥാനത്ത് സംഘര്‍ഷം ഉണ്ടായത്.

ഓഗസ്റ്റ് 13-നാണ് താങ്‍ഖ്യൂ കൊല്ലപ്പെടുന്നത്. പോലീസ് പുലര്‍ച്ചെ ഇയാളുടെ വീട്ടില്‍ നടത്തിയ തെരച്ചിലിന് ഇടയില്‍ താങ്‍ഖ്യൂ പോലീസുകാരെ കത്തി ഉപയോഗിച്ച് ആക്രമിച്ചെന്നും ഇതേ തുടര്‍ന്ന് വെടിവെച്ചെന്നുമാണ് പോലീസ് ഭാഷ്യം.

ഇത് പൂര്‍ണമായും ഇയാളുടെ അനുയായികള്‍ നിഷേധിക്കുകയാണ്. വ്യാജ ഏറ്റുമുട്ടലിലൂടെ താങ്ഖ്യൂവിനെ വധിച്ചെന്നാണ് ഇവരുടെ വാദം. നൂറുകണക്കിന് അനുയായികളാണ് താങ്ഖ്യൂവിന്‍റെ മൃതദേഹവുമായി സെമിത്തേരിയിലേക്ക് പോയത് — വാര്‍ത്താ ഏജൻസി പി.റ്റി.ഐ റിപ്പോര്‍ട്ടു ചെയ്യുന്നു.

ആരാണ് ചെറിഷ്സ്റ്റര്‍ഫീല്‍ഡ് താങ്‍ഖ്യൂ?

മേഘാലയയിലെ ഇന്ത്യ വിരുദ്ധ വിഘടനവാദി സംഘടനകളിലൊന്നായ ഹൈനിവ്ട്രപ് നാഷണൽ ലിബറേഷൻ കൗൺസിൽ എന്ന സംഘടനയുടെ സായുധ പോരാളികളില്‍ ഒരാളാണ് കൊല്ലപ്പെടുമ്പോള്‍ 56 വയസ്സുകാരനായ ചെറിഷ്സ്റ്റര്‍ഫീല്‍ഡ് താങ്‍ഖ്യൂ.

മേഖലയിലെ ആദിവാസി സമൂഹത്തെ പ്രതിനിധീകരിക്കുന്നു എന്ന് അവകാശപ്പെടുന്ന സംഘടന, കൊലപാതകം, തട്ടിക്കൊണ്ടുപോകല്‍ തുടങ്ങിയ ഗ്യാങ് വയലന്‍സിന് സമാനമായ രീതിയിലായിരുന്നു പ്രവര്‍ത്തിച്ചിരുന്നത്.

1997ല്‍ ഒരു വിഘടനവാദി സംഘടന വിഭജിച്ചാണ് ഹൈനിവ്ട്രപ് നാഷണൽ ലിബറേഷൻ കൗൺസിൽ ഉണ്ടായത്. 1987 മുതല്‍ സായുധ പോരാട്ടത്തിലാണ് ചെറിഷ്സ്റ്റര്‍ഫീല്‍ഡ് താങ്‍ഖ്യൂ. ദീര്‍ഘകാലം ബംഗ്ലാദേശില്‍ ഒളിവില്‍ കഴിഞ്ഞ താങ്‍ഖ്യൂ, 2018ല്‍ സര്‍ക്കാരിന് കീഴടങ്ങിയിരുന്നു.

മേഖലയില്‍ ഇന്ത്യന്‍ സൈന്യത്തിനും ബംഗ്ലാദേശ് സുരക്ഷാസേനയ്ക്കും നേരെയുണ്ടായ ഐ.ഇ.ഡി സ്ഫോടനങ്ങളില്‍ താങ്‍ഖ്യൂവിന് പങ്കുണ്ടെന്നാണ് ഇന്ത്യ സംശയിക്കുന്നത്.

താങ്‍ഖ്യൂവിന്‍റെ മരണത്തിന് ശേഷം മേഘാലയയില്‍ സംഭവിച്ചത്?

വ്യാപക അക്രമങ്ങളെ തുടര്‍ന്ന് തലസ്ഥാനമായ ഷില്ലോങ്ങിൽ കർഫ്യൂ ഏർപ്പെടുത്തി. നാല് ജില്ലകളിൽ ഇന്‍റര്‍നെറ്റ് സേവനങ്ങൾ നിർത്തിവച്ചു. ഷില്ലോങ്ങിലെ ജയാവ് പ്രദേശത്ത് താങ്‍ഖ്യൂവിൻ്റെ അനുയായികൾ സർക്കാർ വാഹനങ്ങൾ നശിപ്പിച്ചു. പോലിസ് ജീപ്പുകൾക്ക് തീയിട്ടു.

മുഖ്യമന്ത്രിയുടെ വീടിന് നേര്‍ക്ക് അക്രമികള്‍ പെട്രോള്‍ ബോംബ് എറിഞ്ഞു – എൻ.ഡി.ടി.വി റിപ്പോര്‍ട്ടു ചെയ്‍തു.

താങ്‍ഖ്യൂവിന്‍റെ മരണത്തില്‍ മേഘാലയ മനുഷ്യാവകാശ കമ്മീഷൻ സ്വമേധയ കേസെടുത്തു. 15 ദിവസത്തിനുള്ളിൽ സംഭവത്തെക്കുറിച്ച് വിശദമായ റിപ്പോർട്ട് സമർപ്പിക്കാൻ കമ്മീഷൻ ചീഫ് സെക്രട്ടറിയോട് നിർദ്ദേശിച്ചു.

****