അഫ്ഗാനില്‍ വിജയത്തിന് അടുത്തെത്തിയ താലിബാന്‍ സന്തോഷം കൊണ്ട് കരയുന്ന ഒരു വീഡിയോ റമീസ് എന്ന ട്വിറ്റര്‍ അക്കൗണ്ടില്‍ ട്വീറ്റ് ചെയ്തിരുന്നു. ഇതാണ് തരൂര്‍ റീട്വീറ്റ് ചെയ്തത്. വീഡിയോയുടെ ഏഴാം സെക്കന്‍ഡില്‍ മലയാളത്തില്‍ ”സംസാരിക്കട്ടെ,” എന്ന പരാമര്‍ശമുണ്ടെന്നാണ് തരൂരിന്റെ വാദം.
ഈ പരാമര്‍ശത്തിന് എതിരെ എഴുത്തുകാരന്‍ എന്‍.എസ് മാധവന്‍ അടക്കമുള്ള പ്രമുഖര്‍ രംഗത്തെത്തി. വീഡിയോ വീണ്ടും വീണ്ടും കേട്ടതില്‍ നിന്നും സംസാരിക്കട്ടെ എന്ന പരാമര്‍ശമുള്ളതായി തോന്നിയില്ലെന്ന് എന്‍.എസ് മാധവന്‍ ട്വീറ്റില്‍ പറയുന്നു.
ഇസ്ലാം മത വിശ്വാസികളുടെ പുണ്യജലമായ ‘സംസം’ എന്ന അറബിക് വാക്കോ തമിഴില്‍ ഭാര്യയെന്ന് അര്‍ത്ഥം വരുന്ന ‘ സംസാരം’ എന്ന വാക്കോ ആകാം. അതല്ലെങ്കില്‍ വീഡിയോവില്‍ ഉള്ളവരുടെ പ്രാദേശിക ഭാഷയുമാവാം. ഭാര്യയെന്ന പദം തരൂരിന് പ്രകോപനമുണ്ടാക്കുന്നുണ്ടെങ്കില്‍ അതിന് മലയാളികളെ എന്തിനാണ് വലിച്ചിഴക്കുന്നതെന്നും എന്‍.എസ് മാധവന്‍ ട്വീറ്റില്‍ ചോദിക്കുന്നു.
അതേസമയം, തരൂരിന്റെ ട്വീറ്റ് മഞ്ഞുമലയുടെ അറ്റം മാത്രമാണെന്ന് ബി.ജെ.പി ഡല്‍ഹിഘടകം ഐടി സെല്‍ അംഗമായ വിനീത് ഗോയങ്ക ട്വീറ്റ് ചെയ്തു.
വ്യാജ മതേതരത്തിന്‍റെ കീഴില്‍ കോണ്‍ഗ്രസും ഇടതുപക്ഷവും കേരളത്തെ നശിപ്പിക്കുകയാണ്. കേരളം ഇസ്ലാമിക തീവ്രവാദത്തിന്റെ റിക്രൂട്ടിങ് ഹോട്ട്‌സ്‌പോട്ടായി മാറുകയാണെന്ന വസ്തുത തന്റെ എനിമീസ് വിതിന്‍ (EnemiesWithin) എന്ന പുസ്തകത്തില്‍ വിശദീകരിച്ചിട്ടുണ്ടെന്നും വിനീത് ഗോയങ്ക ട്വീറ്റ് ചെയ്തു.
തരൂരിന്റെ ട്വീറ്റ് ശ്രദ്ധ പിടിച്ചുപറ്റിയതോടെ വീഡിയോ ആദ്യം ട്വീറ്റ് ചെയ്ത റമീസ് വിശദീകരണവും നല്‍കി. കേരളത്തില്‍ നിന്നുള്ള ആരും താലിബാന്റെ നേതൃത്വത്തിലോ അംഗത്വത്തിലോ ഇല്ലെന്ന് റമീസ് പറയുന്നു. വീഡിയോയില്‍ കാണുന്നവരെല്ലാം സാബുള്‍ പ്രവിശ്യയിലെ ‘ബ്രഹൂയി’ ഭാഷ സംസാരിക്കുന്നവരാണ്. മലയാളം, തമിഴ്, തെലുങ്ക് എന്നീ ഭാഷകളോട് ഏറെ സാമ്യമുള്ള ഒരു ദ്രാവിഡ ഭാഷയാണിതെന്നും റമീസ് മറ്റൊരു ട്വീറ്റില്‍ വിശദീകരിച്ചു.
കേരള മുസ്ലീംകള്‍ക്കെതിരെ അടിസ്ഥാനരഹിതമായ ആരോപണങ്ങളുന്നയിച്ച് അവരെ വേട്ടയാടുന്നതിന് വേണ്ട സാഹചര്യമുണ്ടാക്കാന്‍ ചിലര്‍ ശ്രമിക്കുന്നതായും മറ്റൊരു ട്വീറ്റില്‍ റമീസ് പറയുന്നു.
ഇന്ത്യന്‍ തെരുവുകളില്‍ ആള്‍ക്കൂട്ടകൊലപാതകങ്ങള്‍ നടക്കുന്നത് ലോകത്തിന് അറിയാം. യാഥാര്‍ത്ഥ്യം മറ്റൊന്നായിരിക്കെ നല്ലതു ചമയാന്‍ ശ്രമിക്കേണ്ടതില്ല. ഇന്ത്യയിലെ ആര്‍.എസ്.എസ് നേതൃത്വത്തിലുള്ള മോദി സര്‍ക്കാരിന്‍റെ കുറ്റകൃത്യങ്ങളെയും അപലപിക്കേണ്ടതുണ്ടെന്നും റമീസ് പ്രതികരിച്ചു.
ട്വീറ്റ് ചര്‍ച്ചയായതോടെ മറുപടിയുമായി ശശിതരൂരും രംഗത്തെത്തി. വീഡിയോയിലെ സംഭാഷണം ഭാഷാവിദ്ഗധര്‍ പരിശോധിക്കട്ടെ. വഴിതെറ്റിയ മലയാളികള്‍ താലിബാനില്‍ അംഗത്വമെടുത്തിട്ടുണ്ടാവാം. അതിനുള്ള സാധ്യത പൂര്‍ണമായും തള്ളിക്കളയാനാവില്ലെന്നും തരൂരിന്റെ ട്വീറ്റ് പറയുന്നു.
കാബൂളില്‍ തടവില്‍ കഴിഞ്ഞിരുന്ന ഐ.എസ് ബന്ധമുള്ള മലയാളികള്‍ അടക്കമുള്ളവരെ താലിബാന്‍ മോചിപ്പിച്ചെന്ന വാര്‍ത്ത പങ്കുവെച്ചും തരൂര്‍ ഒരു ട്വീറ്റ് ചെയ്തു. തന്റെ ആദ്യ ട്വീറ്റിനെ അപലപിച്ച എല്ലാവരും താലിബാന്‍ മോചിപ്പിച്ചവര്‍ ആരൊക്കെയാണെന്നു മനസിലാക്കിയിട്ടുണ്ടാവുമെന്നായിരുന്നു ട്വീറ്റ്.
വിവാദങ്ങള്‍ക്കിടെ കേരളത്തിലെ കോണ്‍ഗ്രസിനും ഇടതുപക്ഷ സര്‍ക്കാരിനുമെതിരെ ബി.ജെ.പി ദേശീയ അധ്യക്ഷന്‍ ജെ.പി നദ്ദയും രംഗത്തെത്തി. കേരളത്തിലെ മുസ്ലീം മൗലികവാദികളെ പ്രീണിപ്പിക്കുന്ന നയമാണ് കോണ്‍ഗ്രസും ഇടതുപക്ഷവും സ്വീകരിക്കുന്നതെന്ന് ജെ.പി നദ്ദ പറഞ്ഞു. ബി.ജെ.പി കോഴിക്കോട് ജില്ലാ കമ്മിറ്റി ഓഫിസ് ഉദ്ഘാടനം ചെയ്യുമ്പോള്‍ ജെ.പി നദ്ദ ഇങ്ങനെ പറഞ്ഞതെന്ന് ടൈംസ് ഓഫ് ഇന്ത്യ റിപ്പോര്‍ട്ട് ചെയ്യുന്നു.
കേരളം തീവ്രവാദികളുടെ സുരക്ഷിത താവളമായി മാറിയിരിക്കുകയാണ്. തീവ്രവാദ സംഘടനകള്‍ക്കെതിരെ എല്‍.ഡി.എഫ് സര്‍ക്കാര്‍ കര്‍ശന നടപടി സ്വീകരിക്കുന്നില്ലെന്നും അദ്ദേഹം ആരോപിച്ചു.
താലിബാനും ഐ.എസും
താലിബാനും ഐഎസും തീവ്രവാദ സംഘടനകളാണെങ്കിലും ഇരുകൂട്ടരുടെയും രാഷ്ട്രീയ-പ്രത്യയശാസ്ത്ര കാഴ്ച്ചപാടുകള്‍ വ്യത്യസ്തമാണെന്നാണ് ബ്രിട്ടീഷ് മാധ്യമമായ ദ ഇന്‍ഡിപെൻഡന്‍റല്‍ വന്ന ഒരു റിപ്പോര്‍ട്ട് വിശദീകരിക്കുന്നത്.
അഫ്ഗാനിസ്ഥാനില്‍ 2015 മുതല്‍ ഇരുകൂട്ടരും തമ്മില്‍ സംഘര്‍ഷം പതിവാണ്. അഫ്ഗാനിസ്താനിലെ മുന്‍ ഭരണകൂടം തടവിലാക്കിയ മലയാളികള്‍ അടക്കമുള്ള ഐ.എസ് ഭീകരവാദികളെ കഴിഞ്ഞ ദിവസം താലിബാന്‍ മോചിപ്പിച്ചിരുന്നുവെന്ന് മാതൃഭൂമി റിപ്പോര്‍ട്ട് ചെയ്തിരുന്നു.
നിമിഷ എന്ന ഫാത്വിമ, മെറിന്‍ ജേക്കബ് എന്ന മറിയം, സോണിയ സെബാസ്റ്റിയന്‍ എന്ന ആയിശ, റഫാല ഇജാസ് തുടങ്ങിയവരെ താലിബാന്‍ മോചിപ്പിച്ചുവെന്നാണ് റിപ്പോര്‍ട്ട്. ഇതില്‍ നിമിഷയെ ഇന്ത്യയിലേക്ക് തിരിച്ചുകൊണ്ടുവരണമെന്ന അമ്മയുടെ ഹര്‍ജി ഹൈക്കോടതിയുടെ പരിഗണനയിലാണ്.
അഫ്‍ഗാനിസ്ഥാന്‍ പ്രദേശങ്ങള്‍ കൂടെ ഉള്‍പ്പെടുന്ന തന്ത്രപ്രധാനമായ ഖൊറസാന്‍ പ്രദേശത്ത് രൂപീകരിച്ച ഇസ്ലാമിക് സ്റ്റേറ്റ് ഭരണപ്രദേശമാണ് ഇസ്ലാമിക് സ്റ്റേറ്റ് ഖൊറസാന്‍ (ഐ.എസ്. – കെ). മലയാളികളായ ഐ.എസ് അംഗങ്ങള്‍ ഇവിടെയാണ് പ്രവര്‍ത്തിച്ചിരുന്നത്. മുൻ താലിബാന്‍ കമാൻഡര്‍ ആയിരുന്ന ഹഫീസ് സയീദ് ഖാന്‍ ആയിരുന്നു ആദ്യ അമിര്‍ (emir) — സെന്‍റര്‍ ഫോര്‍ സ്ട്രറ്റജിക് ആൻഡ് ഇന്‍റര്‍നാഷണല്‍ സ്റ്റഡീസ് റിപ്പോര്‍ട്ടു പറയുന്നു.
യു.എസ് വ്യോമാക്രമണം രൂക്ഷമായിരുന്ന ഖൊറസാന്‍ മേഖലയില്‍ ഐ.എസ്-കെയ്ക്ക് സ്വാധീനം കുറവായിരുന്നു. താലിബാന്‍ ഏതാണ്ട് പൂര്‍ണമായും അഫ്‍ഗാന്‍ പ്രവശ്യകള്‍ കീഴടക്കിയതോടെ തല്‍ക്കാലത്തേക്കാണെങ്കിലും ഐ.എസ്-കെയെക്കുറിച്ച് വിവരമില്ല.
****
