ഓട്‌സ് പൊതുവേ ഇന്ന് അംഗീകരിയ്ക്കപ്പെട്ടിട്ടുള്ള ഒന്നാണ്. ഏതു പ്രായക്കാര്‍ക്കും ഏതു രോഗികള്‍ക്കും കഴിയ്ക്കാവുന്ന ഭക്ഷണവസ്തുവാണിത്. പത്തു ശതമാനം ധാതുക്കള്‍ ഉണ്ട്, മഗ്നീഷ്യം അടങ്ങിയിട്ടുണ്ട്. എന്നാല്‍ അടുപ്പിച്ച് ഇതു കഴിച്ചാലും തടി കുറയില്ല, പ്രമേഹം, കൊളസ്‌ട്രോള്‍ കുറവ് വരുന്നില്ലെന്ന് പരാതിപ്പെടുന്നവരുമുണ്ട്. ഇതിന് കാരണവുമുണ്ട്. നാം ഓട്‌സ് കഴിയ്ക്കുന്ന രീതിയും തെരഞ്ഞെടുക്കുന്ന തരവുമെല്ലാം ആരോഗ്യ ഗുണങ്ങള്‍ ലഭിയ്ക്കാന്‍ ഏറെ പ്രധാനമാണ്. ഇതില്‍ തെറ്റു വരുത്തുമ്പോഴാണ് ദോഷം വരുന്നത്.

ഓട്‌സ്

അമേരിക്ക, യൂറോപ്പില്‍ കൃഷി ചെയ്യുന്ന ഒന്നാണ് ഇത്. ഇത് കൃഷി ചെയ്ത് വിളവെടുത്ത് പുഴുങ്ങിയാണ് ലഭിയ്ക്കുന്നത്. ഇതിലെ ചില എന്‍സൈമുകള്‍ പോലുള്ള നശിപ്പിയ്ക്കാന്‍ ഇത് അത്യാവശ്യമാണ്‌. ഇതിനു ശേഷം രണ്ടാമതും പ്രോസസ് ചെയ്താണ് ഓട്‌സ് നമുക്കു ലഭിയ്ക്കുന്നത്. ഇതില്‍ മൂന്നു തരം ഓട്‌സ് ഉണ്ട്. ആദ്യത്തേത് സ്റ്റീല്‍ കട്ട് ആണ്. അരിയും മററും മുറിച്ചെടുത്താല്‍ എങ്ങനെ വരും, ആ രൂപത്തില്‍ തന്നെയാണ് ഇതു വരിക. ഇതില്‍ ധാരാളം നാരുകള്‍ ഉണ്ട്. ഇത് ഇന്ത്യയില്‍ കാര്യമായി ലഭ്യമല്ല. ഇതിനാണ് ഓട്‌സിന്റെ എല്ലാ ഗുണങ്ങളുമുള്ളത്. ഇത് പെട്ടെന്ന് പാകം ചെയ്യാനും പറ്റില്ല. രുചിയും കുറവാണ്. എന്നാല്‍ ഗുണം ഏറെയാണ്

റോള്‍ഡ് ഓട്‌സ്

രണ്ടാമത്തേത് റോള്‍ഡ് ഓട്‌സ് ആണ്. ഓട്‌സ ധാന്യമണികളെ പുഴുങ്ങിയെടുത്ത് ഇത് പേര് സൂചിപ്പിയ്ക്കുന്നത് പോലെ തന്നെ അടിച്ചു പരത്തിയെടുക്കുന്നതാണ് ഇത്. അവല്‍ ഉണ്ടാക്കുന്നതു പോലെയുള്ള പ്രോസസ് ആണിത്. ഇതാണ് നമ്മുടെ നാട്ടില്‍ ലഭിയ്ക്കുന്നത്. ഇത് വേഗം പാകം ചെയ്യാന്‍ സാധിയ്ക്കും. അവല്‍ ഷേപ്പില്‍ ഇവ ലഭിയ്ക്കും. ആദ്യം പറഞ്ഞ സ്റ്റീല്‍ കട്ടിനെ പ്രോസസ് ചെയ്താണ് ഇതെടുക്കുന്നത്. എന്നാല്‍ ആദ്യത്തെ ഓട്‌സിന്റെ ഗുണം ഇല്ല. രുചിയുണ്ടാകും. കൂടുതല്‍ കാര്‍ബോഹൈഡ്രേറ്റുകളും.

ഇന്‍സ്റ്റന്റ് ഓട്‌സ്

മൂന്നാം വിഭാഗത്തില്‍ ഇന്‍സ്റ്റന്റ് ഓട്‌സ് പെടും. ഇതാണ് നാം കൂടുതല്‍ ഉപയോഗിയ്ക്കുന്നത്. ഇത് പ്രോസസ് കുറേ തവണ ചെയ്യുന്നു. പെട്ടെന്ന് പാകം ചെയ്യാന്‍ സാധിയ്ക്കും. ഏതാണ്ട് 1 മിനിറ്റ് വേവിച്ചാല്‍ മതിയാകും. അതു പോലെ സ്വാദും കൂടും. എന്നാല്‍ ഇതില്‍ നാരുകളോ മിനറലുകളോ അധികമില്ല. കാര്‍ബോഹൈഡ്രേറ്റുകളാണ് കൂടുതല്‍. ഓട്‌സില്‍ 380-400 കലോറി പാകം ചെയ്യുമ്പോള്‍ വരുന്നു. നാം പാല്‍ ചേര്‍ത്താണ് ഇത് നാം പൊതുവേ തയ്യാറാക്കുന്നു. പാലില്‍ 50 കലോറി എന്നു കണക്കാക്കാം.

കലോറി

പ്രമേഹം, വണ്ണം, കൊളസ്‌ട്രോള്‍ കുറയണമെങ്കില്‍ കലോറി കുറയണം. എന്നാല്‍ ഈ ഓട്‌സ് ഇങ്ങനെ കഴിയ്ക്കുമ്പോള്‍ ഇഡ്ഢലി പോലുള്ളവ കഴിയ്ക്കുന്നതിനേക്കാള്‍ കൂടുതലായി കലോറി കൂടുന്നു. മാത്രമല്ല, ഇതിന്റെ ഗ്ലൈസമിക് ഇന്‍ഡെക്‌സ് വാല്യൂ, അതായത് നിശ്ചിത സമയത്തില്‍ പഞ്ചസാര രക്തത്തില്‍ ഉയര്‍ത്താനുള്ള കഴിവ്, സ്റ്റീല്‍ കട്ട് ആണെങ്കില്‍ 43-66 വരെ, റോള്‍ഡ് ഓട്‌സ് 55-70 വരെ, ഇന്‍സ്റ്റന്റ് ഓട്‌സിന്റെ 70-90 വരെയാണ്. നമ്മുടെ ചോറിന് 80 വരെയാണ് വരുന്നത്. അതായത് ഇന്‍സ്റ്റന്റ് ഓട്‌സ് വാല്യൂ ചോറിനേക്കാള്‍ കൂടുതലാണ്. ഇത്തരം ഓട്‌സ് ഗുണത്തേക്കാള്‍ ദോഷം വരുത്തുന്നു.

​ഓട്‌സ് വാങ്ങുമ്പോഴും

ഓട്‌സ് വാങ്ങുമ്പോഴും പാകം ചെയ്യുമ്പോഴും ശ്രദ്ധിച്ചാല്‍ ഗുണമുണ്ടാകും. ഹോള്‍ ഗ്രെയിന്‍ ഓട്‌സ്, സ്റ്റീല്‍ കട്ട് ഓട്‌സ്, ഐറിഷ് ഓട്‌സ് എന്നിവ വേണം വാങ്ങുവാന്‍. ഇവ ഓണ്‍ലൈനായി വാങ്ങാന്‍ ലഭിയ്ക്കും. ഇത് വലിയ രുചിയില്ലെങ്കിലും ഓട്‌സിന്റെ തനതായ ഗുണം ലഭിയ്ക്കുന്നു. ഇത് പാകം ചെയ്യുന്നതും പ്രധാനമാണ്. ഇത് പാലില്‍ ചേര്‍ത്ത് കഞ്ഞി പോലെ കഴിച്ചാല്‍ ഗ്ലൈസമിക് ഇന്‍ഡെക്‌സ് കൂടുന്നു. പകരം ഇഡ്ഢലി, ഉപ്പുമാവ്, പുട്ട് പോലുള്ള രൂപത്തില്‍ ഇത് കഴിയ്ക്കാം. അല്ലെങ്കില്‍ അവല്‍ നനച്ചു കഴിയ്ക്കുന്നതു പോലെ കഴിയ്ക്കാം. ഇതില്‍ നട്‌സ് പോലുള്ള ചേര്‍ത്താല്‍ ഏറെ നല്ലതാണ്. അല്ലെങ്കില്‍ പച്ചക്കറികള്‍ ചേര്‍ക്കാം. ഇത് രുചിയും കൂട്ടും.