മുഖത്തുണ്ടാകുന്ന കരുവാളിപ്പ് പലരേയും അലട്ടുന്ന ഒന്നാണ്. പ്രത്യേകിച്ചു വെയിലിലും മറ്റും ഇറങ്ങുമ്പോള്‍. നിറമുള്ളവര്‍ക്കു പോലും ചിലപ്പോള്‍ മുഖത്തു നിറ വ്യത്യാസത്തിന് ഇട വരുത്തുന്ന ഒരു പ്രശ്‌നമാണ് കരുവാളിപ്പ്. പ്രത്യേകിച്ചും സെന്‍സിറ്റീവ് ചര്‍മമെങ്കില്‍. ഇതിന് പരിഹാരമായി വീട്ടില്‍ തന്നെ തയ്യാറാക്കാവുന്ന പല ചേരുവകളുമുണ്ട്. യാതൊരു ദോഷവുമില്ലാത്ത വീട്ടുവൈദ്യം. ഏതു തരം ചര്‍മത്തിനും ഉപയോഗിയ്ക്കാന്‍ പറ്റുന്ന ഇത്തരത്തിലെ ഒരു പായ്ക്കിനെ കുറിച്ചറിയൂ.

​ഓട്‌സ്

ഓട്‌സ്, തക്കാളി, തൈര് എന്നിവയാണ് ഇതിനായി വേണ്ടത്. ഏറ്റവും ആരോഗ്യകരമായൊരു ഭക്ഷണമായി കൂടുതലാളുകളും ഉപയോഗിച്ചുവരുന്ന ഓട്‌സ് നിങ്ങളുടെ ചർമ്മ സംരക്ഷണത്തിനും ഏറ്റവും യോജിച്ചതാണ് എന്ന കാര്യം അറിയാമോ? ചർമ്മത്തെ ശുദ്ധീകരിക്കുകയും പരിപോഷിപ്പിക്കുകയും സുഖപ്പെടുത്തുകയും ചെയ്യാനുള്ള അത്ഭുത ഗുണങ്ങളുണ്ട് ഓട്‌സിൽ. ശരീര ചർമ്മത്തെ ശുദ്ധീകരിക്കാൻ ശേഷിയുള്ള സാപ്പോണിൻസ് എന്ന രാസ ഘടകങ്ങൾ ഓട്‌സിൽ ആവശ്യത്തിലധികം ഉണ്ട്. സാപ്പോണിൻസ് എന്ന പ്രകൃതിദത്ത ഘടകങ്ങൾ ഓട്‌സിൽ അടങ്ങിയിട്ടുള്ളതിനാൽ ഇത് ചർമ്മ സുഷിരങ്ങളിലൂടെ പുറന്തള്ളുന്ന അഴുക്കിനേയും എണ്ണയേയും നീക്കം ചെയ്തു കൊണ്ട് വൃത്തിയായി സംരക്ഷിക്കാൻ സഹായിക്കുന്നു.ബ്ലാക്‌ഹെഡ്സ് ഉണ്ടാകാൻ കാരണമാകുന്ന അഴുക്കും മാലിന്യങ്ങളും ചർമ്മത്തിൽ നിന്ന് നീക്കം ചെയ്യാൻ സഹായിക്കുന്ന ഗുണങ്ങളാൽ സമ്പന്നമാണ് ഓട്‌സ്. ചർമ്മത്തിന് കേടുപാടുകൾ വരുത്താതെ നിർജ്ജീവ ചർമ്മത്തെ പുറംതള്ളുന്ന മികച്ച സ്‌ക്രബുകളിൽ ഒന്നാണ് ഓട്സ്.

തക്കാളി

ആരോഗ്യകരമായ കാര്യങ്ങള്‍ക്ക് ഏറെ സഹായിക്കുന്ന തക്കാളി സൗന്ദര്യത്തിനും ഏറെ നല്ലതാണ്. പല തരത്തിലെ സൗന്ദര്യ പ്രശ്‌നങ്ങള്‍ക്കുള്ള നല്ലൊരു പരിഹാരമാണിത്. തക്കാളി പല തരത്തിലും സൗന്ദര്യ പ്രശ്‌നങ്ങള്‍ക്ക് മരുന്നായി ഉപയോഗിയ്ക്കാം.പതിവായി വെയിലേൽക്കുന്നവരുടെ ചർമ്മത്തിൽ കരുവാളിപ്പ് ഉണ്ടാകാൻ സാധ്യത ഏറെയാണ്. ചർമ്മത്തിലെ കരുവാളിപ്പ് അകറ്റാൻ തക്കാളി ഫലപ്രദമായി ഉപയോഗിക്കാം. ചര്‍മത്തിന് തിളക്കം നല്‍കുന്ന നല്ലൊരു കൂട്ടു കൂടിയാണിത്.

തൈര്

ആരോഗ്യ സംരക്ഷണത്തില്‍ മാത്രമല്ല, സൗന്ദര്യ സംകക്ഷണത്തിലും മികച്ചതാണ് തൈര്. ചര്‍മത്തിന് ഈര്‍പ്പം നല്‍കുന്ന, ചര്‍മത്തിലെ ചുളിവുകള്‍ അകറ്റുന്ന, പ്രോട്ടീന്‍ ഗുണം നല്‍കുന്ന ഒന്നാണിത്. . ലാക്ടിക് ആസിഡ് അടങ്ങിയ ഇത് നല്ലൊരു ബ്ലീച്ചിംഗ് ഇഫക്ടാണ് നല്‍കുന്നത്.തൈരിൽ സമ്പുഷ്ടമായി അടങ്ങിയിരിക്കുന്ന കൊഴുപ്പ് ചർമ്മത്തിലെ ഈർപ്പം നിലനിർത്തുവാൻ സഹായിക്കും, ഇത് വളരെനേരം ചർമ്മത്തിൽ ജലാംശം നിലനിർത്തുന്നു. ചർമ്മത്തിലെ കരുവാളിപ്പ്, മങ്ങൽ, നിറവ്യത്യാസം എന്നിവ പരിഹരിക്കാനും ഇത് സഹായിക്കുന്നു.

​ഓട്‌സ്

ഓട്‌സ് തരുപ്പായി പൊടിയ്ക്കുക. തക്കാളി പള്‍പ്പാക്കി അടിച്ചെടുക്കാം. ഇതില്‍ പാകത്തിനു തൈരും ചേര്‍ത്ത് ഇവയെല്ലാം കൂട്ടിയിളക്കി ചര്‍മത്തില്‍ പുരട്ടാം. സ്‌ക്രബ് ചെയ്തു പുരട്ടുക. പിന്നീട് ഉണങ്ങുമ്പോള്‍ കഴുകാം. മുഖക്കുരു പ്രശ്‌നമെങ്കില്‍ അതില്‍ അല്‍പം മഞ്ഞള്‍പ്പൊടി കൂടി കലര്‍ത്താം. കരുവാളിപ്പിനും സണ്‍ടാന്‍ പോലുള്ള പ്രശ്‌നങ്ങള്‍ക്കും ഇത് ഏറെ നല്ലതാണ്.