തന്ത്രം മെനഞ്ഞ് സോണിയ; 18 ബിജെപി വിരുദ്ധ പാര്‍ട്ടികൾ ഒരേ വേദിയിൽ; ഇന്ന് നിര്‍ണായക യോഗം

ന്യൂഡൽഹി: അടുത്ത ലോക്സഭാ തെരഞ്ഞെടുപ്പ് ലക്ഷ്യമിട്ട് ഇന്ന് ഡൽഹിയിൽ പ്രതിപക്ഷ നേതാക്കളുടെ യോഗം. കോൺഗ്രസ് അധ്യക്ഷ സോണിയ ഗാന്ധിയുടെ നേതൃത്വത്തിലാണ് ബിജെപി വിരുദ്ധ പാ‍ര്‍ട്ടികളുടെ ദേശീയയോഗം നടക്കുന്നത്. പ്രതിപക്ഷ പാര്‍ട്ടികളുട ഉന്നത നേതാക്കളും ബിജെപി സഖ്യമില്ലാത്ത സര്‍ക്കാരുകളിലെ മുഖ്യമന്ത്രിമാരും യോഗത്തിൽ പങ്കെടുക്കും.



ബിജെപിയ്ക്കെതിരെ വിശാല പ്രതിപക്ഷ സഖ്യം രൂപീകരിക്കുക എന്ന ലക്ഷ്യവുമായാണ് കോൺഗ്രസിൻ്റെ നേതൃത്വത്തിൽ നിര്‍ണായക യോഗം നടക്കുന്നത്. കേന്ദ്രസര്‍ക്കാരിനെതിരെ ഏകീകൃത നയം രൂപീകരിക്കാനും വിവിധ പ്രശ്നങ്ങളിൽ രാജ്യവ്യാപക പ്രതിഷേധം നടത്താനുമാണ് പാര്‍ട്ടികളുടെ ശ്രമം. എൻസിപി അധ്യക്ഷൻ ശരദ് പവാര്‍, പശ്ചിമ ബംഗാള്‍ മുഖ്യമന്ത്രി മമത ബാനര്‍ജി, മഹാരാഷ്ട്ര മുഖ്യമന്ത്രി ഉദ്ധവ് താക്കറെ, തമിഴ്നാട് മുഖ്യമന്ത്രി എം കെ സ്റ്റാലിൻ തുടങ്ങിയവര്‍ക്ക് യോഗത്തിലേയ്ക്ക് ക്ഷണമുണ്ട്. കൂടാതെ ഇടതുപാര്‍ട്ടികളും ബിഎസ്പിയും ആര്‍ജെഡിയും നാഷണൽ കോൺഫറൻസും യോഗത്തിൽ പങ്കെടുക്കും. അതേസമയം, ഡൽഹി മുഖ്യമന്ത്രി അരവിന്ദ് കെജ്രിവാളിന് യോഗത്തിലേയ്ക്ക് ക്ഷണമില്ലന്നത് ശ്രദ്ധേയമാണ്.

Also Read: അഫ്ഗാനിസ്ഥാൻ പ്രതിസന്ധി; ബൈഡന്റെ ജനപിന്തുണ കൂപ്പുകുത്തി, കമലാ ഹാരിസിനെ പ്രസിഡന്റാക്കണമെന്ന് ആവശ്യം



പ്രതിപക്ഷം വിവിധ വിവാദവിഷയങ്ങളിൽ വലിയ പ്രതിഷേധമുയര്‍ത്തുകയും തുടര്‍ച്ചയായി ബഹളത്തിൽ മുങ്ങുകയും ചെയ്ത പാര്‍ലമെൻ്റ് മൺസൂൺകാല സമ്മേളനത്തിനു ശേഷമാണ് യോഗം നടക്കുന്നത്. പെഗാസസ് ഫോൺ ചോര്‍ത്തൽ, കൊവിഡ് 19 മഹാമാരിയ്ക്കെതിരായ പോരാട്ടം, കര്‍ഷക സമരം തുടങ്ങിയ വിവാദ വിഷയങ്ങളിൽ കേന്ദ്രസര്‍ക്കാര്‍ ഒറ്റപ്പെടുന്ന സാഹചര്യം മുതലെടുക്കാനാണ് പ്രതിപക്ഷം ശ്രമിക്കുന്നത്.

Also Read: ഇതു പോരാ, പെറ്റി കേസുകളുടെ എണ്ണം കൂട്ടാൻ പോലീസുകാർക്ക് ശബ്ദസന്ദേശം; ഡിസിപി ഐശ്വര്യ ദോഗ്രെ വിവാദത്തിൽ

മുൻപ് കോൺഗ്രസ് നേതാവും അഭിഭാഷകനുമായ കപിൽ സിബലും ബിജെപി വിരുദ്ധ നേതാക്കളെ ഒരുമിച്ചു കൂട്ടി അത്താഴവിരുന്ന് നല്‍കിയിരുന്നു. പ്രതിപക്ഷ പാര്‍ട്ടികളെ ഒരുമിച്ചു ചേര്‍ക്കാനുള്ള സോണിയ ഗാന്ധിയുടെ ശ്രമത്തെ കപിൽ സിബൽ സ്വാഗതം ചെയ്തിട്ടുമുണ്ട്. പ്രതിപക്ഷ മുന്നണി ശക്തിപ്പെടുത്തുന്നതോടൊപ്പം സംഘടനാ സംവിധാനം മെച്ചപ്പെടുത്താനുള്ള ശ്രമവും കോൺഗ്രസ് നടത്തുന്നുണ്ട്.