രേഖകള്‍ പരിശോധിച്ചു, കാറുകള്‍ മോഷ്ടിച്ചു; ഇന്ത്യൻ കോൺസുലേറ്റിൽ താലിബാൻ

ന്യൂഡൽഹി: താലിബാൻ ഭീഷണിയെത്തുടര്‍ന്ന് അടച്ചുകിടക്കുന്ന ഇന്ത്യൻ കോൺസലേറ്റിൽ പരിശോധന നടത്തി താലിബാൻ ഭീകരര്‍. കോണസലേറ്റിൽ കടന്ന ഭീകരര്‍ രേഖകള്‍ പരിശോധിക്കുകയും പാര്‍ക്ക് ചെയ്തിരുന്ന കാറുകൾ മോഷ്ടിച്ചുകൊണ്ട് പോകുകയും ചെയ്തു. സര്‍ക്കാര്‍ വൃത്തങ്ങളെ ഉദ്ധരിച്ച് ദേശീയ മാധ്യമമായ എൻഡിടിവിയാണ് ഇത് റിപ്പോര്‍ട്ട് ചെയ്തിരിക്കുന്നത്.



Also Read : അഫ്ഗാനിസ്ഥാൻ പ്രതിസന്ധി; ബൈഡന്റെ ജനപിന്തുണ കൂപ്പുകുത്തി, കമലാ ഹാരിസിനെ പ്രസിഡന്റാക്കണമെന്ന് ആവശ്യം



ബുധനാഴ്ചയോടെ കാണ്ഡഹാറിലേയും ഹേറത്തിലേയും ഇന്ത്യൻ കോൺസലേറ്റിലാണ് താലിബാൻ ഭീകരര്‍ എത്തിയത് എന്നാണ് റിപ്പോര്‍ട്ട്. രേഖകള്‍ സൂക്ഷ്മമായി പരിശോധിക്കുകയും വാഹനങ്ങള്‍ മോഷ്ടിക്കുകയുമായിരുന്നുവെന്നാണ് റിപ്പോര്‍ട്ട്.

അഫ്ഗാനിസ്ഥാനിൽ കാബൂളിലെ ഇന്ത്യൻ എംബസിക്ക് പുറമെ, മൂന്ന് കോൺസലേറ്റുകളാണുള്ളത്. കാണ്ഡഹാറിനും ഹേറത്തും, മസര്‍ ഐ ഷെരീഫിലുമാണ് കോൺസലേറ്റുകള്‍ പ്രവര്‍ത്തിക്കുന്നത്. താലിബാൻ ഭരണം പിടിക്കുന്നതിന് മുൻപ് തന്നെ കോൺസലേറ്റുകള്‍ ഇന്ത്യ അടച്ചിരുന്നു.

പിന്നീട്, വിവിധ ഘട്ടങ്ങളിലായി എംബസി ജീവനക്കാരെ എയര്‍ ഫോഴ്സിന്റെ രണ്ട് സി-17 വിമാനങ്ങളിലായി നാട്ടിലേക്ക് എത്തിക്കുകയും ചെയ്തിട്ടുണ്ട്. അതേസമയം, ചിലര്‍ ഇപ്പോഴും കാബൂളില്‍ കഴിയുകയാണ്. അവരെ തിരികെ എത്തിക്കാനുള്ള ശ്രമങ്ങള്‍ നടന്നുവരികയാണെന്നാണ് റിപ്പോര്‍ട്ടുകള്‍.

അഫ്ഗാനിസ്ഥാനിൽ കുടുങ്ങിക്കിടക്കുന്ന സഹായം ആവശ്യമുള്ള ഇന്ത്യാക്കാര്‍ വിദേശകാര്യ മന്ത്രാലയം രൂപീകരിച്ച പ്രത്യേക അഫ്ഗാന്‍ സെല്ലുമായി ഉടൻ ബന്ധപ്പെടണമെന്ന് നിര്‍ദ്ദേശം നൽകിയിരുന്നു. ആളുകള്‍ക്ക് ബന്ധപ്പെടാൻ പ്രത്യേക ഫോൺ നമ്പറും ഇമെയിൽ ഐഡിയും പ്രസിദ്ധീകരിച്ചിട്ടുണ്ട്.

300 ലധികം മലയാളികളടക്കം 1650 പേരാണ് മടങ്ങിയെത്തുവാന്‍ വിദേശകാര്യമന്ത്രാലയത്തെ സമീപിച്ചിരിക്കുന്നത്. അനുമതി ലഭിക്കുന്നതിന്റെ പശ്ചാത്തലത്തിൽ ഒഴിപ്പിക്കാനുള്ള ശ്രമങ്ങള്‍ നടന്നുവരികയാണെന്നും അധികൃതര്‍ അറിയിച്ചു.

Also Read : രാജ്യത്ത് 24 മണിക്കൂറിനിടെ 36,000ത്തിലധികം ആളുകള്‍ക്ക് രോഗബാധ; രോഗമുക്തി നിരക്ക് 97.54%



അതേസമയം, അഫ്ഗാനിസ്ഥാൻ പിടിച്ചെടുത്ത ശേഷം കാബുളിൽ യുഎസിനെ സഹായിച്ചവരെ കണ്ടെത്തി വകവരുത്താനായി വീടുകള്‍ കയറിയിിറങ്ങി താലിബാൻ തിരച്ചിൽ നടത്തുന്നുവെന്ന് ഐക്യരാഷ്ട്ര സഭയുടെ രഹസ്യാന്വേഷണ റിപ്പോര്‍ട്ടിൽ വ്യക്തമാക്കുന്നു. സമാധാനത്തിലൂന്നിയാകും ഭരണമെന്ന് വാര്‍ത്താസമ്മേളനത്തിലൂടെ പറഞ്ഞതിന് പിന്നാലെയാണ് ആശങ്ക പടര്‍ത്തിയുള്ള തെര‍ച്ചിൽ.