കാമുകിക്ക് വിലകൂടിയ ജന്മദിന സമ്മാനം വാങ്ങാൻ കത്തി കാണിച്ച് മോഷണം; യുവാവ് അറസ്റ്റിൽ

ന്യൂഡൽഹി: കാമുകിക്ക് ജന്മദിന സമ്മാനം വാങ്ങാൻ കത്തി കാണിച്ച് ഭീഷണിപ്പെടുത്തി മോഷണം നടത്തിയ യുവാവ് പിടിയിൽ. ഡൽഹിയിലെ ദാബ്രി സ്വദേശി വിരാട് സിങ് (22) എന്നയാളാണ് അറസ്റ്റിലായത്. പോലീസ് നടത്തിയ ചോദ്യം ചെയ്യലിലാണ് മോഷണം നടത്താനുള്ള കാരണം യുവാവ് വെളിപ്പെടുത്തിയത്.



‘മൂന്ന് പെൺമക്കൾ’; ആൺകുഞ്ഞിന് ജന്മം നൽകാത്തതിന്‍റെ പേരിൽ ഭർത്താവ് ഭാര്യയുടെ ദേഹത്ത് തിളച്ച വെള്ളമൊഴിച്ചു

കഴിഞ്ഞ വ്യാഴാഴ്ച രാത്രി ദാബ്രി പോലീസ് സ്റ്റേഷൻ പരിധിയിലാണ് വിരട് മോഷണം നടത്തിയത്. സീതാപുരി ബസ് സ്റ്റാൻഡിന് സമീപത്ത് വെച്ചാണ് കത്തി കാട്ടി ഭീഷണിപ്പെടുത്തി മോഷണം നടത്തിയത്. പണവും മൊബൈൽ ഫോണുകളും ഇവരിൽ നിന്നും ബലമായി പിടിച്ചുവാങ്ങുകയും ചെയ്തു. സംഭവശേഷം വിരാട് സ്ഥലത്ത് നിന്ന് രക്ഷപ്പെട്ടു.

കത്തി കാണിച്ച് ഭീഷണിപ്പെടുത്തി ഫോണും പണവും കവർന്നുവെന്ന് ഇവർ അറിയിച്ചതോടെ പോലീസ് നടത്തിയ അന്വേഷണത്തിലാണ് യുവാവ് പിടിയിലായത്. 5,000 രൂപയും തിരിച്ചറിയൽ കാർഡും നഷ്ടമായെന്ന് പരാതിക്കാരിൽ ഒരാൾ പോലീസിനോട് പറഞ്ഞു. അന്വേഷണത്തിനിടെ ധര്‍മ്മപുരയിലെ ഗുര്‍ജാര്‍ ഡയറിക്ക് സമീപത്ത് വെച്ചാണ് വിരാട് പോലീസിൻ്റെ പിടിയിലായത്.

കട കുത്തിത്തുറന്ന കള്ളന്മാരെ നേരിട്ടു; പോലീസുകാരൻ്റെ തോക്കുമായി മോഷ്ടാക്കൾ കടന്നു

കാമുകിക്ക് വിലകൂടിയ ജന്മദിന സമ്മാനം വാങ്ങാൻ പണം ഇല്ലാതെ വന്നതോടെയാണ് മോഷണം നടത്തിയതെന്ന് വിരാട് പോലീസിനോട് പറഞ്ഞു. ഗുഡ്ഗാവിലെ ഒരു കോൾ സെൻ്ററിലാണ് ജോലി ചെയ്തിരുന്നത്. കൊവിഡ്-19 നിയന്ത്രണങ്ങൾ നിലവിൽ വന്നതോടെ ജോലി നഷ്ടമായതോടെ കടുത്ത സാമ്പത്തിക ബുദ്ധിമുട്ട് ഉണ്ടായി. കൈയിൽ പണം ഇല്ലാതെ വന്നതോടെ കാമുകിക്ക് സമ്മാനം വാങ്ങി നൽകാനുള്ള സാഹചര്യമില്ലായിരുന്നു. ഇതോടെയാണ് കത്തി കാട്ടി ഭീഷണിപ്പെടുത്തിയതെന്നും യുവാവ് പോലീസിനോട് പറഞ്ഞു. ഇയാളിൽ നിന്നും മോഷണം നടത്തിയ മൊബൈൽ ഫോൺ പോലീസ് കണ്ടെടുത്തു. മോഷണം നടത്താൻ വിരാടിന് സഹായം ലഭിച്ചിരുന്നതായും റിപ്പോർട്ടുണ്ട്. ഇവരെ പിടികൂടാൻ പോലീസ് അന്വേഷണം ആരംഭിച്ചു.