‘അമേരിക്ക താലിബാനെ പാലും തോക്കും കൊടുത്ത് വളർത്തി’; ‘അഫ്ഗാനിസ്ഥാനിലുള്ളത് ഭീകരതയുടെ ടൈം ബോംബ്’

തിരുവനന്തപുരം: യുഎസ് സൈന്യം പിന്മാറിയതോടെ അഫ്ഗാൻ്റെ നിയന്ത്രണം താലിബാൻ ഏറ്റെടുത്തതിനു പിന്നാലെ യുഎസിനെ രൂക്ഷമായി വിമര്‍ശിച്ച് സിപിഎം നേതാവും മുൻ ധനമന്ത്രിയുമായ തോമസ് ഐസക്. യുഎസ് ആക്രമിച്ച മധ്യേഷ്യൻ രാജ്യങ്ങളിലെല്ലാം ഭീകരത വളര്‍ന്നെന്നും അഫ്ഗാനിസ്ഥാനിൽ ഭീകരതയുടെ ടൈംബോംബ് അവശേഷിപ്പിച്ചാണ് യുഎസ് മടങ്ങുന്നതെന്നും തോമസ് ഐസക് ഫേസ്ബുക്ക് കുറിപ്പിൽ വിമര്‍ശിച്ചു.



അമേരിക്ക ആക്രമിച്ച പല രാജ്യങ്ങളും ഇന്ന് മതതീവ്രവാദത്തിൻ്റെ പിടിയിലാണെന്ന് തോമസ് ഐസക് വ്യക്തമാക്കി. ഇറാഖ്, ലിബിയ, സിറിയ തുടങ്ങിയ രാജ്യങ്ങളിലെല്ലാം അമേരിക്ക വ്യവസ്ഥാപിത സര്‍ക്കാരുകളെ അട്ടിമറിച്ചാണ് ആക്രമണം നടത്തിയത്. ഈ രാജ്യങ്ങള്‍ ഇപ്പോള്‍ എവിടെയാണ് നിൽക്കുന്നതെന്ന് ആലോചിക്കണമെന്നു പറഞ്ഞ തോമസ് ഐസക് അഫ്ഗാനിസ്ഥാനിലെ നിലവിലെ സ്ഥിതിവിശേഷം ലോകത്ത് പലയിടത്തും തീവ്രവാദം ശക്തിപ്പെടാൻ കാരണമാകുമെന്നും ചൂണ്ടിക്കാട്ടി. എല്ലാ മതങ്ങളിലെയും തീവ്രവലതുപക്ഷം ലോകത്തിനു മൊത്തത്തിൽ ഭീഷണിയാകും. അഫ്ഗാനിസ്ഥാനിലെ നിലവിലെ സാഹചര്യം യുപി തെരഞ്‌ഞെടുപ്പിൽ ബിജെപിയ്ക്ക് ഗുണം ചെയ്യുമെന്ന റിപ്പോര്‍ട്ടുകളും അദ്ദേഹം ചൂണ്ടിക്കാട്ടി. ജനാധിപത്യരാജ്യങ്ങളിൽ മതതീവ്രവാദത്തിന് താലിബാൻ ലൈസൻസാകുമെന്നും അദ്ദേഹം വിമര്‍ശിച്ചു.

Also Read: സംസ്ഥാനത്ത് ഇന്ന് 17,106 പേര്‍ക്ക് കൊവിഡ് സ്ഥിരീകരിച്ചു; 83 മരണം, ടിപിആർ 17.73

പല മുസ്ലീം ഭൂരിപക്ഷ രാജ്യങ്ങളും മുൻപ് മതനിരപേക്ഷ മൂല്യങ്ങള്‍ക്കും സ്ത്രീ സ്വാതന്ത്ര്യത്തിനും പ്രാധാന്യം നല്‍കിയിരുന്നുവെന്നും ഇവിടങ്ങളിൽ കമ്മ്യൂണിസ്റ്റ്, സോഷ്യലിസ്റ്റ് പ്രസ്ഥാനങ്ങള്‍ ശക്തമായിരുന്നുവെന്നും തോമസ് ഐസക് പറഞ്ഞു. എന്നാൽ ഈ സ്വാധീനം തകര്‍ക്കാനായി യുഎസ് സൗദി കേന്ദ്രീകരിച്ച് പ്രവര്‍ത്തിക്കുന്ന വഹാബി ഇസ്ലമിനെയും ഈജിപ്തിലെ മുസ്ലീം ബ്രദര്‍ഹുഡിനെയും പ്രോത്സാഹിപ്പിക്കുകയായിരുന്നുവെന്നും ഐസക് കുറിച്ചു.

സ്വാതന്ത്ര്യത്തിനും ജനാധിപത്യാവകാശങ്ങള്‍ക്കും വേണ്ടിയാണ് യുഎസ് ഇതരരാജ്യങ്ങളിൽ ഇടപെടുന്നതെന്ന യുഎസ് ന്യായവാദം പൊള്ളത്തരമാണെന്ന് ഐസക് അഭിപ്രായപ്പെട്ടു. “എന്നാൽ വിദ്യാഭ്യാസവും ലിംഗനീതിയും ഭൂപരിഷ്കരണവും ഉറപ്പുവരുത്തിയ അഫ്ഗാൻ സർക്കാരിനെതിരെയാണ് താലിബാനെപ്പോലുള്ള മതഭീകരതയെ വളർത്തിയത് എന്നോർക്കുമ്പോൾ ഈ വാചാടോപത്തിന്റെ പൊള്ളത്തരം ബോധ്യമാകും.” തോമസ് ഐസക് ഫേസ്ബുക്കിൽ കുറിച്ചു. താലിബാൻ്റെ ക്യാംപുകളിലേയ്ക്ക് പണവും ആയുധവും ഒഴുക്കിയത് യുഎസ് ആണെന്നും അദ്ദേഹം പറഞ്ഞു.

Also Read: സുപ്രീം കോടതിയ്ക്കു മുന്നിൽ തീകൊളുത്തി മരിക്കാൻ ദമ്പതികളുടെ ശ്രമം; യുവാവ് പൊള്ളലേറ്റു മരിച്ചു

ഇത്തരം ചരിത്രവസ്തുതകള്‍ താലിബാനെ വിശുദ്ധരായി കാണുന്ന ജമാഅത്തെ ഇസ്ലാമിയെപ്പോലുള്ളവരുടെ മുഖംമൂടി വലിച്ചു കീറുന്നുണ്ടെന്ന് താലിബാൻ പറഞ്ഞു. താലിബാൻ്റെ പ്രത്യയശാസ്ത്രം അങ്ങേയറ്റം മനുഷ്യത്വവിരുദ്ധമാണ്. അവരെ ന്യായീകരിക്കുന്നവര്‍ അവരെക്കാള്‍ മനുഷ്യത്വവിരുദ്ധരാണെന്നും ഒരു ഭീകരത മറ്റൊരു ഭീകരതയ്ക്ക് അടിവളമാകുമെന്നും തോമസ് ഐസക് പറഞ്ഞു. ഇത് ജനാധിപത്യത്തിന് ഭീഷണിയാകുമെന്നും അദ്ദേഹം കൂട്ടിച്ചേര്‍ത്തു.