ഒരിക്കല്‍ വന്നാല്‍ ഒരിക്കലും മാറാത്ത അപൂര്‍വ രോഗങ്ങളില്‍ പെടും പ്രമേഹം. വന്നു കഴിഞ്ഞാല്‍ പിന്നെ നിയന്ത്രണം എന്നതു മാത്രമാണ് ആകെയുള്ള രക്ഷ. പാരമ്പര്യ രോഗം കൂടിയായതിനാല്‍ ഭീഷണി കൂടുതലുമാണ്. എത്ര തന്നെ നിയന്ത്രണങ്ങള്‍ വച്ചാലും പാരമ്പര്യമെന്നത് പ്രധാന ഘടകവുമാണ്. പ്രമേഹം കൂടിയ തോതിലെങ്കില്‍ ഇത് ടൈപ്പ് 2 ഗണത്തില്‍ പെടുന്നു. കൃത്യമായി നിയന്ത്രിച്ചില്ലെങ്കില്‍ ശരീരത്തിലെ പല അവയവങ്ങളേയും കേടു വരുത്തി ശാരീരിക പ്രക്രിയകള്‍ തടസപ്പെടുത്തുന്ന ഒന്നാണിത്. ഇതിനായി പരീക്ഷിയ്ക്കാവുന്ന നല്ലൊന്നാന്തരം നാട്ടുവൈദ്യങ്ങളുമുണ്ട്. ഇതില്‍ ഒന്നാണ് നെല്ലിക്കാ പാനീയം. പ്രത്യേക രീതിയിലെ നെല്ലിക്കാ പാനീയം പ്രമേഹത്തിന് മരുന്നാണ്. ഇതെങ്ങനെ തയ്യാറാക്കം എന്നറിയൂ.

നെല്ലിക്ക

ഈ പാനീയത്തിന് നെല്ലിക്ക, കറിവേപ്പില, മഞ്ഞള്‍, നാരങ്ങ, ഇഞ്ചി എന്നിവയാണ് വേണ്ടത്. നെല്ലിക്കയുടെ കയ്പു രസം തന്നെ ഇതിന്റെ പ്രമേഹ ഗുണത്തിനുള്ള ഉദാഹരണമാണ്. പഞ്ചസാരയുടെ അളവ് നിയന്ത്രിക്കുന്നതിന് നെല്ലിക്ക ഏറ്റവും ഉത്തമമായ പ്രതിവിധികളിൽ ഒന്നാണ്. ഇൻസുലിൻ മരുന്നുകളുടെ ചെറുത്തുനിൽപ്പിനെ സഹായിക്കുകയും രക്തത്തിലെ പഞ്ചസാരയുടെ അളവിനെ സന്തുലിതമാക്കാനും സഹായിക്കുന്ന ഒന്നാണ് നെല്ലിക്ക. ഇത് ശരീരത്തിൽ നിന്ന് വിഷവസ്തുക്കളെ പുറന്തള്ളി സെല്ലുലാർ മെറ്റബോളിസത്തെ സുഖപ്പെടുത്തുകയും ചെയ്യുന്നു. പ്രമേഹരോഗത്തെ പ്രതിരോധിക്കാനായി നെല്ലിക്ക നിരവധി കാര്യങ്ങൾ ശരീരത്തിൽ ചെയ്യുന്നുണ്ട്.

​മഞ്ഞള്‍

മഞ്ഞള്‍ ആരോഗ്യ കാര്യത്തിലും മുന്‍പന്തിയില്‍ തന്നെയാണ്. ഇത് ആന്റി ബാക്ടീരിയല്‍ ഗുണങ്ങളുള്ള ഒന്നാണ്. ഇന്ത്യന്‍ കുങ്കുമപ്പൂ, ഗോള്‍ഡന്‍ സ്‌പൈസ് തുടങ്ങിയ പേരുകളില്‍ അറിയപ്പെടുന്ന ഇതില്‍ നൂറിലധികം ആരോഗ്യകരമായ കെമിക്കല്‍ ഘടകങ്ങള്‍ അടങ്ങിയിട്ടുമുണ്ട്. ഇതിലെ കുര്‍കുമിന്‍ എന്ന ഘടകമാണ് പ്രമേഹമുള്‍പ്പെടെയുളള പല രോഗങ്ങള്‍ക്കും മരുന്നാകുന്നത്. കുര്‍കുമിന് രക്തത്തിലെ ഗ്ലൂക്കോസ് തോതു നിയന്ത്രിയ്ക്കുവാന്‍ സാധിയ്ക്കും. പ്രമേഹം കാരണമുണ്ടാകുന്ന പാര്‍ശ്വഫലങ്ങള്‍ക്കും ഇതു പരിഹാരമാണ്. ടൈപ്പ് 2 പ്രമേഹത്തിനു പോലും ഇതു മരുന്നായി പ്രവര്‍ത്തിയ്ക്കുന്നു.

​ഇഞ്ചി

ഇഞ്ചി പല ആരോഗ്യ പ്രശ്‌നങ്ങള്‍ക്കുമുള്ള വലിയൊരു മരുന്നാണ്. ആന്റി ഓക്‌സിഡന്റുകളാല്‍ സമ്പുഷ്ടമായ ഇത് രക്തത്തിലെ ഷുഗര്‍ തോത് കൃത്യമായി നില നിര്‍ത്താന്‍ സഹായിക്കുന്നു. ഇത് ഇന്‍സുലിന്‍ ഉല്‍പാദനത്തിന് സഹായിക്കുന്ന ഒന്നാണ്. ഇതു പോലെ ഗ്ലൈസമിക് ഇന്‍ഡെക്‌സ് കുറയ്ക്കാനും ഇത് സഹായിക്കുന്നു. ടൈപ്പ് 2 പ്രമേഹ രോഗികളില്‍ ഫാസ്റ്റിംഗ് സെറം ഗ്ലൂക്കോസ് തോത് കുറയ്ക്കാന്‍ ഇഞ്ചി നല്ലതാണെന്ന് പഠനങ്ങള്‍ തെളിയിച്ചിട്ടുണ്ട്.

നാരങ്ങ

രോഗപ്രതിരോധ ശേഷി ശക്തിപ്പെടുത്താൻ നാരങ്ങയിലെ വിറ്റാമിൻ സി നിങ്ങളെ സഹായിക്കും. പതിവ് രോഗങ്ങളുടെ സാധ്യത കുറയ്ക്കാൻ ഇത് സഹായിക്കുന്നു. ഫ്രീ റാഡിക്കലുകൾ, രക്തത്തിലെ പഞ്ചസാരയുടെ അളവ്, പ്രവർത്തനരഹിതമായ അല്ലെങ്കിൽ അമിതമായി പ്രവർത്തിക്കുന്ന തൈറോയ്ഡ് ഗ്രന്ഥി എന്നിവയ്ക്കെതിരെ പോരാടുന്ന ആന്റിഓക്‌സിഡന്റുകളാൽ സമ്പുഷ്ടമാണ് ഇവ. വിറ്റാമിൻ (വിറ്റാമിൻ സി ഏറ്റവും പ്രധാനപ്പെട്ടത്), ഫോളേറ്റ്, കാൽസ്യം, ഇരുമ്പ്, പൊട്ടാസ്യം, സിങ്ക്, മാംഗനീസ്, പ്രോട്ടീൻ, ചെമ്പ് എന്നിവയാണ് ഈ ചെറിയ പഴത്തിൽ അടങ്ങിയിരിക്കുന്നത്.

കറിവേപ്പില

രക്തത്തിലെ പഞ്ചസാരയുടെ ഉയർന്ന അളവ് നിയന്ത്രിക്കുന്നതിനുള്ള ഫലപ്രദമായ പ്രതിവിധിയാണ് കറിവേപ്പിലയുടെ പതിവ് ഉപഭോഗം എന്ന് പല പോഷകാഹാര വിദഗ്ധരും ഒരേ സ്വരത്തിൽ പറയുന്നുണ്ട്. കറിവേപ്പില പല ആന്റിഓക്‌സിഡന്റുകളും, പ്രത്യേകിച്ച് ഫ്ലേവനോയ്ഡുകളും അടങ്ങിയതാണ്. ഈ ഫ്ലേവനോയ്ഡുകൾ ശരീരത്തിനുള്ളിൽ ഗ്ലൂക്കോസിലേക്ക് അന്നജത്തിന്റെ രാസവിനിമയത്തെ തടയുന്നു, അതിനാൽ ഇത് രക്തത്തിലെ പഞ്ചസാര നിയന്ത്രണത്തെ സഹായിക്കുന്നു.

​ഇതിനായി

ഇതിനായി രണ്ടു നെല്ലിക്ക കുരു കളഞ്ഞ് എടുക്കുക. ഇതും ഒരു കഷ്ണം ചെറിയ ഇഞ്ചി തൊലി കളഞ്ഞത്, ഒരു തണ്ട് കറിവേപ്പില തണ്ടു നീക്കി ഇലകള്‍ മാത്രം, പകുതി നാരങ്ങയുടെ നീര് പിഴിഞ്ഞൊഴിച്ചത് എന്നിവ ചേര്‍ത്ത് നല്ലതു പോലെ അരച്ചെടുക്കുക. ഇതില്‍ പാകത്തിന് വെള്ളം ചേര്‍ത്ത് അല്‍പം മഞ്ഞള്‍പ്പൊടിയും രുചിയ്ക്ക് ലേശം ഉപ്പും ചേര്‍ത്തിളക്കി കുടിയ്ക്കാം. ഇത് വെറും വയറ്റിലെങ്കില്‍ കൂടുതല്‍ ഗുണകരം.