ഓട്ടത്തിനിടെ ആംബുലൻസ് ഡ്രൈവറുടെ കഴുത്ത് ഞെരിച്ച് രോഗി; താഴ്ച്ചയിലേയ്ക്ക് മറിഞ്ഞ് വാഹനം

തിരുവനന്തപുരം: ആശുപത്രിയിൽ നിന്ന് വീട്ടിലേയ്ക്ക് മടങ്ങുന്നതിനിടെ ആംബുലൻസിൽ വെച്ച് രോഗി ഡ്രൈവറെ ആക്രമിച്ചതായി റിപ്പോര്‍ട്ട്. തിരുവനന്തപുരം കാട്ടാക്കടയിലാണ് സംഭവമുണ്ടായത്. രോഗിയായ യുവാവ് പിന്നിൽ നിന്ന് ഡ്രൈവറുടെ കഴുത്തിനു കുത്തിപ്പിടിച്ചതോടെ നിയന്ത്രണം വിട്ട ആംബുലാൻസ് താഴ്ചയിലേയ്ക്ക് മറിഞ്ഞു.



Also Read: മലബാ‍ര്‍ കലാപത്തിലെ രക്തസാക്ഷികളുടെ പേര് ചരിത്രത്തിൽ നിന്നും നീക്കുന്നത് അനീതി: വിഡി സതീശൻ

ഞായറാഴ്ച രാത്രി 11 മണിയോടെയായിരുന്നു കാട്ടാക്കട അണപ്പാടിനു സമീപം അപകടമുണ്ടായത്. ആംബുലൻസിലുണ്ടായിരുന്ന രോഗി മദ്യലഹരിയിലായിരുന്നുവെന്നാണ് ഡ്രൈവര്‍ പറയുന്നതെന്നാണ് ന്യൂസ് 18 റിപ്പോര്‍ട്ട്. ഒരു അപകടത്തിൽ പരിക്കേറ്റ ഇയാള്‍ കഴിഞ്ഞ കുറച്ചു ദിവസമായി മലയിൻകീഴ് താലൂക്ക് ആശുപത്രിയിൽ ചികിത്സയിലായിരുന്നു. ഇന്നലെ ഡിസ്ചാര്‍ജ് ആയതോടെ വീട്ടിലേയ്ക്ക് പോകാൻ ആശുപത്രിയ്ക്ക് സമീപമുണ്ടായിരുന്ന ആംബുലൻസ് വിളിക്കുകയായിരുന്നു. വാഹനത്തിൽ സംസാരിച്ചിരുന്ന യുവാവ് പെട്ടെന്നു പ്രകോപനമില്ലാതെ അക്രമാസക്തനാകുകയായിരുന്നുവെന്നാണ് ഡ്രൈവര്‍ പറയുന്നത്.

Also Read: വാരിയംകുന്നനെ മതഭ്രാന്തനായി ചിത്രീകരിക്കുന്നത് തെറ്റ്; ചരിത്ര വസ്തുത പറഞ്ഞതിന് മാപ്പെന്തിനെന്ന് എംബി രാജേഷ്

അണപ്പാടിനു സമീപത്തു വെച്ച് ബഹളം വെക്കുകയും യുവാവ് കഴുത്തിനു കുത്തിപ്പിടിക്കുകയും ചെയ്തതോടെ വാഹനത്തിൻ്്റെ നിയന്ത്രണം തെറ്റി മറിയുകയായിരുന്നുവെന്ന് ഡ്രൈവര്‍ പറഞ്ഞു. എന്നാൽ അധികം വേഗതയില്ലാതിരുന്നതിനാൽ വലിയ അപകടം ഒഴിവായി. അപകടത്തിൽ ആംബുലൻസ് ഡ്രൈവര്‍ മണിയറവിള അമലിനു പരിക്കേറ്റു. ഇയാളെ നാട്ടുകാര്‍ ചേര്‍ന്ന് രക്ഷപെടുത്തിയെങ്കിലും വാഹനത്തിലുണ്ടായിരുന്ന രോഗി ഇതിനിടെ കടന്നു കളയുകയായിരുന്നു. ഇയാളെ കണ്ടെത്താൻ മാറാനല്ലൂര്‍ പോലീസ് അന്വേഷണം തുടങ്ങിയിട്ടുണ്ടെന്നും റിപ്പോര്‍ട്ടിൽ പറയുന്നു.