തൊണ്ടകടി അഥവാ ഇച്ചിംഗ് ത്രോട്ട് എന്നത് പലരേയും അലട്ടുന്ന പ്രശ്‌നമാണ്. ചിലര്‍ക്കിത് കോള്‍ഡിന്റെ ഭാഗമായി ഉണ്ടാകും. ചിലര്‍ക്കാകട്ടെ ഇത് അലര്‍ജിയുടെ ഭാഗമായും ഉണ്ടാകാറുണ്ട്.വൈറൽ അല്ലെങ്കിൽ ബാക്ടീരിയ അണുബാധയോടുള്ള നിങ്ങളുടെ ശരീരത്തിന്റെ രോഗപ്രതിരോധ പ്രതികരണത്തിന്റെ ഭാഗമായാണ് തൊണ്ടവേദനയും ചൊറിച്ചിലും ഉണ്ടാകുന്നത്. നിങ്ങളുടെ രോഗപ്രതിരോധ പ്രതികരണം തൊണ്ടയിലെ മ്യൂക്കസ് മെംബറേനിൽ വീക്കം, നീർക്കെട്ട് എന്നിവ ഉണ്ടാകുന്നതിലേക്ക് നയിക്കുകയും, അത് വേദനയ്ക്ക് കാരണമാവുകയും ചെയ്യുകുന്നു. ജലദോഷം, പനി, അലർജി, മലിനീകരണം, പുക, വരൾച്ച, ഉച്ചത്തിൽ സംസാരിക്കുമ്പോൾ പേശികൾക്ക് ഉണ്ടാകുന്ന ബുദ്ധിമുട്ട് എന്നിവയാണ് തൊണ്ടവേദനയുടെ സാധാരണ കാരണങ്ങൾ. തൊണ്ടവേദനയുടെ ചില ലക്ഷണങ്ങളിൽ വേദന, ഭക്ഷണം വിഴുങ്ങാൻ ബുദ്ധിമുട്ട്, വീർത്ത ഗ്രന്ഥികൾ, ചുവന്ന ടോൺസിലുകൾ എന്നിവ ഉൾപ്പെടുന്നു.ഇതിന് കൃത്രിമ മരുന്നുകള്‍ ഇല്ലാതെ വീട്ടില്‍ തന്നെ പരിഹാരമായി ചെയ്യാവുന്ന ചില പ്രത്യേക വഴികളുണ്ട്. ഇതെക്കുറിച്ചറിയൂ.

ഗാര്‍ഗിള്‍

ഇതിന് ഗാര്‍ഗിള്‍ ചെയ്യുന്നത് നല്ലതാണ്. ഇതിനായി പ്രത്യേക രീതിയിലെ വെള്ളം തയ്യാറാക്കാം. നാലഞ്ച് തുളസിയില, മഞ്ഞള്‍ എന്നിവയാണ് ഇതിനായി വേണ്ടത്. തുളസി നല്ല മരുന്നാണ്. ഇന്‍ഫെക്ഷനുകള്‍ക്കുള്ള നല്ലൊന്നാന്തരം മരുന്നാണിത്. ഇത് തൊണ്ടയിലെ അലര്‍ജി, അണുബാധകള്‍ ചെറുക്കുന്നു. മഞ്ഞളും ആന്റി ഫംഗല്‍, ആന്റി ബാക്ടീരിയല്‍, ആന്റി വൈറല്‍ ഗുണങ്ങള്‍ ഉള്ളതിനാല്‍ തന്നെ തൊണ്ടയിലെ അസ്വസ്ഥതയ്ക്ക് നല്ല മരുന്നാണ്. അല്‍പം വെള്ളത്തില്‍ നാലഞ്ച് തുളസിയില ഇട്ടു തിളപ്പിയ്ക്കുക. ഇത് തിളച്ചാല്‍ വാങ്ങി വച്ച് ഇതില്‍ ലേശം മഞ്ഞള്‍പ്പൊടി കൂടി ഇട്ട് ഇളം ചൂടോടെ ഗാര്‍ഗിള്‍ ചെയ്യാം.

​ചുക്കുപൊടിയും തേനും

ചുക്കുപൊടിയും തേനും കലര്‍ത്തി മിശ്രിതം കഴിയ്ക്കുന്നതും തൊണ്ടയിലെ ചൊറിച്ചിലിനും വേദനയ്ക്കും അസ്വസ്ഥതകള്‍ക്കുമെല്ലാം ആശ്വാസമാകുന്നു. തേന്‍ അണുബാധാ ഗുണങ്ങള്‍ ഉള്ളതാണ്. ഇത് ദിവസവും രണ്ടു തവണ വീതമെങ്കിലും കഴിയ്ക്കാം. ഇതു പോലെ ചൂടുവെള്ളവും കുടിയ്ക്കാം. ഇടയ്ക്കിടെ ചൂടുവെള്ളം കുടിയ്ക്കുന്നത് തൊണ്ടയിലെ ഇന്‍ഫെക്ഷന്‍ അകറ്റാന്‍ നല്ലതാണ്. ഇതു പോലെ ചൂടുള്ള വാട്ടര്‍ ബാഗ് തൊണ്ടയില്‍ വയ്്ക്കുന്നതും നല്ലതാണ്. ഇത്തരം അസ്വസ്ഥതകള്‍ ഉള്ള സമയത്ത് മസാലകള്‍ അടങ്ങിയ ഭക്ഷണം ഒഴിവാക്കുക. അധികം ചൂടുള്ളതും തണുത്തതും ഒഴിവാക്കുക. ഇതുപോലെ സൂര്യപ്രകാശം തൊണ്ടയില്‍ കൊള്ളാന്‍ അനുവദിയ്ക്കുക.

വെളുത്തുള്ളി

വെളുത്തുള്ളിയാണ് അടുത്ത മരുന്ന്. ഇതിന് ബാക്ടീരിയല്‍ അണുബാധ തടയാന്‍ സഹായിക്കുന്നു. ഇതിലെ അലിസിന്‍ എന്ന ആന്റിഓക്‌സിഡന്റിനാണ് ബാക്ടീരിയ, ഫംഗസ്, വൈറല്‍ അണുബാധകള്‍ക്കെതിരെ പ്രവര്‍ത്തിയ്ക്കാന്‍ സാധിയ്ക്കുക. ഇതിനായി വെളുത്തുള്ളി ചവച്ചരച്ച് കഴിച്ചാല്‍ മതിയാകും. ഇത് ചതയ്ക്കുമ്പോഴോ ചവച്ചരക്കുമ്പോഴോ ആണ് ഇതിലെ അലിസിന്‍ എന്ന ഘടകം ഉല്‍പാദിപ്പിയ്ക്കപ്പെടുക. ഇതിനാല്‍ ഇത് ചതച്ച് ഉപയോഗിയ്ക്കുക. ഇതു പോലെ ഇത് വായിലിട്ട് ചവച്ച് കുറേശേ വീതം നീരിറക്കുന്നതും നല്ലതാണ്.

​ചിറ്റമൃത്

ചിറ്റമൃത് ഇതിനു പറ്റിയ നല്ലൊരു മരുന്നാണ്. ചിറ്റമൃത് അല്‍പം ഇട്ട് തിളപ്പിയ്ക്കുക. ഈ വെള്ളം കുടിയ്ക്കാം. ഇതു പോലെ തന്നെ ഇഞ്ചിയിട്ട വെള്ളം തിളപ്പിച്ചു കുടിയ്ക്കുന്നതും തൊണ്ടകടിയ്ക്ക് പരിഹാരമാകും. ഇഞ്ചിയിട്ട വെള്ളത്തില്‍ പുതിനയില, ലെമണ്‍ ഗ്രാസ് എന്നിവയും ഇടാം. ഇഞ്ചിയ്ക്ക് മരുന്നു ഗുണമുണ്ട്. ആന്റി ഇന്‍ഫ്‌ളമേറ്ററി ഗുണങ്ങള്‍ ഉള്ളതാണ് ഇഞ്ചി. ഇഞ്ചി ഇന്‍ഫ്‌ളമേറ്ററി പ്രോട്ടീന്‍ നമ്മുടെ ശരീരത്തില്‍ ഉണ്ടാകുന്നത് തടയുന്നു. ഈ പ്രോട്ടീനാണ് തൊണ്ട കടിയ്ക്ക് കാരണം.