ജിമ്മിലെത്തിയ യുവതിയെ മയക്കുമരുന്ന് നൽകി പീഡിപ്പിച്ചു; അശ്ലീല ചിത്രം പകർത്തി മകന് അയച്ചു; ജിം ഉടമയ്ക്കെതിരെ പരാതി

ലുഡിയാന: ജിമ്മിലെത്തിയ യുവതിയെ മയക്കുമരുന്ന് നൽകി പീഡിപ്പിച്ചു. പഞ്ചാബിലെ ലുഡിയാനയിലാണ് സംഭവമുണ്ടായിരിക്കുന്നത്. പീഡനത്തിന് ശേഷം രണ്ട് മക്കളുടെ അമ്മകൂടിയായ സ്ത്രീയെ ഭീഷണിപ്പെടുത്തുകയും ചെയ്തതായി പരാതിയുണ്ട്. 2015ൽ തുടങ്ങിയ പീഡനത്തിന്റെ പരാതി ശനിയാഴ്ചയാണ് നൽകിയിരിക്കുന്നത്.



ജിം ഉടമസ്ഥന്‍ കൂടിയായ ധര്‍മ്മീന്ദര്‍ കുമാര്‍ സണ്ണിയെന്നയാളാണ് കേസിലെ പ്രതി. പഞ്ചാബിലെ ഹർഗോബിന്ദ്പുര സ്വദേശിയായ ഇയാള്‍ ജസ്സിയാൻ റോഡിൽ ജിം ഉടമയാണ്.

38കാരിയായ പരാതിക്കാരി 2015 മുതൽ ജിമ്മിൽ ചേര്‍ന്നിരുന്നു. പിന്നീട്, തനിക്ക് മറ്റൊരു ജിം ഉണ്ടെന്നും അതിൽ കൂടുതൽ മികച്ച ഉപകരണങ്ങളുണ്ടെന്നും പറയുകയയായിരുന്നു. തുടര്‍ന്ന് യുവതി ഇയാള്‍ പറഞ്ഞ ജിമ്മിൽ പരിശീലനം ആരംഭിക്കുകയും ചെയ്തു.

ഒരു ദിവസം ജിമ്മിൽ മറ്റാരുമില്ലാതിരുന്നപ്പോള്‍ ശരീര സൗന്ദര്യം വര്‍ദ്ധിപ്പിക്കുന്നതിന് ഗുണകരമാണെന്ന് പറഞ്ഞ് ചില ഗുളികകള്‍ നൽകുകയും ഒരു കുത്തിവയ്പ്പ് എടുപ്പിക്കുകയും ചെയ്തു. മയക്കുമരുന്ന് ശരീരത്തിൽ എത്തിയതോടെ യുവതിക്ക് ഭാഗികമായി ബോധം നഷ്ടപ്പെടുകയും പ്രതി ബലാത്സംഗം ചെയ്യുകയുമായിരുന്നു. ഇതിന്പുറമെ, തന്റെ നഗ്ന ചിത്രങ്ങളും വീഡിയോകളും പകര്‍ത്തുകയും അത് പുറത്തുവിടുമെന്ന് പറഞ്ഞ് ഭീഷണിപ്പെടുത്തി തുടര്‍ച്ചയായി ലൈംഗിക പീഡനം നടത്തിയെന്നും യുവതി പരാതിയിൽ പറഞ്ഞു.

പിന്നീട്, 2018ൽ ജിമ്മിലേക്ക് ഉപകരണങ്ങള്‍ വാങ്ങുന്നതിന് യുവതിയോട് പ്രതി അഞ്ച് ലക്ഷം രൂപ ആവശ്യപ്പെട്ടിരുന്നുവെന്ന് പരാതിയിൽ പറയുന്നു. എന്നാൽ അത് നൽകാൻ സാധിക്കില്ലെന്ന് കാണിച്ച് നിരസിക്കുകയും ചെയ്തിരുന്നു. തുടര്‍ന്ന് രണ്ട് ലക്ഷം രൂപ നൽകണമെന്ന് ആവശ്യപ്പെട്ടു. പണം നൽകിയില്ലെങ്കിൽ സമൂഹമാധ്യമങ്ങളില്‍ ചിത്രങ്ങള്‍ പ്രദര്‍ശിപ്പിക്കുമെന്നായിരുന്നു ഭീഷണി.

ഈ വര്‍ഷം വീണ്ടും അഞ്ച് ലക്ഷം രൂപ ആവശ്യപ്പെട്ടതോടെ ഇയാളുടെ ജിമ്മിൽ പോകുന്നത് ഇവർ നിർത്തിയിരുന്നു. തുടര്‍ന്നും ഭീഷണി ഉയര്‍ത്തിയെങ്കിലും ശ്രദ്ധിക്കാത്തതിനാൽ പരാതിക്കാരിയുടെ ആൺമക്കള്‍ക്ക് നഗ്നദൃശ്യങ്ങളും മറ്റും അയച്ചു നൽകുകയായിരുന്നു. ഉടൻ തന്നെ ഡിലീറ്റ് ചെയ്യുകയും ചെയ്തു. പണം നൽകിയില്ലെങ്കിൽ കുടുംബാംഗങ്ങളെ കൊല്ലുമെന്ന തരത്തിൽ ഭീഷണിപ്പെടുത്തുകയും ചെയ്തു.

ഐപിസി 376 (ബലാത്സംഗം), 506 (ക്രിമിനൽ ഭീഷണിപ്പെടുത്തൽ) വകുപ്പുകൾ പ്രകാരമാണ് പോലീസ് പ്രതിക്കെതിരെ കേസെടുത്തത്. ഇൻഫർമേഷൻ ടെക്നോളജി (ഐടി) നിയമപ്രകാരമുള്ള ബന്ധപ്പെട്ട കുറ്റങ്ങളും അദ്ദേഹത്തിനെതിരെ ചുമത്തിയിട്ടുണ്ട്.